Pagpamatuod Bisan Asa nga Anaay mga Tawo

¹ Miila sa papel nga gidula sa espiritu sa Diyos diha sa iyang ministeryo, si apostol Pablo miingon: “Padayong gipatubo kini sa Diyos.” Usab iyang giila: “Kami mga isigkamagbubuhat sa Diyos.” (1 Cor. 3:5-9) Usa kini ka talagsaong pribilehiyo. Sa unsang paagi atong ikapasundayag sa publiko nga atong gipabilhan ang pagkahimong mga isigkamagbubuhat sa Diyos? Pinaagig pagpahayag sa maayong balita ngadto sa tanang atong ikasugat sa balaybalayng buluhaton ug bisan diin.

² Kita gisugo sa “paghimog mga tinun-an sa katawhan.” (Mat. 28:19) Kon makakontak lamang kitag pipila ka tawo sa dihang kita makig-ambit sa ministeryo, hayan dali kitang mawad-ag kadasig ug mobati nga diyutay lamang ang nalampos. Sa laing bahin, malipay gayod kita sa atong ministeryo kon makahimo kita sa pagkaplag ug daghang tawo ug makahinabi sila. Kini hinuon mahagiton, sanglit nagakinahanglan kinig pipila ka panlimbasog sa atong bahin sa pag-adto sa bisan asa nga anaay mga tawo aron atong makontak sila.

³ Praktikal nga mga Pananglitan: Makasangyaw kita sa mga tawo diha sa mga tiyanggihan, mga parke, paradahan, ug mga pondohanan sa bus. Sa dihang mosakay ka sa mga sakyanang publiko, ikaw ba andam sa pagpamatuod samtang nagapanaw? Duha ka Saksi nga nagsakay sa naghuot nga bus padulong sa tigom sa dayon na nga pagsangyaw nakighisgot bahin sa larawan sa Paraiso diha sa Kahibalo nga libro. Ingon sa ilang gilaomang mahitabo, usa ka batan-ong lalaki nga nagbarog sa duol naminaw ug nakadayeg sa iyang nadunggan. Sa wala pa manaog sa bus, iyang gidawat ang usa ka libro ug naghangyo nga adunay moduaw sa iyang balay.

⁴ Daghang magmamantala nakakaplag ug kalipay sa pagbuhat ug di-pormal nga pagsangyaw. Usa ka sister miadto sa lokal nga shopping center usa ka hapon ug miduol sa mga tawo nga human na sa ilang pagpamalit pero maorag wala magdali. Napahiluna niya ang tanang literatura nga diha sa iyang bag. Usa ka lalaki nga naghulat diha sa iyang kotse nalipay sa pagdawat ug mga magasin gikan sa sister. Nakatambong na siya sa mga tigom kaniadto, ug ang ilang panaghisgot nakahaling sa iyang interes.

⁵ Maoy usa ka pribilehiyo ang pagbayaw sa ngalan ni Jehova. Pinaagig pagpasundayag sa atong kasibot sa buluhatong pagsangyaw, atong ikapakita nga wala nato sipyata ang katuyoan sa dili-takos nga kalulot sa Diyos ngari kanato. Sanglit “karon mao na ang panahon nga ilabinang dalawaton” sa pagtabang sa uban, mangadto kita bisan asa nga anaay mga tawo ug magpamatuod kanila bahin sa “adlaw sa kaluwasan” ni Jehova.​—2 Cor. 6:1, 2.