“Maghigugmaay Pa Kaha ang Tanang Tawo sa Usag Usa?”
1 Ang usa ka maanindot, makapadasig, ug makapasadya nga mensahe ang imantala sa 169 ka pinulongan. Unsa kining mensahea? Ug sa unsang paagi kini ipaabot?
2 Ang mensahe maoy bahin sa gugma sa silingan. Makaplagan kini diha sa Kingdom News No. 35, nga nag-ulohang “Maghigugmaay Pa Kaha ang Tanang Tawo sa Usag Usa?” Kini nga Kingdom News sa mubo magtuki sa presenteng mga kalihokan sa tibuok kalibotan, magpakita nga ang kakulang sa gugma taliwala sa mga tawo maoy hinungdan sa hilabihang kaguol ug kasakit. Magsaysay kini kon ngano, sa atong adlaw ilabina, nga ang gugma sa silingan nabugnaw ug kon unsay ipasabot niini sa umaabot.
3 Sa samang panahon, ang Kingdom News No. 35 magpakita nga ang tinuod nga gugma sa silingan nagalungtad taliwala sa mga minilyon nga nagkinabuhi sa kalibotan karon. Nagapaila kini niadtong nagapakig-ambit sa pagpabuhi sa unang-siglong pagsimba, nga nailhan sa gugma sa silingan sumala sa gitudlo ni Jesu-Kristo.—Luc. 10:25-37.
4 Ang Kingdom News No. 35 nagatiklop uban ang pagpatin-aw kon sa unsang paagi ang tibuok kalibotan sa katawhan sa dili madugay magtuman sa gugma sa silingan ilalom sa administrasyon sa Gingharian sa Diyos pinaagi ni Kristo. Kadtong magabasa niining mensahea gidasig sa pagbaton sa brosyur nga Unsay Gikinahanglan sa Diyos Kanato? ug mokat-on kon sa unsang paagi mahimong bahin niining tibuok-kalibotang mahigugmaong kahikayan nga detalyadong gihubit diha sa Pulong sa Diyos.
5 Kinsay Mohatob Niining Mensahea? Ang mga Saksi ni Jehova sa tibuok kalibotan ang mopaambit niining mensahea sa gugma sa silingan ngadto sa ilang mga kaila, mga silingan, ug mga partidos sa mga bulan sa Oktubre ug Nobyembre. Ang tanang kuwalipikado gidasig sa pagpakig-ambit diha sa publikong pagpang-apod-apod sa Kingdom News No. 35.
6 Ang kataposang tumong niining kampanyaha mao ang pagpasibot sa interes sa mga tawo sa pagdawat ug pagtuon sa Bibliya diha sa Gikinahanglan nga brosyur o kaha sa Kahibalo nga libro. Dugang pa, ang kinasingkasing nga paningkamot sa bahin sa matag usa sa mga alagad ni Jehova magpatunghag dakong pamatuod ngadto sa Diyos sa gugma, si Jehova, ug ngadto sa iyang Anak, si Jesu-Kristo.