Unsaon Mo Pagsupil ang Pagkawalay-Pagtagad?
1 Ang pagkawalay-pagtagad maoy kakulang sa pagbati o emosyon, pagkawalay-interes o kabalaka. Usa kini sa mas komon ug mas lisod nga mga tinamdan nga atong masagubang diha sa ministeryo. Unsaon mo kini pagsupil? Kini ba nagpahinay kanimo diha sa imong ministeryo? Unsaon mo kini pagbuntog aron maabot ang mga tawo sa mensahe sa Gingharian?
2 Una, tinoa kon nganong walay pagtagad ang mga tawo sa inyong teritoryo. Tungod ba kini kay sila nahigawad sa ilang politikal ug relihiyosong mga pangulo? Mibati ba silang wala na ing kasulbaran ang mga sulirang ilang ginaatubang? Sila ba nagduhaduha bahin sa mga saad sa mas maayong mga kahimtang? Sila ba di-mahinangop sa paghunahuna maylabot sa espirituwal nga mga butang gawas kon ilang makita ang dihadihang mabatonang mga kaayohan?
3 Ipasiugba ang Paglaom sa Gingharian: Walay suliran nga dili masulbad sa Gingharian. Busa kon atong mabuhat kana, kita kinahanglang mosulti bahin sa mga saad sa Gingharian, nga magpunting sa pangunang mga pulong sa Kasulatan, bisan kon dili posible o praktikal ang pagpakitag usa ka teksto sa Bibliya. (Heb. 4:12) Bisan pa niana, sa unsang paagi atong madala ang panaghisgot ngadto nianang puntoha?
4 Kinahanglang masabtan sa mga tawo ang katuyoan sa atong duaw. Kinahanglang maamgohan nilang miduaw kita tungod sa gugma sa silingan ug kabalaka sa komunidad. Makasukna kitag maayong-pagkabalay nga pangutana sama sa, “Sa imong hunahuna unsay sulbad sa [usa ka suliran nga nagaapektar sa komunidad]?” Kon ang usa ka paagi dili mosaler, sulayi ang lain.
5 Sa usa ka dato kaayong teritoryo diin ang mga tagbalay walay pagtagad sa mensahe sa Gingharian, ang mga magmamantala naningkamot sa paggamit ug pasiuna nga makapainteres. Sa dihang nagtanyag sa Kahibalo nga libro, usa ka magtiayon misulay niini nga pasiuna: “Mibati ka ba nga ang maayong edukasyon bililhon sa kalamposan diha sa kalibotan karong adlawa? Mouyon ka ba nga ang maayong edukasyon maglakip sa kahibalo sa Bibliya?” Sa usa ka hapon nakapahiluna silag tulo ka libro, usa niana maoy uban sa usa ka babaye nga sa ulahi miingon nga iya nang nabasa ang tibuok nga librong Kahibalo ug miuyon sa usa ka pagtuon sa Bibliya.
6 Sa dihang masagubang mo ang pagkawalay-pagtagad, sulayi ang laing mga paagi, isukna ang makapalihok-hunahunang mga pangutana, ug gamita ang gahom sa Pulong sa Diyos. Hayan sa ingon makaarang ka sa pagtabang sa uban sa pagdawat sa atong kahibulongang paglaom sa Gingharian.