Usa ka Duaw nga Mahimong Usa ka Panalangin
1 Maoy uban ang kalipay nga gidawat ni Zaqueo si Jesus ingong dinapit sa iyang balay. Ug pagkadakong panalangin ang nahimo sa maong duaw!—Luc. 19:2-9.
2 Karong adlawa, ingong Ulo sa kongregasyon, si Jesu-Kristo nagsugo sa mga ansiyano nga ‘magpastol sa panon sa Diyos.’ (1 Ped. 5:2, 3; Juan 21:15-17) Dugang pa sa pagtudlo diha sa mga tigom ug pagpanguna sa pag-alagad sa kanataran, ang mga magtatan-aw sa kongregasyon nagataganag mahigugmaon, personal nga tabang sa indibiduwal nga mga membro sa kongregasyon. Busa, sa popanahon makadahom ka nga makadawat ug personal nga pagtagad gikan sa mga ansiyano, sa imong balay man, sa Kingdom Hall, samtang duyog nga nagaalagad sa kanataran, o sa ubang mga okasyon. Kinahanglan bang mobati ka ug kahadlok sa mga duaw sa mga ansiyano? Dili gayod. Ang ilang pagduaw kanimo wala magkahulogan nga ikaw napakyas sa pipila ka paagi. Nan, unsay katuyoan sa duaw sa pagkamagbalantay?
3 Si Pablo miingon nga buot niyang moduaw sa mga igsoon “aron tan-awon kon naunsa na sila.” (Buh. 15:36) Oo, ingong mahigugmaong mga magbalantay, ang mga ansiyano interesado kaayo sa imong kahimtang. Buot nilang motanyag ug espirituwal nga tabang nga mahimong makatabang ug makapalig-on kanimo. Ang maong personal nga pag-atiman maoy gusto sa atong mahigugmaong Magbalantay si Jehova nga mabatonan natong tanan.—Ezeq. 34:11.
4 Kahinangpi ang mga Duaw sa mga Ansiyano: Ang tumong ni Pablo sa pagduaw sa iyang mga igsoon mao ang ‘paghatag kanilag espirituwal nga gasa aron nga sila lig-on, ug nga aduna untay pagdinasigay.’ (Roma 1:11, 12) Kitang tanan nagkinahanglan ug espirituwal nga pagdasig niining malisod nga kataposang mga adlaw, ug nagakinahanglan kitag tabang sa pagpadayong malig-on sa pagtuo. Ang imong positibong pagsanong sa duaw sa pagkamagbalantay sa walay duhaduha moresulta sa maayong pagbayloay ug pagpalig-on.
5 Pabilhi ang daghang kaayohan nga makuha gikan sa buluhaton sa pagkamagbalantay sa mga ansiyano. Kon adunay pipila ka butang o usa ka gumonhap nga bahin niana ikaw nabalaka, hinumdomi nga ang mga ansiyano anaa sa kongregasyon sa pagtabang. Ayaw pagpanuko sa pagpakighisgot uban kanila sa bisan unsang mga butang nga tingali makaapektar sa imong espirituwal nga kaayohan. Pabilhi kining mahigugmaong kahikayan ni Jehova, ug pagmaya diha sa mga panalangin nga ipatungha sa maong duaw.