Mga Magtatan-aw nga Nagapanguna​—Ang Sekretaryo

¹ Ang sekretaryo sa kongregasyon nagdulag hinungdanong papel sa pagseguro nga “ipahinabo ang tanang butang nga may kahapsay ug pinaagig kahikayan.” (1 Cor. 14:40) Ingong membro sa Komite sa Pag-alagad sa Kongregasyon, iyang ginaatiman ang mga komunikasyon ug hinungdanong mga rekord sa kongregasyon. Bisan tuod ang iyang mga katungdanan dili tingali himatikdan sa matag usa sama nianang sa ubang mga ansiyano, ang iyang mga serbisyo gikinahanglan ug gipabilhan pag-ayo.

² Sa dihang madawat ang sulat gikan sa Sosyedad o sa uban, atimanon kini sa sekretaryo ug tinoon nga ang balos mahimo kon gikinahanglan. Tinoon niya nga ang mga sulat nga madawat ipasa taliwala sa mga ansiyano ug dayon ipayl kini alang sa reperensiya. Iyang susihon ang mga porma sa order sa magasin ug literatura ug ipadala kini ngadto sa Sosyedad. Siya ang laktod nga magdumala niadtong nag-atiman sa mga kuwenta ug mga suskrisyon maingon man sa tanang butang maylabot sa kombensiyon.

³ Sanglit ang sekretaryo kinahanglang mopadala sa binulang taho sa pag-alagad sa kanataran sa kongregasyon ngadto sa Sosyedad sa ika-sayis sa bulan, gikinahanglan nga kitang tanan motaho dayon sa atong kalihokan sa kanataran sa kataposan sa matag bulan. Dayon iyang itala ang mga taho sa pag-alagad diha sa Congregation’s Publisher Record nga mga kard. Ang bisan kinsang magmamantala mahimong mohangyo nga motan-aw sa iyang personal nga rekord sa binuhatan.

⁴ Sa dihang ang magmamantala mosulod o mobalhin ug kongregasyon, ang sekretaryo mohangyo gikan sa o mopadala ngadto sa mga ansiyano sa laing kongregasyon ug usa ka sulat sa pagpailaila uban sa Congregation’s Publisher Record nga kard sa maong magmamantala.​—Atong Ministeryo, p. 104-5.

⁵ Repasohon sa sekretaryo ang kalihokan sa mga payunir, magtino nga ang mga ansiyano, ug ilabina ang magtatan-aw sa pag-alagad, mapahibalo sa bisan unsang mga suliran nga tingali nasugamak sa mga payunir. Ipakisayod niya sa mga konduktor sa Pagtuon sa Libro sa Kongregasyon ang mga magmamantala nga di-makanunayon sa pag-alagad sa kanataran. Ang sekretaryo ug ang magtatan-aw sa pag-alagad manguna sa pagpaangay sa mga panlimbasog sa pag-atiman sa mga di-aktibo.​—Atong Ministeryo sa Gingharian, Disyembre 1987, p. 1.

⁶ Kay nakabaton ug mas maayong pagpabili sa mga katungdanan sa sekretaryo, hinaot nga atong buhaton ang atong maarangan sa pagtabang nga himoon ang iyang pagkatinugyanan nga mas sayon alang kaniya sa pagtuman.​—1 Cor. 4:2.