Kinahanglan Kitang Moduaw nga Masubsob

¹ Ikaw ba misanong nga mauyonon sa unang higayon nga may usang nakigsulti nimo bahin sa maayong balita? Kon wala, angay kang magpasalamat nga ang mga Saksi ni Jehova miduaw nga masubsob hangtod nga ikaw sa kataposan midawat sa tanyag sa usa ka pagtuon sa Bibliya. Maayong hunahunaon kana sa dihang ikaw subsob nga mobuhat sa imong gitudlong teritoryo.

² Ang kinabuhi sa mga tawo kanunayng nag-usab-usab. Moatubang silag bag-ong mga suliran o mga kahimtang, makadungog ug makapasamok nga mga hitabo sa katilingban o sa kalibotan, mag-antos ug mga kalisod sa ekonomiya, o makasinatig sakit o kamatayon diha sa pamilya. Ang maong mga butang tingali magpahimo nila nga gustong masayod sa rason niini nga mga kagul-anan. Kinahanglang atong masabtan ang mga hinungdan nga nakapasamok sa mga hunahuna sa mga tawo ug dayon mosanong uban ang makapahupay nga mensahe.

³ Kini Maoy Usa ka Pagluwas nga Buluhaton: Hunahunaa ang mga tigluwas diha sa lugar nga may katalagman. Bisan tuod ang uban tingali nagapangita diha sa dapit diin diyutay ra ang mga nakaplagang nangabuhi, dili sila maglangaylangay ug moundang tungod kay ang ilang mga isigkamagbubuhat nakakaplag ug mas pang nangabuhi sa ubang dapit. Ang atong buluhaton sa pagluwas wala pa matapos. Matag tuig, ginatos ka libo nga gustong makalabang-buhi “sa dakong kasakitan” ang nakaplagan.​—Pin. 7:9, 14.

⁴ “Ang tanang nanagtawag sa ngalan ni Jehova mamaluwas.” (Roma 10:13-15) Kining mga pulonga angayng matisok diha sa matag usa kanato bahin sa panginahanglan sa paglahutay diha sa pagsangyaw. Sukad nga ang atong teritoryo unang gisugdan sa pagkobre, ang mga bata nanagko na ug karon igo na ang pangedaron sa paghunahunang seryoso alang sa ilang kaugalingon bahin sa ilang kaugmaon ug sa katuyoan sa kinabuhi. Dili kita makahimo sa pagkasayod kon kinsa ang maminaw sa kataposan. (Eccl. 11:6) Daghang magsusupak kanhi ang midawat sa kamatuoran. Ang atong trabaho maoy, dili sa paghukom sa mga tawo, apan sa padayong paghatag kanilag kahigayonan sa pagkadungog ug maluwas gikan niining daang kalibotan. Sama sa gibuhat sa unang mga tinun-an ni Jesus, kita kinahanglang “umadto nga mapadayonon” ngadto sa mga tawo ug sulayan nga pukawon ang ilang kaikag sa mensahe sa Gingharian.​—Mat. 10:6, 7.

⁵ Ang kamatuoran nga ang dalan bukas pa gihapon alang kanato sa pagsangyaw maoy usa ka kapahayagan sa kaluoy ni Jehova. (2 Ped. 3:9) Samtang atong tugotan ang uban sa pagkadungog sa mensahe nga masubsob, atong ginatuboy ang gugma sa Diyos, ug niining paagiha kita nagadayeg kaniya.