Gamitag Maayo ang Daandaang mga Libro
1 Ang tawo nagtipig ug milyonmilyong karaang mga libro diha sa mga librarya sa tibuok yuta. Apan, unsang walay kataposang kaayohan ang nahatag niini sa tawhanong rasa? (Eccl. 12:12) Ang mas dakog bili mao ang mga publikasyon nga nagpunting sa Gingharian sa Diyos ug kon unsay himoon niini alang sa katawhan. Kadaghanang kongregasyon adunay estak sa maong nagkalainlaing mga libro nga napatik una pa sa 1985. Sulod sa Enero atong itanyag kining daandaang mga libro ngadto sa publiko, ilabinang ipasiugda ang librong Nahiusa sa Pagsimba ug ang gamay nga edisyon sa librong Mabuhing Walay Kataposan.
2 Kini Adunay Tinuod nga Bili: Samtang ang pipila kanato tingali mobati nga kining mga libroha dili na haom-sa-panahon kon itandi sa atong bobag-o nga mga publikasyon, angay natong hinumdoman nga kini nasudlan sa Kasulatanhong kamatuoran. Ang mensahe sa Gingharian nga gipatin-aw niini hinungdanon gihapon karon ug, kon pagasundon, makaluwas ug kinabuhi. (Juan 17:3) Busa, kita kinahanglang mohimog dugang paningkamot sa paggamit ug maayo niining daandaang mga libro.
3 Sa pagpasiugda sa bili niini mao ang kasinatian sa usa ka babaye kinsa nakapanunod sa pipila ka daandaang mga publikasyon sa Watch Tower gikan sa iyang apohang babaye. Ang usa ka Saksi nangutana sa babaye kon nakahibalo ba siya sa tinuod nga bili sa maong mga publikasyon. Ang babaye mitubag: “Wala ako mahibalo sa bili niini, apan unsaon ko sa pagkasayod?” Ang babaye midawat ug usa ka pagtuon sa Bibliya, nakadangat sa kamatuoran, ug human niadto gipabilhan ang librarya sa iyang apohang babaye. Napamatud-ang pagkabililhong panulondon kadtong koleksiyona sa daandaang mga libro!
4 Ipakaylap Kini: Dugang pa sa pagtanyag sa daandaang mga libro sa pamalaybalay, paneguroang itanyag kini sa dihang maghimog mga pagbalikduaw sa mga tawo nga imong nahibaloang nagpahimulos sa pagbasa sa atong mga publikasyon, apil kadtong nagsuskribir sa Ang Bantayanang Torre ug Pagmata! ug kadtong anaa sa imong ruta sa magasin. Alang niadtong nagatuon sa Bibliya uban nimo, ang piniling daandaang mga libro makataganag pasiunang kahibalo nga magpalapad sa ilang pagsabot sa kamatuoran. Ayawg kalimti ang pagbaton ug bisan unsa sa daandaang mga libro nga wala ka ing personal nga koleksiyon, ilabina sa mga librong Nahiusa sa Pagsimba ug Mabuhing Walay Kataposan. Niining paagiha, modako ang imong bililhong teokratikanhong librarya, nga magamit sa pagpalambo sa imong mga yugto sa personal nga pagtuon.
5 Inay kay ipondo ang atong daandaang mga libro sa tipiganan, gamiton nato kinig maayo sa pagdasig sa mga tawo nga atong mahibalag sa “pagkahadlok sa matuod nga Diyos ug sa pagbantay sa iyang mga sugo.”—Eccl. 12:13.