Kon Unsaon nga Magbuliganay ang mga Membro sa Banay Alang sa Bug-os nga Pakig-ambit​—Diha sa mga Tigom sa Kongregasyon

¹ Ang Kristohanong mga banay angayng magpatalinghog sa sugo nga magtigom diha sa mga tigom sa kongregasyon. (Heb. 10:24, 25) Pinaagig maayong pagbuliganay, ang tanan mahimong molampos sa pagpangandam alang sa, pagtambong, ug pagpakig-ambit diha sa mga tigom. Ang mga kahimtang sa banay nagkalahi, apan adunay mga butang nga ang Kristohanong bana, ang magtutuong asawa, o ang nag-inusarang ginikanan makahimo sa pagpalambo sa panaghiusa sa banay diha sa espirituwal nga mga butang, bisan pa sa gidaghanon sa mga anak diha sa panimalay ug sa ilang mga edad.​—Prov. 1:8.

² Paggahin ug Panahon nga Mangandam: Ang mga membro sa banay magbuliganay sa pagtino nga ang matag usa hustong nakaandam alang sa mga tigom sa kongregasyon. Daghan ang nagatagad sa artikulo alang sa senemanang Pagtuon sa Bantayanang Torre nga duyog. Ang uban nagaandam alang sa Pagtuon sa Libro sa Kongregasyon o nagabasa sa senemanang pagbasa sa Bibliya ingong pamilya. Ang tumong mao ang pagbaton sa pangunang mga puntos diha sa hunahuna sa dili pa motambong sa mga tigom. Nianang paagiha, ang tanan makabenepisyog dugang gikan sa nadunggan ug masangkapan sa pagpakig-ambit sa dihang adunay kahigayonan.​—1 Tim. 4:​15.

³ Planoha nga Moambit: Ang tanan diha sa banay kinahanglang magbaton ug tumong sa pagpahayag sa iyang paglaom atubangan sa uban pinaagi sa pagkomento sa mga tigom. (Heb. 10:23) Ang usa ba ka membro sa banay nagkinahanglag tabang o pagdasig sa pagbuhat niini? Unsang tabang ang gikinahanglan sa matag usa sa pag-andam sa mga asaynment alang sa Tunghaan sa Teokratikanhong Ministeryo? Ginapabilhan kana sa mga asawa sa dihang ang ilang mga bana magpakitag interes ug tingali motanyag ug ideya alang sa haom nga ilustrasyon o praktikal nga kahimtang. Dili kinahanglang bation sa mga ginikanan nga ila gayong andamon ang mga bahin sa ilang batan-ong mga anak. Ang pagbuhat sa ingon makapukgo sa panlimbasog sa mga bata. Apan ang mga ginikanan makatabang sa ilang batan-ong mga anak ug maminaw samtang sila makusog nga nagaensayo.​—Efe. 6:4.

⁴ Pag-organisar Aron Motambong: Ang mga bata mahimong tudloan gikan sa sayong edad nga magsinina ug mag-andam aron makagikan alang sa tigom sa gikatudlong oras. Ang mga membro sa banay kinahanglang magbuliganay sa pag-atiman sa mga buluhaton sa balay aron walay mga pagkalangan.​—Tan-awa ang mga sugyot diha sa mga librong Kalipay sa Pamilya, panid 112, ug Gisukna sa mga Batan-on, mga panid 316​-17.

⁵ Ang mga ginikanan ug mga anak managsamang makapamalandong sa mga pulong ni Josue kaniadto, nga miingon: “Alang kanako ug sa akong panimalay, kami mag-alagad kang Jehova.” Nan magmadeterminado nga magbuliganay alang sa bug-os nga pakig-ambit diha sa mga tigom sa kongregasyon.​—Jos. 24:15.