Kalibotanong Edukasyon ug ang Imong Espirituwal nga mga Tumong
1 Ang pagbaton ug usa ka maayong pasukaranang edukasyon sa panahong ikaw batan-on magtaganag akademikong mga katakos nga gikinahanglan nimo sa maayong pagbasa ug pagsulat ug sa pagkuhag katibuk-ang pagsabot sa geograpiya, kasaysayan, matematika, ug siyensiya. Ngadtongadto, ikaw makakat-on kon unsaon sa paghunahunang tin-aw, pagtimbangtimbang sa mga kamatuoran, pagsulbad sa mga suliran, ug pagmugnag mabungahong mga ideya. Ang maong pagtungha magmapuslanon kanimo sa tibuok mong kinabuhi. Sa unsang paagi ang imong kalibotanong edukasyon maglangkit sa imong espirituwal nga mga tumong sa kinabuhi ug magtabang kanimo sa pagbaton ug “praktikal nga kaalam ug katakos sa panghunahuna”?—Prov. 3:21, 22.
2 Magmapuslanon Diha sa Pag-alagad sa Diyos: Samtang ikaw anaa sa eskuylahan, pamati sa klase ug buhatag maayo ang imong homwork nga mga asaynment. Kon imong mahanas ang maayong pagbasa ug mga batasan sa pagtuon, ikaw mas daling makasusi sa Pulong sa Diyos ug makapabiling malig-on sa espirituwal sa imong kaugalingon. (Buh. 17:11) Ang malangkobong kahibalo motabang kanimong makiglabot sa mga tawo sa lainlaing mga kagikan, mga interes, ug mga tinuohan sa dihang imong mahibalag sila sa ministeryo. Ang edukasyon nga imong mabatonan sa eskuylahan magmapuslanon samtang nagatuman ka sa imong Kristohanong mga responsabilidad diha sa organisasyon sa Diyos.—Itandi ang 2 Timoteo 2:21; 4:11.
3 Kat-oni ang Pagbuhi sa Imong Kaugalingon: Kon maningkamot ka, ikaw makakat-on usab sa mga kahanas nga gikinahanglan sa pagpangitag pangabuhi human sa graduwasyon. (Itandi ang 1 Timoteo 5:8.) Piliag maayo ang imong mga subject. Inay nga isentro diha sa natad nga limitado ang mga kahigayonan sa trabaho, tagda ang pagkat-on ug trabaho o kahanas nga magpaarang nimo sa pagkaplag ug angayng trabaho bisan diin. (Prov. 22:29) Ang maong pagbansay magpaposible kanimo sa pagsuportar sa imong kaugalingon kon ikaw mohukom sa pag-alagad sa dapit nga mas dako ang panginahanglan.—Itandi ang Buhat 18:1-4.
4 Ang pagkuhag maayong paninugdang edukasyon samtang nagtungha makatabang kanimo sa pagpalapad sa imong ministeryo. Panikaysikay sa paghupot ug mga kahanas nga gikinahanglan sa pagbuhi sa imong kaugalingon samtang ikaw mouswag diha sa pag-alagad kang Jehova. Busa ang imong pagtungha moabag kanimo sa pagkab-ot sa imong espirituwal nga mga tumong.