Mga Ginikanan—Ihatag ang Maayong Panig-ingnan Alang sa Inyong mga Anak
1 Ang Pulong sa Diyos nagsulti kanato nga “ang amahan [ug ang inahan] sa matarong magmalipayon gayod.” (Prov. 23:24, 25) Pagkadakong panalangin alang sa mga ginikanan nga naghatag ug maayong panig-ingnan alang sa ilang mga anak! Usa ka membro sa Komite sa Sanga miingon bahin sa iyang mga ginikanan: “Ang tibuok nilang kinabuhi nasentro sa kamatuoran, ug buot ko usab nga masentro niini ang akong tibuok kinabuhi.” Unsay angay nga makita sa mga anak diha sa ilang mga ginikanan?
2 Maayong Pamatasan ug Halalom nga Pagtahod: Maoy responsabilidad sa mga ginikanan ang pagsilsil sa maayong mga taras diha sa ilang mga anak. Ang maayong pamatasan makat-onan, dili lamang pinaagi sa binaba nga instruksiyon, kondili pinaagi sa pagpaniid ug pagsundog. Busa, unsang pamatasan ang inyong gipakita? Ang inyo bang mga anak makadungog kaninyo nga moingong “tabi una,” “palihog,” ug “salamat”? Diha sa pamilya, kamo ba nagatamdanay sa usag usa uban ang halalom nga pagtahod? Kamo ba mamati sa dihang ang uban mosulti? Kamo ba maminaw sa dihang ang inyong mga anak mosulti kaninyo? Kini bang maayong mga kinaiya gipasundayag diha sa Kingdom Hall ug sa pribadong puy-anan?
3 Lig-ong Espirituwalidad ug Masibotong Kalihokan: Usa ka igsoong lalaki nga migugol ug kapin sa 50 ka tuig diha sa bug-os-panahong pag-alagad naghinumdom: “Ang akong inahan ug amahan maoy talagsaong panig-ingnan sa ilang pagpabili sa mga tigom ug sa ilang kasibot sa ministeryo.” Unsaon ninyo sa pagpasundayag sa inyong mga anak nga kamo nabalaka bahin sa pagmentinar sa espirituwalidad niadtong anaa sa inyong panimalay? Duyog ba ninyong gitagad ang inadlawng teksto? Kamo ba adunay regular nga pagtuon sa pamilya? Makita ba sa inyong mga anak nga kamo nagabasa sa Bibliya ug sa mga publikasyon sa Sosyedad? Unsay ilang madungog sa dihang kamo mag-ampo alang sa pamilya? Kamo ba mosalmot sa makapalig-ong espirituwal nga panaghisgot uban sa inyong mga anak, nga maghisgot sa positibong mga butang bahin sa kamatuoran ug sa kongregasyon? Maikagon ba kamo sa pagtambong sa tanang tigom ug sa pagpakig-ambit diha sa ministeryo sa kanataran ingong usa ka pamilya?
4 Mga ginikanan, ipabanaag ang panig-ingnan nga inyong ginahatag alang sa inyong mga anak. Himoa kana nga maayo kaayo, ug ilang pabilhan kana sa tibuok nilang mga kinabuhi. Usa ka asawa sa nagapanawng magtatan-aw, nga anaa karon sa iyang 70 nga mga anyos nga kagulangon, miingon: “Ako nagapahimulos gihapon gikan sa maayong panig-ingnan sa akong mahigugmaong Kristohanong mga ginikanan. Ug maoy akong mainitong pag-ampo nga akong pamatud-an ang akong bug-os nga pagpabili niini nga panulondon pinaagi sa paggamit niini sa hustong paagi latas sa tanang umaabot nga panahon.”