Unsay Imong Isulti Ngadto sa Usa ka Hindu?
1 Sumala sa imo tingaling nahibaloan, adunay daghang Hindu nga nagpuyo sa lainlaing kayutaan, apil kining nasora. Kini nagpasabot nga sa ngadtongadto ikaw hayan makahibalag ug usa ka Hindu sa lakat sa imong ministeryo. Sa dihang imong mahibalag, unsaon man nimo pagdumala ang maong duaw?
2 Hinumdomi Kini nga mga Puntos: Ang mga misyonaryo nga nagmalamposon sa pagsangyaw sa mga Hindu nag-ingon nga wala kinahanglana ang paghimog lalom nga pagtuon sa Hinduismo aron makahatag ug epektibong pagsangyaw. Ang yano, mataktikanhong presentasyon sa kamatuoran kasagaran mopatunghag positibong sanong. Mohangyo nga makigsulti una sa ulo sa panimalay. Kon ang iyang sanong mauyonon, mas madali ang pagsangyaw ngadto sa ubang mga membro sa pamilya. Sa pagsugod likayi ang pag-ingon nga ikaw nagdalag usa ka mensahe nga mas labaw kay sa gituohan sa tagbalay o nga buot nimong hisgotan ang bugtong matuod nga Diyos o ang labing karaan nga sagradong mga sinulat. Sanglit daghang Hindu ang nag-isip sa Bibliya nga usa ka libro sa Kasadpan, ikaw makawagtang sa pagpihigpihig pinaagi sa pagpatin-aw nga kini wala magpasiugdag kolonyalismo o pagkalabaw sa usa ka rasa kay sa lain.
3 Gamita ang Hustong mga Himan: Duha ka brosyur ang giandam sa linain nga anaa sa hunahuna ang mga Hindu. Kini mao: Why Should We Worship God in Love and Truth? ug Our Problems—Who Will Help Us Solve Them? Ang duha mabatonan sa Iningles. Ang mga brosyur nga “Tan-awa! Ginabag-o Ko ang Tanang Butang” ug Tinuod Bang May Pagtagad ang Diyos Kanato? napamatud-an usab nga epektibo sa dihang magsangyaw ngadto kanilang may Hindu nga kagikan. Ang Gikinahanglan nga brosyur ug ang Kahibalo nga libro magamit nga malamposon sa pagdumalag mga pagtuon sa Bibliya.
4 Paghimog Puntong Giuyonan: Dili lisod ang pagpangitag punto nga giuyonan uban sa mga Hindu. Sila nagtuo nga kita nagpuyo sa panahon sa dihang ang pagkadaotan dagsang kaayo ug nga ang Diyos maghinlo sa kalibotan sa mga suliran niini pinaagig usa ka dakong katalagman nga sundan sa usa ka panahon sa kamatuoran. Imong makita kon unsa ka dali kini nga mga pagtulon-ana ikalangkit ngadto sa mga pagtulon-an sa Bibliya bahin sa kataposang mga adlaw, sa dakong kasakitan, ug sa umaabot nga bag-ong kalibotan. Sanglit kadaghanang Hindu naglantaw sa kinabuhi ingong usa ka serye sa mga suliran nga wala ing mga solusyon, sila interesado sa mga topiko sa pamilyahanong kinabuhi, krimen ug pagkahilwas, ug kon unsay mahitabo inigkamatay. Ania ang duha ka panig-ingnan nga mahimo nimong sulayan.
5 Kini hayan magpainteres sa usa ka tawo nga may pamilya:
◼ “Ako nagaduaw sa mga tawo nga nabalaka bahin sa kahimtang sa kinabuhi sa pamilya diha sa daghang kayutaan karon. Unsa sa imong hunahuna ang motabang sa pamilya nga maghiusa kanunay? [Tugoting motubag.] Ang pipila ka tawo nahibalo kon unsay giingon sa kasulatan sa Hindu bahin sa pamilya, apan wala gayod sila makahigayon sa pagtandi niini kon unsay gisulti sa Bibliya maylabot sa maong ulohan. Buot kong ipaambit kanimo kining puntoha diha sa Colosas 3:12-14.” Human mabasa ang kasulatan, ipakita sa tagbalay ang kapitulo 15 sa librong Kahibalo ug moingon: “Malipay ako sa paggugol ug diyutayng panahon sa pagbasa niining kapituloha uban nimo.”
6 Usa ka batan-on tingali mosanong niini:
◼ “Walay duhaduha ikaw nagtuo sa Diyos. Unsa sa imong hunahuna ang katuyoan sa Diyos alang kanato?” Tugoting motubag. Dayon basaha ang Genesis 1:28, ug moingon: “Sa daghang dapit ang yuta adunay sobrang namuyo ug gihampak sa mga suliran. Naghunahuna ka ba nga ang Maglalalang andam nga motabang sa pagsulbad sa atong mga suliran?” Human madungog ang sanong, dad-a ngadto sa haom nga publikasyon.
7 Magkalipay sa Positibong mga Resulta: Usa ka 22-anyos-edad nga lalaking Hindu miduol sa usa ka igsoong babaye nga nagsangyaw sa tiyanggihan ug mihangyo ug usa ka pagtuon sa Bibliya. Iyang gipatin-aw sa igsoong babaye nga walo ka tuig ang milabay iyang nadunggan ang panaghisgot sa Bibliya tali sa iyang inahan ug kaniya. Bisan pag siya nakadayeg sa praktikal nga mga tubag sa Bibliya sa mga suliran sa katawhan, ang iyang inahan dili interesado ug siya mibati nga siya bata pa kaayo nga mangagpas sa kamatuoran sa iyang kaugalingon. Karon ingong usa ka hamtong, siya buot nga mokat-on ug dugang pa. Ang batan-ong lalaki wala mag-usik ug panahon. Sulod lamang sa 23 ka adlaw, iyang nahuman ang pagtuon sa librong Kahibalo, ug upat ka bulan lang human nga iyang nahibalag ang igsoong babaye didto sa tiyanggihan, siya mihangyo nga magpabawtismo!
8 Gisugdan sa usa ka igsoong lalaki ang pagtuon sa tawong Hindu nga iyang nahibalag sa tren. Ang tawo nakasinatig mga suliran sa iyang kaminyoon. Siya usab adunay suliran sa pag-inom ug makahubog nga ilimnon. Ang tawo miuyon nga duawon siya sa Saksi ug ipaambit ang tambag sa Bibliya bahin sa pamilyahanong kinabuhi. Ang moral nga mga pagtulon-an sa Bibliya nakadani kaniya, ug siya miuyon sa usa ka pagtuon sa Bibliya. Siya ug ang iyang pamilya misugod sa duyog nga pagtambong sa mga tigom . Sa ulahi ilang gipaambit ang kamatuoran sa mga higala ug mga paryente. Sa pagkakaron, unom niining mga tawhana ang midawat sa kamatuoran!
9 Ang kabubut-on sa Diyos mao nga ang “tanang matang sa mga tawo maluwas ug makadangat sa tukmang kahibalo sa kamatuoran.” (1 Tim. 2:4) Kana naglakip sa mga lalaki ug mga babaye nga adunay di-Kristohanong relihiyon, sama sa Hinduismo. Kon adunay mga Hindu sa inyong teritoryo, nganong dili duawon sila gilayon ug gamiton ang pipila sa mga sugyot nga gipresentar niini nga artikulo?