Tipigi
Imo Bang Gigamit Kini nga mga Brosyur?
Ang Bibliya—Unsay Mensahe Niini?
Gidisenyo aron mainteres kadtong wala kaayoy kahibalo sa Bibliya, ilabina ang mga dili Kristohanon
Kon unsaon kini pagtanyag: “Gusto namong mahibaloan ang imong opinyon sa giingon dinhi sa Kasulatan (o niining balaang basahon). [Basaha ang Salmo 37:11, nga gihisgotan sa seksiyon 11.] Sa imong hunahuna, maunsa kaha ang yuta kon matuman na kining tagnaa? [Patubaga.] Kini maoy usa ka pananglitan sa paglaom ug kahupayan nga mapahimuslan sa mga tawo, bisag unsa pay ilang kultura ug tinuohan.” Basaha ang parapo sa ibabawng bahin sa panid 3 ug itanyag ang brosyur.
Sulayi kini: Kon nagdumala kag pagtuon ginamit ang librong Gitudlo sa Bibliya uban sa usa ka dili Kristohanon, paggahig pipila ka minuto sa dili pa o human magtuon aron hisgotan ang usa ka seksiyon niini nga brosyur aron mahatagan siyag ideya bahin sa Bibliya.
Usa ka Basahon Alang sa Tanang Tawo
Gidisenyo aron mainteres ang edukadong mga tawo nga wala kaayoy kahibalo bahin sa Bibliya
Kon unsaon kini pagtanyag: Basaha ang 2 Timoteo 3:16, 17. Dayon isulti kini: “Mouyon ka ba nga ang Bibliya inspirado sa Diyos? O para nimo usa lang kini ka maayong basahon? [Patubaga.] Lainlaig opinyon ang mga tawo bahin niini, apan among nakita nga diyutay ra ang nagsusi sa Bibliya. [Basaha ang kasinatian ubos sa ulohan sa panid 3.] Gihisgotan niini nga brosyur kon nganong angayng susihon sa mga tawo ang Bibliya, bisag unsa pay ilang kagikan ug tinuohan.”
Sulayi kini: Kon dawaton sa tagbalay ang brosyur, isulti kini: “Gihunahuna sa daghang tawo nga dili na angayng basahon ang Bibliya kay ang gibuhat sa relihiyon sukwahi sa gitudlo sa Bibliya. Inigbalik nako, maghisgot kog usa ka pananglitan.” Inigbalik nimo, paghisgot ug pipila ka impormasyon sa panid 4-5.
Ikaw Mahimong Higala sa Diyos!
Gidisenyo aron mainteres kadtong limitadog edukasyon o dili kaayo makamaong mobasa
Kon unsaon kini pagtanyag: “Sa imong hunahuna, posible kahang mahimo tang higala sa Diyos? [Patubaga. Dayon basaha ang Santiago 2:23.] Kini nga brosyur gipatik aron matudloan ta kon sa unsang paagi mahimo tang higala sa Diyos, sama kang Abraham.”
Sulayi kini: Sa unang pagduaw o kaha sa imong pagbalik, ipasundayag ang usa ka pagtuon sa Bibliya. Mahimo ninyong hisgotan ang tibuok leksiyon 1 o ang bahin lang niini.
Makapatagbaw nga Kinabuhi—Kon Unsaon Pag-angkon Niini
Gidisenyo aron mainteres kadtong dili relihiyoso
Kon unsaon kini pagtanyag: “Miduaw mi kay daghan karon ang gustong makabatog malipayong kinabuhi. Apan kitang tanan may mga problema. Gani, magpatambag ta sa atong suod nga paryente o higala o magbasa tag mga basahon diha sa librarya o sa Internet. Sa imong hunahuna, asa kaha ta makakitag kasaligang tambag? [Patubaga.] Wala magdahom ang uban nga praktikal diay ang tambag sa Bibliya. Aniay pananglitan. [Ipakita sa tagbalay ang kapitulo 2, ug basaha ang usa sa gikutlo nga mga teksto.] Kini nga brosyur gipatik aron ta mahibalo kon sa unsang paagi kita makapahimulos ug malipayong kinabuhi.”
Sulayi kini: Kon dawaton sa tagbalay ang brosyur, isulti kini: “Daghan konog sayop ang Bibliya. Sa akong pagbalik, ipakita nako ang usa ka pananglitan nga ang Bibliya tukma sa siyensiya. Tingali mainteres ka ini.” Inigbalik nimo, hisgoti ang parapo 4 diha sa panid 12.
The Origin of Life—Five Questions Worth Asking
Gidisenyo alang sa Kristohanong mga batan-on nga gitudloag ebolusyon diha sa eskuylahan ug magamit usab sa pagpangatarongan ngadto sa mga ebolusyonista, agnostiko, ug ateyista (Kini nga brosyur dili itanyag sa pagpamalaybalay.)
Kon unsaon kini paggamit sa dihang makigsulti sa usa ka ebolusyonista o ateyista: “Halos tanang basahon karon sa siyensiya nagtudlog ebolusyon. Sa imong hunahuna, teoriya lang ba ang ebolusyon o naestablisar na kini karon nga kamatuoran? [Patubaga.] Aron makahimog hustong desisyon, kinahanglang susihon nato ang tanang detalye. Gihisgotan niini nga brosyur ang mga ebidensiya nga nakakombinsir sa daghan nga ang kinabuhi gilalang.”
Sulayi kini: Inig-adto nimo sa eskuylahan, ibilin kini nga brosyur sa imong lingkoranan ug panid-i kon mainteres ba niini ang imong mga klasmet.
Why Should We Worship God in Love and Truth?
Gidisenyo aron mainteres ang mga Hindu
Kon unsaon kini pagtanyag: “Usa ka iladong pag-ampo sa mga taga-India nag-ingon: ‘Tultoli ako sa kamatuoran aron mahaw-as ako sa kabakakan. Gikan sa kangitngit, dad-a ako sa kahayag.’ Sa imong hunahuna, importante bang simbahon ang Diyos diha sa gugma ug kamatuoran? [Patubaga.] Matikdi ang giingon ni Jesus bahin niini.” Basaha ang Juan 4:24. Dayon basaha ang parapo 4 sa panid 3 ug itanyag ang brosyur.
Sulayi kini: Kon dawaton sa tagbalay ang brosyur, isulti kini: “Ang ubang maalamong mga Hindu nag-ingon nga ang kamatuoran anaa ra sa atong kasingkasing. Nag-ingon usab ang uban nga ang kamatuoran makita diha sa balaang kasulatan. Sa sunod, gusto nakong hisgotan nimo kining pangutana sa kataposan sa parapo 3, panid 4: ‘Asa nato makaplagan ang kamatuoran gikan sa Diyos?’”
The Pathway to Peace and Happiness
Gidisenyo aron mainteres ang mga Budhista
Kon unsaon kini pagtanyag ngadto sa edarang Budhista: “Tingali nabalaka pod ka nga daghan kaayong daotang ideya nga nakaimpluwensiya sa kabataan karon. Sa imong hunahuna, nganong misamot man ang imoralidad sa mga batan-on karon? [Patubaga.] Nahibalo ka ba nga gitagna na kini sa usa ka basahon nga dugay nang gisulat sa wala pa matukod ang mga relihiyon sa Hindu, Kristiyano, ug Muslim? [Basaha ang 2 Timoteo 3:1-3.] Di ba kining mga batasana anaa gihapon bisag nag-uswag ang edukasyon? [Basaha ang bersikulo 7.] Kining basahona nakatabang nako sa pagsabot sa mga kamatuoran nga wala makat-oni sa kadaghanan. Gusto ka bang mobasa ini?”
Sulayi kini: Sa sunod nga pagduaw, human mahaling ang interes sa tagbalay bahin sa Bibliya, ipakita kaniya ang mga pangutana sa likod nga hapin ug ang kupon para sa librong Gitudlo sa Bibliya. Ingna nga nagdala kag kopya niini kon gusto niya kining makita. Ipakita kaniya ang kaundan, ug hisgoti ang usa o duha ka parapo diha sa kapitulo nga iyang pilion.
Our Problems—Who Will Help Us Solve Them?
Gidisenyo aron mainteres ang mga Hindu
Kon unsaon kini pagtanyag: “Daghan ang naguol sa pagkadaotan nga ilang nakita sa kalibotan. Sa imong hunahuna, may adlaw ra kaha nga hanawon sa Diyos kining mga problemaha? [Patubaga.] Kining tagnaa makapahupay kanato. [Basaha ang Salmo 37:11.] Ang bag-o lang nakong gibasa maoy gikan sa Bibliya, usa ka libro nga sagad gisayop pagsabot ug wala ipadapat. Abi nimo ang Bibliya wala isulat para lang sa mga Amerikano. Wala usab ipasiugda niini ang kolonyalismo o ang pagkalabaw sa rasa sa usa ka tawo. Apan kini naghatag kanatog paglaom nga duol nang hanawon sa Diyos ang atong mga problema. May mga prinsipyo usab kini nga makatabang nato sa pagsagubang sa atong mga problema karon. Kini nga brosyur naghatag ug dugang nga impormasyon.”
Sulayi kini: Sa imong pagbalik, human mahaling ang interes sa tagbalay, ipakita kaniya ang mga hulagway sa panid 4-5 sa librong Gitudlo sa Bibliya. Pagbasag usa sa gikutlo nga mga teksto ug itanyag kini.
Will There Ever Be a World Without War?
Gidisenyo aron mainteres ang mga Hudiyo
Kon unsaon kini pagtanyag: “Sukad pa kaniadto, ang mga tawo grabeng nag-antos tungod sa gubat. Nganong duna gihapoy gubat bisag ang mga tawo gustog kalinaw? [Patubaga.] Makapahupay kanato kining tagna ni Isaias. [Basaha ang Isaias 2:4.] Apan makapangutana ta: Kanus-a ug sa unsang paagi kaha matuman kining tagnaa? Nganong makasalig ta nga ang Kasulatan maoy tuboran sa tinuod nga paglaom? Tubagon kana niining brosyura.”
Sulayi kini: Kon dawaton ang brosyur, ipakita sa tagbalay ang panid 16-17 ug isulti kini: “Daghan ang nahinumdom sa grabeng kapintasan sama sa Holocaust. Nakapangutana sila, ‘Kon dunay Diyos, nganong iyang gitugotan ang pag-antos?’ Ato ning hisgotan inigbalik nako.”
The Guidance of God—Our Way to Paradise
Gidisenyo aron mainteres ang mga Muslim diha sa komunidad nga makatuon ra silag Bibliya
Kon unsaon kini pagtanyag: “Sa akong nahibal-an, ang mga Muslim nagtuo sa usa ra ka Diyos ug sa tanang propeta. Husto ba ko? [Patubaga.] Gusto unta nakong basahon ang giingon sa usa ka propeta nga nagtagna nga ang yuta mahimong paraiso. Puwede ba? [Basaha ang Isaias 11:6-9.] Daghan ang nangutana kon unsaon kaha paghimo sa Diyos kini nga kausaban. Gipakita niining brosyura ang giingon sa mga propeta bahin niini.”
Sulayi kini: Kon dawaton sa tagbalay ang brosyur, isulti kini: “Ang Kasulatan nag-ingon nga sa sinugdan ang tawo nagpuyo sa paraiso. Sa sunod higayon, gusto nakong tubagon kining pangutanaha, ‘Nganong gitalikdan sa tawo ang giya sa Diyos ug gipapahawa sa paraiso?’” Sa imong pagbalik, hisgoti ang ulohan nga nagsugod sa panid 6.
Tinuod nga Pagtuo—Imong Yawi sa Malipayong Kinabuhi
Gidisenyo aron mainteres ang mga Muslim diha sa komunidad nga makatuon ra silag Bibliya
Kon unsaon kini pagtanyag: Ipakita ang hulagway sa panid 16-17 ug isulti kini: “Lahi ra kaayo ni sa atong makita sa kalibotan karon. Sa imong hunahuna, posible kahang maingon ini ang kalibotan sa umaabot? [Patubaga.] Matikdi ang gisaad sa Kasulatan. [Basaha ang usa sa gikutlo nga mga teksto gikan sa imong Bibliya.] Kining brosyura motabang nato nga maugmad ang tinuod nga pagtuo nga matuman gayod ang maong mga saad.”
Sulayi kini: Sa dili ka pa mobiya sa una nimong duaw, papilia ang tagbalay ug usa sa mga pangutana sa likod sa brosyur. Dayon ingna nga mobalik ka aron tubagon kini ginamit ang brosyur.
Lasting Peace and Happiness—How to Find Them
Gidisenyo aron mainteres ang mga Insek
Kon unsaon kini pagtanyag: “Daghan kaayo tag problema karon nga makawala sa atong kalipay. Unsay makatabang nimo aron ka magmalipayon bisag dunay mga problema? [Patubaga.] Daghan ang nagmalipayon pinaagi sa pagsunod sa tambag sa Bibliya. [Basaha ang Salmo 119:1, 2.] Ang uban nag-ingon nga ang Bibliya basahon lang kono sa mga Amerikano. Apan matikdi kini. [Hisgoti ang parapo 16 sa panid 17.] Gihisgotan niining brosyura kon sa unsang paagi atong makaplagan ang dumalayong kalinaw ug kalipay.”
Sulayi kini: Kon dawaton sa tagbalay ang brosyur, basaha ninyo ang unang tulo ka tudling-pulong sa parapo 18 sa panid 17 ug isulti kini: “Sa akong pagbalik, akong ipakita nimo kon unsay giingon sa Bibliya nga mahitabo sa umaabot.” Sa imong pagbalik, hisgoti ang usa sa mga punto sa parapo 6 sa panid 30.