Bag-ong Brosyur nga Itanyag!
1. Unsay atong itanyag sa Nobyembre, ug unsay katuyoan niini nga publikasyon?
1 Sa “Padayon sa Pagbantay!” nga Distritong Kombensiyon sa 2009, giluwatan ang bag-ong brosyur nga Ang Bibliya—Unsay Mensahe Niini? Sa Nobyembre, ang tanang kongregasyon sa tibuok kalibotan magtanyag niini sa unang higayon. Sa unsang paagi kini makatabang sa mga tawo sa atong teritoryo? Ang kadaghanan, ilabina ang mga dili Kristiyano, wala kaayoy nahibaloan sa Bibliya. Busa gipakita sa panid 3 niini nga brosyur nga gidisenyo kini aron sa paghatag ug katibuk-ang ideya bahin sa Bibliya.
2. Unsaon pagtanyag ang brosyur?
2 Kon Unsaon Kini Pagtanyag: Mahimo kitang moingon: “Unsay imong opinyon bahin niini nga teksto? [Basaha ang 2 Timoteo 3:16.] Daghan sa among nahinabi nagtuo niini. Apan para sa uban ang Bibliya maoy usa lang ka libro nga maayong basahon. Unsay imong ikasulti bahin sa Bibliya? [Patubaga.] Bisag unsa pay atong relihiyon, mas maayo kon atong susihon ang Bibliya. [Basaha ang parapo sa ibabawng bahin sa panid 3.] Samtang magbasa ka sa makaiikag nga sumaryo sa Bibliya niini nga brosyur, mainteres ka sa pagkahibalo nga usa lang ang tema ug mensahe sa Bibliya.”
3. Unsay laing paagi sa pagtanyag sa brosyur, ilabina sa mga dapit diin ang kadaghanan dili mga Kristiyano?
3 Aniay laing paagi, ilabina kon magsangyaw sa mga dapit diin ang kadaghanan dili mga Kristiyano: “Unsay imong opinyon sa giingon niining basahon sa tagna (o niining makapadasig nga mga pulong). [Basaha ang Salmo 37:11.] Sa imong hunahuna, unsa kahay kahimtang sa yuta kon matuman na kining tagnaa? [Patubaga.] Usa lamang kini sa mga paglaom ug paghupay nga gisaad sa Bibliya alang sa mga tawo sa tanang kultura ug relihiyon.” Basaha ang parapo sa ibabawng bahin sa panid 3, ug itanyag ang brosyur.
4. Unsaon nato paggamit ang brosyur sa pagsugod ug pagtuon sa Bibliya?
4 Pagsugod ug Pagtuon sa Bibliya: Dihang mobalik kita, mahimong pahinumdoman nato ang tagbalay sa atong naestoryahan ug hisgotan ang usa o duha ka parapo sa seksiyon nga napili, ug gamiton ang mga pangutana sa kataposang bahin niana. O kon gusto natong gamiton dayon ang librong Gitudlo sa Bibliya, mahimong basahon nato ang likod nga hapin sa brosyur, hatagan siyag libro, pangutan-on siya kon unsang kapitulo ang nakapainteres niya, ug hisgotan ang usa o duha ka parapo niana. Hinaot bug-os kitang makigbahin sa pagtanyag niini nga brosyur sa Nobyembre!