“Mga Babaye nga Nagahago Diha sa Ginoo”

¹ Sumala sa mga pulong sa ibabaw, gihubit ni Pablo si Trifona ug Trifosa, duha ka kugihang mga igsoong babaye sa kongregasyon sa Roma. Bahin sa lain, si Persida, siya miingon: “Siya mihimog daghang paghago diha sa Ginoo.” Siya usab mihisgot nga mauyonon kang Febe ingong “usa ka tigpanalipod sa daghan.” (Roma 16:​2, 12) Diha sa Kasulatan, si Dorcas gipunting ingong usa nga “dagaya sa maayong mga buhat ug sa mga gasa sa kaluoy.” (Buh. 9:36) Pagkadakong panalangin ang espirituwal nga mga babaye sa kongregasyon!

² Ato bang gipabilhan ang mga igsoong babaye nga nagahago sa atong kongregasyon? Sila nagbuhat sa dakong bahin sa buluhatong pagsangyaw, nagdumala sa kadaghanang mga pagtuon sa Bibliya, ug nag-abag sa daghan sa mga bag-ohan. Sila naggugol usab ug dakong panahon sa pagtabang sa mga bata sa paghimog espirituwal nga pag-uswag. Ang Kristohanong mga babaye naghimo sa ilang bahin sa pagtukod ug espiritu sa gugma, kalipay, kalinaw, ug kasibot diha sa kongregasyon. Sila mapaluyohon sa daghang paagi aron ang ilang mga bana ug ubang mga membro sa pamilya makahimo nga mas pa diha sa pag-alagad kang Jehova.

³ Mga Igsoong Babaye Diha sa Bug-os-Panahong Pag-alagad: Lakip niadtong naghago pag-ayo diha sa Ginoo mao ang mga misyonera, nga daghan ang nakaambit sa pag-ugmad sa buluhaton sa langyawng mga nasod. Diha sa mga kongregasyon nga gialagaran sa ilang mga bana, ang mga asawa sa nagapanawng mga magtatan-aw puliki diha sa ministeryo sa kanataran, nga nagdasig sa daghang igsoong babaye. Dili angayng sayloan mao ang mga igsoong babaye sa Bethel, nga masibotong naghimo ug sagradong pag-alagad sa pagpaluyo sa organisasyon ni Jehova. Ug ang atong regular payunir nga mga igsoong babaye, pinaagi sa ilang matinumanong mga paningkamot sa pagdayeg sa Diyos, nagtabang sa libolibo aron makakat-on sa kamatuoran.

⁴ Kining matinumanong mga babaye nakakaplag ug dakong katagbawan sa ilang nagasakripisyo-sa-kaugalingon nga paagi sa kinabuhi. (1 Tim. 6:​6, 8) Sila takos sa pagdayeg ug ihatag ta kanila ang bisan unsang pagdasig ug pagpaluyo.

⁵ Ang Kristohanong mga babaye maoy bililhong tabang sa organisasyon ni Jehova, nga naghimog matinumanong pag-alagad nga usa ka panalangin sa tanan. Hinaot nga kita padayong magpabili sa maong mga babaye ug mag-ampo nga ang panalangin ni Jehova maanaa kanila samtang sila padayong “nagahago diha sa Ginoo.”