Maulawon Ka ba nga Tawo?
1 Dili kita matingala sa dihang atong makita ang usa ka bata mga mopasiplat kanato sa luyo sa iyang inahan o amahan. Ang pagkamaulawon kinaiyanhon sa sayong pagkabata. Bisan sa pagkahingkod, sa kinaiya daghan ang daw maulawon. Kon ang pagkamaulawon mag-apektar sa imong pagpakig-ambit diha sa ministeryo, unsay imong mahimo?
2 Pagbuntog sa Pagkamaulawon: Hinungdanon ang paghatag ug pagtagad sa “natago nga pagkatawo sa kasingkasing.” (1 Ped. 3:4) Palig-ona ang imong gugma kang Jehova ug sa imong silingan. Bug-os nga makombinsir nga ang pagtuman sa buluhatong pagsangyaw mao ang usa sa labing maayong mga paagi sa pagpasundayag ug nagsakripisyo-sa-kaugalingon nga gugma. Tinguhaa ang usa ka maayong rutina sa personal nga pagtuon ug pagtambong sa tigom. Pag-ampo nga regular ug espesipiko alang sa tabang ni Jehova. Ang lig-ong pagtuo ug pagsalig kaniya mopadako sa pagsalig ug mohatag sa “labi pa gayod nga kaisog sa pagsulti sa pulong sa Diyos nga walay-kahadlok.”—Filip. 1:14.
3 Buntoga ang mga pagbati sa pagkadi-makaarang. Mipatim-aw nga kinahanglang buhaton kini ni Timoteo. Gidasig ni Pablo si Timoteo nga “dili gayod tugotang may tawo nga magpakaubos sa [iyang] pagkabatan-on,” nga nagpahinumdom kaniya nga “dili usa ka espiritu sa katalaw ang gihatag sa Diyos kanato, apan kanang sa gahom.” (1 Tim. 4:12; 2 Tim. 1:7) Si Timoteo bug-os nga gigamit ni Jehova, nga mogamit usab kanimo kon ikaw manlimbasog nga mouswag uban ang bug-os nga pagsalig diha Kaniya.—Sal. 56:11.
4 Ang pagpamalandong sa usa ka teksto sa Bibliya, sama sa Mateo 10:37, mitabang sa usa ka sister kansang pagkamaulawon naghimo kaniyang mahadlokon sa iyang magsusupak nga bana. Samtang siya milahutay, ang ministeryo nahimong mas sayon alang kaniya, ug sa ngadtongadto ang iyang bana, inahan, ug mga igsoong lalaki ngatanan midawat sa kamatuoran!
5 Pagpangandam Gikinahanglan: Ang imong pagsalig dugang mouswag sa dihang bug-os nga mangandam ka alang sa ministeryo. Pagpili ug yanong presentasyon gikan sa librong Nangatarongan o nangaging mga isyu sa Atong Ministeryo sa Gingharian, tun-i kana, ug ensayoha kana. Inay kay dugangan ang wala-kinahanglana nga mga kabalaka, paghunahuna nga positibo. Batoni ang kaisog gikan sa suod nga pagsangyaw duyog sa uban. Hunahunaa kanunay nga daghan sa mga tawo nga imong mahibalag diha sa mga pultahan maoy maulawon, sama gayod kanimo. Ang tanan nanginahanglan sa mensahe sa Gingharian.
6 Kon ikaw maulawon, ayawg kahigawad. Samtang manlimbasog ka, si Jehova motabang kanimo sa pagkahimong epektibong magwawali sa maayong balita. Dayon mabatonan nimo ang kalipay diha sa imong ministeryo.—Prov. 10:22.