“Bugnoa ang Maayong Bugno sa Pagtuo”
1 Ang apostol nga si Pablo nagtambag kang Timoteo sa ‘pagpakigbugno sa maayong bugno sa pagtuo.’ (1 Tim. 6:12) Si Pablo mismo nagkinabuhi sumala nianang mga pulonga. Sa ulahing bahin sa iyang kinabuhi, siya nagsulting masaligon nga siya sa personal nakigbugno sa usa ka maayong bugno. (2 Tim. 4:6-8) Sa tanang paagi, iyang gipadayon ang ministeryo uban ang pagkamaisogon, pagkamadasigon, ug pagkamalahutayon. Pinaagi sa pagsundog sa iyang panig-ingnan, kita makabaton ug samang dulot nga pagkamasaligon nga kita nagabuhat sa labing maayo nga atong maarangan diha sa atong pagpakigbugno dapig sa Kristohanong pagtuo.
2 Himoa ang Gikinahanglang Paningkamot: Si Pablo naghago gayod diha sa ministeryo. (1 Cor. 15:10) Ingon usab niana ang ato gayong buhaton samtang pangitaon ta ang tanang takos nga mga tawo diha sa atong teritoryo. (Mat. 10:11) Aron maabot ang pipila kanila, kini tingali nagkahulogang sayo nga mobangon aron magpamatuod kanilang atong mahibalag diha sa dalan. O kini tingali magkahulogang mosangyaw sa haponhapon na o sa kilumkilom aron mahibalag ang mga tawo human sila makauli sa ilang mga balay.
3 Nagkinahanglan kini ug disiplina sa kaugalingon ug maayong pag-eskedyul aron mahimong untop sa dihang magtigom uban sa atong grupo sa pagtuon sa libro sa dayon na nga pagsangyaw. Pananglitan, ang ubang mga membro sa pamilyang Bethel kinahanglang mobiyahe ug usa o kapin pang oras matag biyahe aron makig-ambit sa ministeryo uban sa ilang natudlong mga kongregasyon sa mga hinapos sa semana. Dugang pa, kita makadayeg sa pipila ka magmamantala ug mga pamilya diha sa atong kongregasyon kinsa mobiyaheg layo kaayo apan untop nga moabot. Ang maong mga panig-ingnan sa kakugi ug personal nga organisasyon maoy takos sundogon.
4 Kita angayng matukmod sa pagpaloap sa tanang interes nga atong makaplagan. Bisan sa dihang magpahimutang ug literatura diha sa dalan o sa impormal nga mga kahimtang, kita kinahanglang maningkamot sa pagkuha sa adres sa indibiduwal o numero sa telepono. Dayon mahimo natong duawon siya aron ugmaron ang interes ug manlimbasog sa pagsugod ug pagtuon sa Bibliya.
5 Magmakanunayon sa Pag-alagad: Si Pablo makanunayon ug mabug-oson sa pagsangyaw. (Roma 15:19) Komosta man ikaw? Ikaw ba regular nga nakig-ambit sa ministeryo? Nakapakig-ambit ka na ba sa pag-alagad sa kanataran niining bulana? Ang mga tagdumala sa Pagtuon sa Libro sa Kongregasyon interesado nga makita ang tanan sa ilang grupo nga makig-ambit sa ministeryo sulod sa Agosto. Sila motabang kanimo sa paghimo niana.
6 Pinaagi sa pagsundog sa panig-ingnan ni Pablo sa bug-os nga pagpaluyo sa maayong balita, kita mopadayon sa ‘pagpakigbugno sa maayong bugno sa pagtuo.’