“Magmadato sa Maayong mga Buhat”

¹ Sulod sa kataposang mga tuig sa iyang masibotong ministeryo, ang apostol nga si Pablo kuging nakigtambayayong kang Timoteo ug Tito. Sa matag usa kanila, siya misulat ug susamang mga pulong sa pagdasig. Giingnan niya si Tito nga angayng “mabutang sa mga hunahuna niadtong nagtuo sa Diyos ang pagpadayon sa maayong mga buhat.” (Tito 3:8) Giingnan niya si Timoteo nga kadtong nagbutang sa ilang paglaom sa Diyos angayng “magmadato sa maayong mga buhat.” (1 Tim. 6:​17, 18) Kini maoy maayo kaayong tambag alang kanatong tanan! Apan unsay magtukmod kanato sa paghimog maayong mga buhat diha sa atong kinabuhi? Ug unsang espesipikong mga buhat ang mahimo natong himoon sa umaabot nga mga adlaw?

² Ang panukmod nga mahimong dato sa maayong mga buhat maggikan sa atong pagtuo ug gugma kang Jehova ug sa kahibulongang paglaom nga gihatag niya kanato. (1 Tim. 6:19; Tito 2:11) Ilabina niining panahona sa tuig, gipahinumdoman kita nga si Jehova nagpadala sa iyang Anak nganhi sa yuta aron mabayaw ni Jesus ang iyang Amahan ug magtagana sa dalan paingon sa kinabuhi alang sa tanang takos nga mga tawo. (Mat. 20:28; Juan 3:16) Kini ipatin-aw pag-ayo sa kasaulogan sa Memoryal sa kamatayon ni Kristo sa Marso 28. Ingong sanong sa atong nabatonang paglaom nga mabuhing walay kataposan, dili ba kita matukmod sa pagbuhat kutob sa atong maarangan nga “magmadato sa maayong mga buhat”? Siyempre matukmod gayod kita! Unsang mga buhat ang mahimo natong buhaton karon?

³ Maayong mga Buhat nga Himoon sa Marso ug Saylo Pa: Nga tino, kita motambong sa Memoryal​—ang labing hinungdanong hitabo sa tuig alang sa mga Saksi ni Jehova sa tibuok kalibotan. (Luc. 22:19) Apan buot natong ipaambit ang kalipay nianang okasyona sa daghan kutob sa mahimo. Tan-awa ang taho sa pag-alagad sa 2002 Tinuig nga Basahon, ug makita nimo nga sa miaging tuig diha sa daghang nasod sa tibuok yuta, ang nanambong sa Memoryal maoy tulo, upat, lima ka pilo, o kapin pa sa gidaghanon sa mga magmamantala. Nagkinahanglan gayod kanag makugihong paningkamot sa tanan diha sa kongregasyon nga mapanagtag pag-ayo ang mga imbitasyon sa Memoryal sa tibuok nilang teritoryo. Busa, buot natong gugolon ang daghang panahon kutob sa maarangan tali karon ug sa Marso 28 sa pagdapit sa mga tawo nga motambong sa Memoryal, nga magtabang kanila nga makakat-on bahin sa paglaom sa kaluwasan.

⁴ Kasagaran adunay kitay maayong panahon sa Abril ug panahon kini sa bakasyon alang niadtong nagtungha. Sa unsang paagi magamit nato kining paborableng mga higayon nga “magmadato sa maayong mga buhat”? Pinaagi sa pagbaton kanunay ug madasigong pagpakig-ambit diha sa buluhatong pagwali sa maayong balita, nga “masiboton sa maayong mga buhat.” (Tito 2:14; Mat. 24:14) Kon wala ka makaoksilyare payunir sa Marso, makahimo ka ba niana sa Abril ug/o sa Mayo? Kon nakapayunir ka sa Marso, makapadayon ka ba?

⁵ Nakaplagan sa pipila nga nagtrabaho sa sekular nga makagugol silag usa ka oras o kapin pa diha sa pag-alagad paingon sa trabahoan, makasangyaw diha sa kadalanan o makaduaw sa mga tawo nga nagtrabaho diha sa mga negosyohanan nga abli na sayo sa buntag. Ang uban nag-eskedyul sa bahin sa ilang tingpaniudto sa pagsangyaw. Nakaplagan usab sa uban nga posible ang pagdumalag pagtuon sa Bibliya nianang panahona uban sa isigkatrabahante. Nahimo sa daghang minyo nga mga igsoong babaye ang paggahin ug panahon alang sa ministeryo sa kanataran samtang atua sa eskuylahan ang ilang mga anak. Pinaagi sa pagbangon ug sayosayo sa pipila ka adlaw aron atimanon ang mga buluhaton sa balay, nakabaton silag dugang panahon sa adlaw alang sa buluhatong pagsangyaw ug pagpanudlo.​—Efe. 5:​15, 16.

⁶ Bisag dili ka makahimo sa pag-oksilyare payunir, tingali makahimo kag personal nga eskedyul aron mas makapakig-ambit diha sa ministeryo, nga magbuhat kutob sa imong maarangan “nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit” sa kamatuoran ngadto sa uban.​—1 Tim. 6:18.

⁷ Hinumdomi ang Maayong Buhat sa Paghimog Tinun-an: Matag tuig adunay interesadong mga tawo nga motambong sa Memoryal. Posible ba alang sa pipila diha sa kongregasyon nga hatagag pagtagad kadtong nanambong apan kinsa wala pa magtuon sa pagkakaron? Mahimo ba silang maduaw pag-usab uban ang tumong nga matabangan sila nga mouswag sa espirituwal? Tingali ang pipila niining mga tumatambong sa Memoryal maoy mga paryente sa mga Saksi. Ang uban mahimong mga indibiduwal nga nagtuon kanhi ug nagkinahanglan lang tingalig pipila ka pagdasig nga magtuon pag-usab ug regular nga motambong sa mga tigom. Pagkadakong kalipay ang atong maangkon sa dihang makita sila nga mahimong aktibong mga alagad ni Jehova duyog kanato!

⁸ Uban sa dugang pagpakig-ambit diha sa ministeryo sulod sa Marso ug saylo pa, kita lagmit kaayo nga makakaplag ug dugang interesadong mga tawo nga atong maduaw pag-usab. Sulayi ang pagbilin kanilag usa ka pangutana. Dayon saari nga ipaambit nimo ang tubag sa sunod nga pagduaw. Sa dihang buhaton nato kana, ang dalan maandam alang sa pagbalikduaw. Kon makahimo kita sa pagbalikduaw sa labing madali, mas maayo. Kon wala kita makaarang sa pagsugod ug pagtuon sa unang duaw, buot natong sulayan ang pagsugod ug pagtuon sa sunod duaw kon mahimo gayod.

⁹ Sa dihang magsangyaw kita diha sa kadalanan, angay kitang mahunahunaon sa pagsulay nga makasugod ug panaghisgot uban sa mga tawo. Daghang magmamantala ang gihatagan ug mga ngalan, adres, ug mga numero sa telepono sa interesadong mga tawo nga ilang nahibalag samtang nagsangyaw sa kadalanan. Kon ang indibiduwal nga nakontak wala magpuyo sa inyong teritoryo, pagkuhag porma nga Please Follow Up (S-43) sa inyong Kingdom Hall, pil-api kana, ug ihatag sa sekretaryo sa inyong kongregasyon, nga mopasa niana ngadto sa kongregasyon kansang teritoryo nagpuyo ang maong tawo. Kon dili kana mahimo sa sekretaryo, ipadala niya kana ngadto sa sangang buhatan aron maatiman. Nianang paagiha, ang interes mahimong maugmad.

¹⁰ Kon ang numero sa telepono nakuha pero ang adres wala, nan paghimog balikduaw pinaagi sa pagtelepono sa maong indibiduwal. Pangandam nga abante sa panahon kon unsay buot mong hisgotan. Andama ang imong librong Nangatarongan alang sa daling reperensiya. Ang pipila adunay maayong kalamposan sa pagtuon uban sa mga indibiduwal diha sa telepono, lakip niadtong lisod nilang maabtan sa balay. Usa ka igsoong babaye nagsugod sa pagpangutanag mga numero sa telepono gikan sa interesadong mga babaye nga iyang nahibalag sa balaybalay nga ministeryo, ug ingong resulta nakahimo siya sa pagsugod ug duha ka pagtuon sa Bibliya.

¹¹ Motambayayong sa mga Ansiyano sa Pagtabang sa mga Di-aktibo: Ang mga ansiyano interesado kaayo sa paghatag ug mahigugmaong atensiyon kanila. Ubay-ubay gayod sa maong mga di-aktibo, sa ilang kaugalingong kabubut-on, ang nagtambongan na usab sa mga tigom sa kongregasyon. Ilang naamgohan ang panginahanglan nga suod nga makig-uban sa organisasyon ni Jehova aron makapahimulos sa espirituwal nga kasegurohan nga gihubit diha sa Salmo 91. Ang uban kanila andam na usab nga makig-ambit sa pag-alagad sa kanataran. Kon ang uban nga di-aktibo motambong sa Memoryal niining bulana, hayan buot nilang makabaton ug personal nga pagtuon sa Bibliya. Kon mao gayod kana ang kahimtang, ang mga ansiyano angayng mohimog mga kahikayan nga may modumalag pagtuon niadtong buot magpatabang. Kon gihangyo ka nga motabang niining paagiha, ang imong pakigtambayayong pabilhan pag-ayo.​—Roma 15:​1, 2.

¹² Padayona ang “Pagpadayon sa Maayong mga Buhat”: Daghan nga nakig-ambit sa buluhatong oksilyare payunir sa usa ka bulan o kapin pa ang nakakaplag nga ang ilang kalihokan sa kanataran miuswag sa nagsunod nga mga bulan. Nahibalag nila ang interesadong mga tawo kinsa gibati nilang angayng duawon pag-usab. Kini ang nagtukmod kanila nga mohimog dugang paningkamot nga mas subsob nga makaalagad sa kanataran aron makontak pag-usab ang maong interesadong mga tawo. Ang pipila nakasugod ug mga pagtuon, ug kana nakatabang kanila sa pagbaton ug mas dakong pakig-ambit diha sa ministeryo.

¹³ Nakaplagan pa gani sa uban ang tumang kalipay sa pagbuhat ug labaw pa diha sa buluhatong pagwali ug paghimog tinun-an nga sila natukmod sa pagsusi sa ilang mga unahonon. Ingong resulta, ang pipila nakahimo sa pagpamenos sa sekular nga trabaho ug nahimong padayong mga oksilyare payunir. Ang uban nakaarang sa pagsulod sa regular payunir nga pag-alagad. Nakahimo sila sa pagbutang sa ilang paglaom ngadto sa Diyos nga mas bug-os pa ug dili ngadto sa mga butang nga mahimong itanyag sa kalibotan. Ilang nakaplagan nga ang ‘pagkamahinatagon, andam sa pagpaambit,’ magdalag dagayang mga panalangin gikan kang Jehova ug magpalig-on sa ilang paglaom nga matagamtam ang “tinuod nga kinabuhi.” (1 Tim. 6:​18, 19) Siyempre, samtang daghan ang moalagad ingong payunir, makabenepisyo ang tibuok kongregasyon. Ang mga payunir makiling sa pag-estorya sa ilang mga kasinatian ug magdapit sa uban nga makig-ambit sa ministeryo duyog kanila, ug kini makapatunghag mas madasigong espirituwal nga atmospera diha sa kongregasyon.

¹⁴ Hinaot nga kitang tanan “magmadato sa maayong mga buhat” niining panahon sa Memoryal ug saylo pa pinaagi sa pagpauswag sa atong pakig-ambit sa Kristohanong ministeryo. Ipakita nato ang atong pagpabili sa nahimo ni Jehova sa paghatag kanato sa paglaom nga mabuhing walay kataposan diha sa matarong nga bag-ong kalibotan.​—2 Ped. 3:13.