‘Buhata ang Maayo Ngadto sa Tanan’
1 “Iwali sa Bug-os ang Pulong sa Diyos” ug “Magmadato sa Maayong mga Buhat” mao ang mga tema nga gigamit diha sa Pebrero ug Marso 2002 nga mga pasukip sa Atong Ministeryo sa Gingharian. (Col. 1:25; 1 Tim. 6:18) Sa maong mga gula kita gidasig nga mohimog dugang paningkamot aron tabangan ang interesadong mga tawo nga motambong sa Memoryal, tabangan ang mga di-aktibo nga magmaaktibo pag-usab diha sa kongregasyon, ug tabangan ang atong mga anak ug ang kuwalipikadong mga estudyante sa Bibliya nga mosugod sa pagmantala sa maayong balita. Sa walay duhaduha atong natagamtam ang pipila ka kalamposan ingong resulta sa atong maayong mga panikaysikay. Karon, “samtang kita may kahigayonan alang niini, [padayong] buhaton nato ang maayo ngadto sa tanan.”—Gal. 6:10.
2 Dapita Sila nga Motambong Pag-usab: Sa Pilipinas, kapin sa 280,000 ka tawo nga dili mga magmamantala sa maayong balita ang motambong sa Memoryal matag tuig. Sanglit ang ilang pagtambong nagpakitag pagkainteresado, unsay angay natong himoon aron pukawon kadtong “hustong nakiling alang sa kinabuhing walay kataposan” aron mahimong “mga magtutuo”? (Buh. 13:48) Dasiga sila nga motambong pag-usab sa mga tigom sa kongregasyon sa dihadihang maarangan.
3 Nganong dili dapiton ang interesadong tawo nga motambong sa Pagtuon sa Libro sa Kongregasyon aron matagamtam ang makaiikag nga panaghisgot sa tagna ni Isaias? Kon ikaw paryente o kaila sa maong tawo ug naeskedyul ka nga mohatag ug umaabot nga pakigpulong sa Teokratikanhong Tunghaan sa Ministeryo, mahimong dapiton mo siya nga motambong ug maminaw sa imong bahin. Padayong pahibaloa siya sa mga ulohan sa mga pakigpulong publiko nga ipahayag sa umaabot nga mga semana. (Ang nunot-sa-panahon nga eskedyul angayng ibutang sa information board.) Pangitag bisan unsang kahigayonan nga mapukaw diha sa maong tawo ang tinguha sa pagsimba kang Jehova. Ug siyempre, kon wala pa siya magtuon sa Bibliya uban sa usa diha sa kongregasyon, malulotong itanyag kaniya ang usa ka pagtuon.
4 Padayong Dasiga ang mga Di-Aktibo: Ubay-ubay niadtong mitambong sa Memoryal ang napahinungod na kang Jehova. Bisan pa niana, may higayon nga sila mihunong sa aktibong pagwali sa maayong balita. Apan, si Pablo nagtambag kanato nga “buhaton nato ang maayo . . . ilabina kanila nga atong kabanay sa pagtuo.” (Gal. 6:10) Busa, ang mga di-aktibo mao ang angayng hatagag unang pagtagad.
5 Tingali ang pipila misanong na sa pagdasig gikan sa mga ansiyano ug sa uban nga makig-ambit pag-usab diha sa ministeryo. Kon gitudlo ka sa mga ansiyano nga motabang sa napaabtik-pag-usab nga magmamantala, hibaloi nga ang imong gugma mismo kang Jehova ug sa ministeryo sa kanataran makapalig-on sa pagsalig sa maong igsoon. Ipakita kaniya kon sa unsang paagi ikaw nakig-ambit sa nagkalainlaing bahin sa ministeryo aron iyang makaplagan ang kalipay diha niana, molahutay diha sa buluhatong pagsangyaw, ug mahimong makasinati sa mga panalangin ni Jehova.
6 Hatagig Maayong Pagsugod ang Bag-ong mga Magmamantala: Sa dihang naamgohan sa bag-ong interesadong babaye nga iyang nakaplagan ang matuod nga organisasyon sa Diyos, buot niyang mosugod dayon diha sa pag-alagad. Human makat-oni kon unsay iyang gikinahanglan, siya miingon: “Sugdan dayon nato kana.” Kon ang usa ka tawo nga imong ginatun-an sa Bibliya giuyonan na karon nga mosugod sa pagpakig-ambit diha sa pag-alagad sa kanataran, tabangi siya nga masabtan ang panginahanglan nga “sugdan dayon kana,” ug busa hatagig maayong pagsugod ang maong bag-ong magmamantala. Tabangi siya sa pag-ugmad ug rutina sa pagpangandam ug pagpakig-ambit nga regular diha sa ministeryo sa kanataran matag semana.
7 Kon imong anak mismo ang nahimong bag-ong di-bawtismadong magmamantala, abagi siya nga mouswag sumala sa iyang edad ug katakos. Uban sa diyutayng tabang gikan kanimo, tingali mahingangha ka sa kalamposan gayod niya sa pagpakighisgot sa usa ka tawo, pagbasa gikan sa Bibliya, ug sa pagtanyag sa literatura. Sa dihang makakaplag siyag masanongong tawo sa pag-alagad sa kanataran, bansaya siya sa paghimog balikduaw ug atimanon ang interes.
8 Pauswaga ang Imong Kaugalingong Ministeryo: Ang imo bang mga sirkumstansiya motugot kanimo sa pagpauswag sa imong pagpakig-ambit sa buluhatong pag-ebanghelyo bisag saylo pa sa panahon sa Memoryal? Makadugang ka bag usa o duha ka oras matag semana nganha sa imong naandang magugol sa pag-alagad? Abante ba nimong gitan-aw sa kalendaryo kon kanus-a ka makaoksilyare payunir pag-usab? O mahikay ba nimo ang imong estilo-sa-kinabuhi aron makasulod sa bug-os-panahong ministeryo? Ang tanang panikaysikay nga atong himoon diha sa ministeryo mahimong motabang sa usa ka tawo sa pagdawat sa kamatuoran! (Buh. 8:26-39) Samtang nagalantaw kita sa umaabot nga mga adlaw, atong ‘tinguhaon kanunay ang maayo sa usag usa ug sa tanan.’—1 Tes. 5:15.
[Kahon sa panid 3]
Padayong Tabangi ang:
□✔ Mga tumatambong sa Memoryal
□✔ Napaabtik-pag-usab nga mga magmamantala
□✔ Bag-ong di-bawtismadong mga magmamantala