Mahimong Malipayong Magtutuman
1 Si Jesus nag-ingon nga panahon sa iyang presensiya, ang kadaghanan dili ‘magmatikod,’ sama gayod sa adlaw ni Noe. (Mat. 24:37-39) Nan, gidahom nga daghang indibiduwal dili magpatalinghog sa maayong balita sa Gingharian. Unsay makatabang kanato sa paghupot kanunay sa mangayaong espiritu samtang kita nagatuman sa atong ministeryo?—Sal. 100:2.
2 Una, gikinahanglan natong hunahunaon kanunay nga ang atong mensahe ug ang atong buluhaton sa pagsangyaw maoy gikan sa Diyos. Ang bisan unsang kawalay pagsanong diha sa ministeryo, bisan pa sa ato gayong mga panikaysikay, sa pagkamatuod maoy pagsalikway kang Jehova. Tungod sa paghinumdom nga ang atong pagkamatinumanon sa pagsangyaw aduna ing pahiyom sa iyang pag-uyon motabang kanato sa pagmentinar sa atong kangaya ug pansulod nga kalipay ingong mga magtutuman sa pulong sa Diyos.—Sant. 1:25.
3 Ikaduha, aduna pay mga indibiduwal kinsa modawat sa iya ni Jehova nga paagi sa kaluwasan. Bisan pag ang kadaghanan tingali walay pagtagad, aduna pa gihapoy samag-karnero nga mga tawo nga pagatigomon, bisan karon, sa hinapos na gayod nga bahin sa kataposan. Kita kinahanglang magpadayon sa pagsangyaw, nga mosulod “sa bisan unsang siyudad o balangay” aron ‘pangitaon kon kinsa diha niana ang takos.’—Mat. 10:11-13.
4 Hupti Kanunay ang Positibong Tinamdan: Ang makaluluoyng rekord sa bakak nga mga relihiyon nakapahigawad sa pipila. Ang uban nahimong “pinanitan ug binalibag” pinaagi niining sistema sa mga butang. (Mat. 9:36) Daghan tingali ang nabug-atan tungod sa kawalay trabaho, pag-atiman sa panglawas, ug seguridad. Ang pagkasabot niini motabang kanato nga molahutay sa atong buluhaton. Paningkamot sa pagsugod ug mga panaghisgot nga maglangkit sa mga isyu nga gikabalak-an pag-ayo sa mga tawo diha sa atong teritoryo. Tabangi sila nga masabtan nga ang Gingharian sa Diyos mao lamang ang solusyon. Gamita ang Kasulatan ug espesipikong mga puntos diha sa mga publikasyon aron maabot ang ilang mga kasingkasing pinaagig maayong balita.—Heb. 4:12.
5 Ang malipayong mga magtutuman sa pulong sa Diyos kanunayng mahinumdom: “Ang kalipay ni Jehova mao ang [atong] salipdanan.” (Neh. 8:10) Dili kinahanglang mawad-an sa atong kangaya. “Kon takos ang balay, padangata diha niini ang kalinaw nga gipanghinaot ninyo niini; apan kon kini dili takos, pabalika nganha kaninyo ang kalinaw gikan kaninyo.” (Mat. 10:13) Si Jehova makabag-o sa atong kangaya ug kusog samtang kita mapailobong molahutay diha sa iyang sagradong pag-alagad, ug iyang panalanginan ang atong pagkamatinumanon.