Himayaa si Jehova Pinaagig Maayong mga Buhat
1 Sa dihang ikaw naabtan sa usa ka mapintas nga bagyo, pagkamakapahupay gayod ang pagkakaplag ug salipdanan! Kon sa sulod niana mainit ug hilwas ug kon ang mga nagpuyo maabiabihon, ikaw malipay sa pagpuyo dinha. Ang buluhatong pagsangyaw sa Gingharian nagtultol sa mga tawo ngadto sa maong salipdanan gikan sa sistema ni Satanas. Ang ato bang panggawi sa adlaw-adlaw makatabang sa uban nga makitang madanihon kini nga dangpananan? Oo, kay si Jesus miingon nga ang mga tawo ‘makakita sa atong maayong mga buhat ug maghimaya sa atong Amahan nga anaa sa mga langit.’—Mat. 5:16.
2 Unsaon man nato paggawi aron ang atong mga buhat makadani sa uban ngadto kang Jehova ug sa iyang organisasyon? Pinaagi sa pagtugot sa mga pulong ni Jesus nga natala sa Lucas 6:31 ug 10:27 nga moumol sa atong mga kinabuhi sa matag adlaw. Mopalihok kini kanato sa pagpakitag mahigugmaong kahangawa sa mga isigkatawo, nga nagpalahi kanato gikan niining maayaron ug di-matinagdanon nga kalibotan.
3 Usa ka igsoong babaye nga nagsakay ug barko nakamatikod sa usa ka batan-ong babaye nga gidagat pag-ayo nga wala na niya maatiman ang iyang gamayng bata. Ang igsoong babaye mitanyag sa pag-atiman sa bata. Sa dihang ang babaye nangutana kon sa unsang paagi ikapakita niya ang iyang pasalamat, ang igsoong babaye miingon: ‘Palihog paminaw sa mga Saksi ni Jehova sa sunod higayon nga sila moduaw.’ Gibuhat kini sa babaye, ug karon siya ug ang iyang bana mga Saksi na. Ang maayong mga buhat nakaapekto ug dako kon sa unsang paagi sila misanong sa mensahe sa Gingharian.
4 Atong Tibuok Kinabuhi Nalangkit: Ang atong panggawi diha sa kasilinganan, samtang anaa sa trabaho o sa tunghaan, ug sa mga yugto sa paglingawlingaw nagpahinabo sa uban sa pagkomento bahin kanato ug sa atong relihiyon. Busa, kita angayng mosukna sa atong kaugalingon: ‘Unsay panglantaw sa mga maniniid kanako ug sa akong pamilya? Giisip ba sa mga silingan ang atong balay ug nataran nga hinlo ug naatiman pag-ayo? Ang ato bang mga isigkatrabahante ug mga eskolmet naglantaw kanato ingong untop sa panahon ug makugihon? Makaplagan ba sa uban nga ang atong panagway kasarangan ug matinahuron?’ Ang atong maayong mga buhat makapahimo sa pagsimba kang Jehova nga mas madanihon ngadto sa uban.
5 Gipasidan-an ni Pedro ang mga Kristohanon nga sila pagayubiton. (1 Ped. 4:4) Kinahanglang paneguroon nato nga ang atong panggawi dili hinungdan sa negatibong komento. (1 Ped. 2:12) Kon ang atong adlaw-adlawng mga buluhaton maghimaya sa Diyos nga atong gisimba, nan kita mahisama gayod sa mga lampara nga gikuptan pataas, nga nag-agni sa uban ngadto sa hilwas nga salipdanan nga gitagana ni Jehova.—Mat. 5:14-16.