Mahimong “Okupado Kaayo” sa Imong Ministeryo

¹ Sa dihang atong mabasa nga si apostol Pablo nagtrabaho sa paggamag tolda samtang didto sa Corinto, kita tingali magkanayon nga kini naglimite sa iyang kahigayonan sa pagsangyaw. Apan, ang Buhat 18:​5 nag-asoy: “Si Pablo okupado kaayo sa pulong, nga nagpamatuod ngadto sa mga Hudiyo nga si Jesus mao ang Kristo.” Nganong si Pablo okupado kaayo sa pagsangyaw nga kalihokan? Bisan pag daghan sa Corinto nahimo nang mga magtutuo, ang Ginoo nagpamatuod nga aduna pay daghang mahimong mga tinun-an nianang siyudara. (Buh. 18:​8-​11) Kita ba adunay susamang katarongan nga mahimong okupado kaayo sa atong ministeryo? Oo. Daghan pang tawo ang makaplagan ug matudloan sa kamatuoran.

² Paggugol ug Dugang Panahon sa Pag-alagad Sulod sa Abril: Lagmit maoy imong tumong nga magmapuliki sa pagsangyaw sa maayong balita matag bulan. Apan ang tinong mga bulan ilabinang magahatag kanato ug dugang mga kahigayonan sa atong pagkahimong “okupado kaayo” niini nga kalihokan. Kini naglakip sa bulan sa Abril, sa panahon gayod sa Memoryal. Ang imo bang mga kahimtang nagtugot kanimo sa pag-oksilyare payunir o pagpadako sa imong paningkamot diha sa ministeryo niining panahona? Daghang magmamantala nga nagbuhat sa ingon ang dagayang gipanalanginan. (2 Cor. 9:6) Kon ikaw nagabuhat sa tanan nimong maarangan, hinumdomi nga si Jehova nahimuot sa imong tibuok-kalag nga pag-alagad. (Luc. 21:​2-4) Bisan unsa pay imong mga kahimtang, himoa nga imong tumong nga mahimong “okupado kaayo” sa imong ministeryo sulod sa Abril. Ug ayawg kalimti sa pagtunol sa imong taho sa pag-alagad sa kanataran sa kataposan sa bulan aron ang imong paningkamot mahiapil sa ubang katawhan ni Jehova.

³ Duawa ang mga Bag-ohan nga Mitambong sa Memoryal: Sa Pilipinas sa milabayng tuig, ang mitambong sa Memoryal maoy 413,023. Ang total nga tumatambong niining tuiga wala pa mahibaloi. Apan, ang mga taho nagpaila nga adunay naglungtad nga katingalahang potensiyal alang sa mas dakong “pagpangani.” (Mat. 9:​37, 38) Busa, kutob sa labing sayo nga maarangan, paghikay aron duawon ang interesadong mga tawo nga mitambong sa Memoryal aron tabangan sila sa espirituwal nga paagi. Ang pag-oktaba nianang mga duawa mahimong magtugot ‘sa usa nga daotan nga mosakmit sa pulong sa gingharian nga napugas sa ilang mga kasingkasing.’ (Mat. 13:19) Ang walay langan nga pagduaw magpakita nga ikaw sa pagkatinuod “okupado kaayo” sa imong ministeryo.

⁴ Padayong Tabangi ang mga Di-Aktibo: Sa Pebrero ang usa ka linaing paningkamot gisugdan sa pagtabang sa mga di-aktibo. Kon adunay pipila nga wala pa maduaw nga iya sa magbalantay, ang mga ansiyano kinahanglang maghikay sa pagduaw kanila sa dili pa gayod matapos ang Abril. Ang mga ansiyano manlimbasog sa pagtino sa lintunganayng hinungdan sa suliran sa maong indibiduwal ug kon unsaon sa pagtabang kaniya sa labing maayong paagi nga maaktibo pag-usab sa pag-alagad kang Jehova. Kining mahigugmaong tabang magpakita nga seryosong gidawat sa mga ansiyano ang ilang responsabilidad ingong mga magbalantay sa “panon sa Diyos.” (1 Ped. 5:​2; Buh. 20:28) Ang Septiyembre 15, 1993, isyu sa Ang Bantayanang Torre, mga panid 22-3, nagtaganag ekselenteng mga sugyot nga magamit sa mga ansiyano sa dihang maghisgot sa bisan unsa sa lima ka komon nga mga suliran nga tingali nag-apektar sa mga di-aktibo. Sa mithianong paagi, ang pipila mahimo pang magmaaktibo pag-usab diha sa ministeryo sa kanataran sulod sa Abril.

⁵ Tabangi ang Daghan pa sa Pagkahimong Di-Bawtismadong mga Magmamantala: Nahimo na bang takos ang imong mga anak ingong bag-ong mga magmamantala sa maayong balita? Komosta na man ang uban nga imong ginatun-an sa Bibliya? Kon ang maong mga tawo giaprobahan sa mga ansiyano, dili ba ang Abril maoy haom nga panahon alang kanila sa pagsugod sa pagmantala? Kon ang usa ka tawo miuswag ug nakatuon na sa brosyur nga Gikinahanglan ug sa librong Kahibalo, ang pagtuon sa Bibliya mahimong ipadayon sa ikaduhang libro​—mahimong ang librong Pulong sa Diyos, librong Matuod nga Kalinaw, o ang librong Nahiusa sa Pagsimba. Ang imong tumong mao ang pagtabang sa estudyante nga makab-ot ang mas dakong pagsabot sa kamatuoran, mahimong takos ingong di-bawtismadong magmamantala, ug mahimong dedikado ug bawtismadong Saksi ni Jehova.​—Efe. 3:​17-​19; 1 Tim. 1:​12; 1 Ped. 3:21.

⁶ Ang imong mapinadayonon ug tiunay nga interes sa imong mga estudyante sa Bibliya makatabang kanila sa ngadtongadto sa paghimo sa kamatuoran nga ilaha. Usa ka Saksing lalaki nakahibalag ug magtiayong tigulang kinsa kinasingkasing nga miuyon sa pagtuon sa Bibliya. Apan ang magtiayon nag-oktaba sa pagtuon sa tulo ka sunodsunod nga semana. Sa ngadtongadto ang pagtuon nasugdan. Dayon, ang magtiayon nagkanselar sa pagtuon halos matag duha ka semana. Apan, sa kataposan, ang asawa miuswag ngadto sa punto sa bawtismo. “Human siya mabawtismohi,” ang igsoong lalaki nahinumdom, “ang iyang mga mata napuno sa mga luha sa kalipay, nga nagpatulo sa mga luha sa kalipay sa akong asawa ug kanako.” Oo, ang pagkahimong “okupado kaayo” sa maayong balita magpatunghag dakong kangaya!

⁷ Ang tagna sa Bibliya ug mga hitabo sa kalibotan nagpaila nga kita nagkinabuhi sa talitapos nga bahin sa panahon sa kataposan. Karon maoy panahon nga ang tibuok katawhan sa Diyos kinahanglang mahimong “okupado kaayo” sa pagpahibalo sa maayong balita ngadto sa uban. Ang apostol nga si Pablo naghatag ug pasalig nga ang maong paghago tinong “dili makawang may kalabotan sa Ginoo.”​—1 Cor. 15:58.