Pagpamatuod Ingong Maayong Silingan
1 Si Jesus miingon nga “higugmaon mo ang imong silingan sama sa imong kaugalingon.” (Mat. 22:39) Sa walay duhaduha, ikaw ‘nagbuhat ug maayo’ ngadto sa mga isigkamagtutuo, apan mahimo ba nimong pasangkaron ang imong gugma ngadto sa mga tawo nga nagpuyo sa kasikbit? (Gal. 6:10) Sa unsang mga paagi?
2 Pinaagi sa Pagpaila sa Imong Kaugalingon: Nahibalo ba ang imong mga silingan nga ikaw usa ka Saksi? Kon wala, nganong dili duawon sila diha sa pag-alagad sa kanataran? Ang mga resulta hayan magpahingangha kanimo! O kon imong gibating mas komportable, sulayi ang pagpamatuod ngadto kanila sa impormal nga paagi. Kon anaa sa gawas, mahimong makita mo sila nga nagtrabaho sa ilang nataran o liningawlingaw nga nagalakaw sa dalan. Duola sila uban sa mainitong pahiyom. Paningkamoting ipakigsulti ang bahin sa imong mga gituohan, ang dapit sa Kingdom Hall, ug kon unsay ginahimo didto, ug ipahibalo kanila kon kinsa pa sa kasilinganan ang nagatambong. Dapita sila ngadto sa mga tigom. Magmadeterminado sa paghatag ug bug-os nga pamatuod bahin sa maayong balita ngadto sa tanan nimong kaila.—Buh. 10:42; 28:23.
3 Pinaagi sa Imong Sulondang Panggawi: Ang imong mahigalaong panggawi daghan kaayog ikasulti bahin kanimo ug hayan mag-abli sa dalan sa pagpamatuod. Kini usab ‘makadayandayan sa pagtulon-an sa Diyos.’ (Tito 2:7, 10) Ipakita ang tiunay nga interes sa imong mga silingan. Magmahigalaon ug magmasinaboton. Tahora ang ilang katungod sa pribasiya ug hilom nga palibot. Kon usa kanila masakit, magmahunahunaon ug magtanyag ug tabang. Sa dihang ang usa ka bag-ong pamilya motapo sa kasilinganan, hapit aron abiabihon sila. Ang maong mabinationg mga lihok magbilin ug maayong impresyon ug magpahimuot kang Jehova.—Heb. 13:16.
4 Pinaagi sa Hitsura sa Imong Propiedad: Ang pagkahimong maayong silingan naglakip sa pag-atiman sa imong balay aron kini presentable. Ang balay ug nataran nga hinlo ug madanihon maoy usa ka pamatuod mismo. Apan ang balay nga hugaw o adunay linabay nga mga butang nga ginapasagdan lagmit magpasimang sa mensahe sa Gingharian. Busa, hinungdanon kaayo nga ang imong balay, nataran, ug mga sakyanan kanunayng hinlo ug maayo ang kondisyon.
5 Ang pagpakitag kahangawa alang niadtong anaa sa gawas sa Kristohanong kongregasyon magpasundayag ug gugma alang sa imong mga silingan. Unsay mahimong sangpotanan? Malagmit mao nga “ingong resulta sa inyong maayong mga buhat,” ang pipila kanila “maghimaya sa Diyos.”—1 Ped. 2:12.