“Ang Pulong sa Diyos . . . Gamhanan”

¹ “Ang pulong sa Diyos buhi ug gamhanan,” misulat ang apostol nga si Pablo. (Heb. 4:12) Unsay iyang gipasabot niana? Ang pulong sa Diyos, o mensahe, nga makaplagan diha sa Bibliya adunay kusganong impluwensiya diha sa mga tawo. Ang kaalam nga anaa sa Bibliya adunay gahom sa pag-usab sa kinabuhi sa usa alang sa ikaayo. Ang paghupay ug paglaom nga gitanyag niana magpasuod sa mga tawo ngadto sa Maghahatag-Kinabuhi, si Jehova nga Diyos. Ang mensahe niana makapalihok sa matinud-anog-kasingkasing nga mga tawo sa pagsubay sa dalan nga motultol sa kinabuhing walay kataposan. Apan, aron makita kini nga mga resulta, kinahanglan natong gamiton ang Bibliya sa dihang kita magpamatuod sa uban.

² Pagbasag Usa ka Teksto sa Matag Higayon: Maorag daghang magmamantala ang panagsa rang naggamit ug Bibliya diha sa pultahan. Tinuod ba kana kanimo? Tungod kay daghang tawo ang daw walay panahon alang sa dugaydugay nga panaghisgot, hayan inanay nimong gisagop ang batasan nga magtanyag na lamang ug literatura o isulti na lamang ang diwa sa usa ka teksto. Among gidasig ang tanang magmamantala sa paghimog makugihong paningkamot sa pagbasa ug labing menos usa ka bersikulo gikan sa Bibliya sa dihang magpresentar sa maayong balita, sa ingon magtugot sa tawo nga masabtan nga ang atong mensahe makaplagan gayod diha sa Pulong sa Diyos.

³ Bisan pag dili daghang tawo ang nagbatasan sa pagbasa sa Bibliya, sa katibuk-an kana gitahod gihapon. Bisan gani ang puliking mga tawo sagad mogahin ug usa o duha ka minutos aron maminaw sa mensahe nga deretsong gibasa gikan sa Pulong sa Diyos. Sa dihang ang haom nga teksto basahon nga mainiton ug ipatin-aw sa mubo, ang gahom sa pulong ni Jehova adunay maayong epekto diha sa mamiminaw. Apan unsaon man nimo paglambigit ang imong pangbukas nga mga komento ngadto sa pagbasa ug usa ka bersikulo gikan sa Bibliya?

⁴ Sulayi Kini Diha sa Buluhatong Pagmagasin: Usa ka nagapanawng magtatan-aw epektibong naggamit sa Kasulatan sa dihang nakig-ambit sa buluhatong pagmagasin. Ginasulod niya ang gamayng Bibliya sa iyang bulsa. Human ipresentar ang mga magasin ug sa mubo ipasiugda ang usa ka artikulo, ablihan niya ang Bibliya sa walay pagpanuko ug basahon ang usa ka bersikulo nga naglangkit sa artikulo. Mahimo kini pinaagig yanong pagsukna, “Unsay imong hunahuna bahin niining makapadasig nga saad?” ug unya mopadayon sa pagbasa sa usa ka piniling teksto.

⁵ Himoang imong tumong ang pagpaambit ug usa o duha ka bersikulo gikan sa Bibliya sa matag mamiminaw. Ang nagapalihok nga gahom niana makaabli sa dalan alang sa mas pang mga tawo nga masuod sa Diyos.​—Juan 6:44.