Mga Kombensiyon—Panahon sa Pagmaya!

¹ Ang mga kombensiyon sa mga Saksi ni Jehova maoy mga okasyon sa dakong pagmaya. Kapin na sa usa ka gatos ka tuig, kini nga mga panagkatigom nakaamot sa pag-uswag nga nalampos diha sa atong organisasyon. Nagsugod nga gamay, atong nakita ang dagayang mga panalangin ni Jehova sa atong tibuok-kalibotang buluhaton. Sa atong unang kombensiyon niining modernong panahon, sa Chicago, Illinois, sa 1893, usa ka total nga 70 sa 360 nga nanambong ang nabawtismohan ingong simbolo sa ilang pahinungod ngadto kang Jehova. Niining miaging tuig nga serye sa “Mga Magbubuhat sa Pulong sa Diyos” Distritong mga Kombensiyon dunay linangkob nga gidaghanon sa nanambong sa tibuok kalibotan nga 9,454,055, uban sa 129,367 nga nabawtismohan. Pagkakatingalahang hinungdan sa pagmaya!

² Sukad pa gayod sa kapanahonan sa Bibliya, ang mga panagkatigom sa katawhan sa Diyos nagtaganag talagsaong mga paagi sa paghatag ug instruksiyon gikan kang Jehova. Sa panahon ni Esdras ug Nehemias, ang katawhan nagpatalinghog sa pagbasa sa Balaod “sukad sa pagbanagbanag hangtod sa pagkaudto.” (Neh. 8:​2, 3) Tungod sa pagkabaton ug mas maayong pagsabot sa Balaod sa maong okasyon, ang katawhan nakasinati ug “pagmaya sa hilabihan.” (Neh. 8:​8, 12) Kita usab magmaya nga ang mga kombensiyon nagtaganag maayong kahigayonan alang nato sa pagdawat ug maayong instruksiyon ug espirituwal nga pagkaon “sa hustong panahon” gikan kang Jehova pinaagi sa “matinumanon ug maalamong ulipon.” (Mat. 24:45) Sanglit si Jesus nag-ingon nga ang tawo kinahanglang mabuhi sa “matag pulong nga magagula sa baba ni Jehova,” ang mga kombensiyon mahinungdanon sa atong espirituwal nga kaayohan.​—Mat. 4:4.

³ Takos ang Panikaysikay Gayod Aron Makatambong: Kitang tanan angayng maghimo niini nga atong personal nga tumong sa pagtambong sa enterong “Mga Magtutudlo sa Pulong sa Diyos” Distritong Kombensiyon niining tuiga. Angay natong planohon nga makaabot nga sayo matag adlaw ug magpabilin hangtod nga kita makaduyog sa pag-ingog “Amen!” sa paniklop nga pag-ampo. Basin kinahanglang ipasibo nato ang atong eskedyul aron mapalampos kini. Ang pagkuhag bakasyon gikan sa atong trabaho aron makatambong sa kombensiyon mahimong makahatag ug pipila ka suliran. Kinahanglan kitang magmalig-on, nga dili ipamasin ang bisan unsa. Kon nagkinahanglan kitag sak-anan ug/o transportasyon, angay nga kita mohimog mga kahikayan daan. Bisan unsang panikaysikay nga atong himoon takos niini!

⁴ Ang katawhan ni Jehova wala magsukod sa mga panalangin sa pagtambong ug kombensiyon pinaagig salapi. Tagda ang mga panig-ingnan niadtong pipila nga determinadong mitambong sa 1958 Divine Will International Assembly of Jehovah’s Witnesses sa New York City. Usa ka igsoong lalaki nagsira sa iyang negosyo sa konstruksiyon sa duha ka semana aron makaboluntaryo sa iyang tabang ug makatambong sa asembliya. Ang usa ka igsoong lalaki sa Virgin Islands mibaligya ug duha ka ektaryang yuta aron ang iyang bug-os unom ka membro sa pamilya makatambong. Ang usa ka batan-ong magtiayon mibaligya sa ilang sakayang demotor aron ilang madala ang tanang tulo nila ka anak, nga nag-edad ug duha ka bulan hangtod pito ka tuig, ngadto sa asembliya. Tulo ka managsoong lalaki gikan sa California giingnan nga kon sila mopalta sa ilang mga trabaho, inig-uli nila ang maong mga trabaho dili na ila. Kadto, hinuon, wala makapugong kanila sa pagtambong niadtong halandomong asembliya.

⁵ Gantihan ni Jehova ang Atong Malugotong Panikaysikay: Makita ug magapanalangin si Jehova sa mga panikaysikay sa iyang katawhan. (Heb. 6:10) Ingong pananglitan, sa 1950 Theocracy’s Increase Assembly, kadtong nanambong nakapatalinghog sa hinungdanong pakigpulong nga “Bag-ong Sistema sa mga Butang.” Gipukaw ug giaghat ni Igsoong Frederick Franz ang interes sa tanan pinaagi sa pagsukna: “Kini bang internasyonal nga asembliya malipay nga mahibalo nga dinhi, karong gabhiona, sa atong taliwala, may daghang umaabot nga mga prinsipe sa bag-ong yuta?” Kapin sa 50 ka tuig sa ulahi, kita nagmaya gihapon niining gipatin-aw nga pagsabot sa Salmo 45:16.

⁶ Human makatambong sa distritong kombensiyon sa miaging tuig, misulat ang usa ka mapabilhong ulo sa pamilya sa mosunod: “Mga igsoon, wala lang mo masayod kon sa unsang paagi kining kombensiyona nakaluwas ug kinabuhi. Ang akong pamilya mibalhin sa siyudad tungod sa trabaho, lamang nakakaplag nga ang among espirituwalidad nagsusapinday. . . . Among napasagdan ang among Kristohanong mga obligasyon. Wala na gani kami motambong sa mga tigom ug sa pagpakig-ambit sa pagsangyaw. . . . Kini nga kombensiyon nagpalagsik namo pag-usab, ug sa makausa pa kami naghikay ug espirituwal nga mga tumong ug nagkahiusa sa pagpalampos niini.”

⁷ Si Jehova nagtagana kanato sa espirituwal nga pagkaon nga atong gikinahanglan. Iyang gibayang ang makabuhong nga lamesa diha sa atong mga kombensiyon. Ang atong pagpabili niining taganaha angayng magpaarang kanato sa pag-ingon sama sa gisulti ni Cornelio sa dihang giduaw siya ni apostol Pedro: “Niining panahona kaming tanan ania sa atubangan sa Diyos aron maminaw sa tanang butang nga gisugo kanimo ni Jehova nga isulti.” (Buh. 10:33) Himoon natong tumong nga ‘maanaa sa atubangan sa Diyos’ sa matag sesyon sa “Mga Magtutudlo sa Pulong sa Diyos” Distritong Kombensiyon niining tuiga ug magmaya!