Ginapabilhan Mo ba ang Sagradong mga Butang?
1 Sa dihang suknaon kon ato bang ginapabilhan ang sagradong mga butang, lagmit kita daling motubag nga oo! Unsa ang pipila sa sagradong mga tagana sa Diyos nga atong ginapabilhan?
2 Pagkabililhon nga atong gimahal ang personal nga relasyon nga gitugot kanato nga mahuptan uban sa atong langitnong Amahan! Siya nagpasalig kanato nga kon kita ‘moduol kaniya, siya moduol kanato.’ (Sant. 4:8) Kon wala ang halad lukat ni Jesu-Kristo, walay tawo nga makadawat ug kinabuhing walay kataposan. (Juan 3:16) Tungod sa tim-os nga pagkamapasalamaton, sa adlaw-adlaw atong ipahayag diha sa pag-ampo ang atong dulot nga pagpabili alang niining bililhong gasa sa Diyos.
3 Ang dinasig nga Pulong sa Diyos, ang Balaang Bibliya, maoy sagrado usab alang kanato, sama sa yutan-ong organisasyon ni Jehova. Atong ikapakita ang angayng pagpabili alang niining mga taganaha gikan kang Jehova sa dihang kita magkinabuhi sumala sa mga prinsipyo sa Bibliya, magpalig-on sa mga bugkos sa inigsoong gugma, mainampingong mosunod sa teokratikanhong kahikayan, ug makigtambayayong niadtong nanguna.—1 Ped. 1:22.
4 Pinaagi sa matinumanon ug maalamong ulipon, atong madawat ang dagayang espirituwal nga pagkaon. Tinuod kana niining tuiga didto sa “Mga Magtutuman sa Pulong sa Diyos” Distritong Kombensiyon. Didto atong madawat ang hinungdanong instruksiyon ug mapahimuslan ang mainitong panag-ubanay nga gikinahanglan gayod nato. Sa unsang paagi atong ikapakita ang kinasingkasing nga pagpabili alang niining sagradong tagana?
5 Ayawg Pasagdi ang Balay ni Jehova: Gitambagan ni Nehemias kadtong naghago sa pagtrabaho sa pagtukod pag-usab sa mga paril sa Jerusalem nga ‘dili pasagdan ang balay sa ilang Diyos.’ (Neh. 10:39) Karong adlawa, ang “balay” ni Jehova maoy iyang kahikayan alang sa pagsimba. Ang atong distritong mga kombensiyon maoy bahin nianang kahikayana. Nga dili pasagdan kini nga kahikayan, kita kinahanglang atua didto nga motambong ug magpatalinghog gayod, nga magpakita kang Jehova nga atong gipabilhan pag-ayo ang iyang mga tagana. (Heb. 10:24, 25) Unsang mga plano ang angayng himoon nato karon sa pagpakita nga kita bug-os nagpabili niining sagradong okasyon?
6 Tambongi ang Tanang Tulo ka Adlaw: Ang matag usa kanato kinahanglang maghikay aron matambongan ang tanang tulo ka adlaw sa kombensiyon. Ikaw ba nagplano sa pag-abot nga sayo sa matag adlaw ug sa pagpabilin hangtod sa kataposang pag-ampo sa Dominggo? Kon mao, ang dagayang mga panalangin maimo. Ang pagtambong sa kombensiyon tingali dili kanunayng sayon. Ang pagpasibo sa imong sekular nga trabaho tingali nagkinahanglan nga ikaw mobarog nga malig-on. Ang transportasyon tingali dili kanunayng kombenyente. Apan ayawg tugoti nga kining mga butanga magpaluya kanimo gikan sa pagtambong sa kombensiyon.
7 Tagda Kining Ekselenteng Panig-ingnan: Sa ilang pagpaingon ngadto sa usa ka distritong kombensiyon sa miaging tuig, usa ka grupo sa mga igsoon sa usa ka Aprikanhong nasod diin adunay sibil nga kagubot nakasugat ug usa ka grupo sa militar. Ang mga igsoon gipangutana: “Kinsa kamo, ug asa kamo paingon?” Sila mitubag: “Kami mga Saksi ni Jehova, ug kami mopaingon sa pagtambong sa distritong kombensiyon.” Usa sa mga sundalo mikomento: “Kamong mga Saksi ni Jehova walay bisan unsang gikahadlokan. Padayon lang, ug kamo makapahigayon sa inyong kombensiyon nga walay bisan unsang problema. Apan, hibaloi nga inyong masugatan ang daghang sundalo. Lakaw kanunay sa tunga sa dalan! Kon inyong makita ang daghang tawo nga nagpundok, padayon sa paglakaw sa tunga sa dalan!” Ilang gisunod kadto ug nakaabot nga luwas didto sa kombensiyon. Kining mga igsoona gigantihan tungod kay ilang gipasundayag ang ilang pagpabili sa sagradong mga butang.
8 Sama sa atong mga igsoon sa Aprika, kita usab makasugamak ug mga hagit. Apan sa walay duhaduha, mahimo natong sundogon ang ilang pagtuo ug magmalig-on sa pagtambong sa tanang sesyon sa atong distritong kombensiyon. Kon ang mga pagpasibo gikinahanglan, dangop kang Jehova alang sa giya, kay nahibalo nga siya mopanalangin sa atong mga paningkamot sa pagtambong sa tibuok programa.
9 Aniha ang mga Panalangin: Kita nangandoy sa Pulong sa Diyos, kay nahibalo nga pinaagi niana kita hayan molambo ngadto sa kaluwasan. (1 Ped. 2:2) Ang atong pagtambong sa distritong kombensiyon ug pagpatalinghog sa programa motabang sa matag usa kanato sa pagtukod ug mas lig-ong pagtuo niana nga Pulong ug sa ingon mas makaarang sa pagbarog sa mga pag-atake ni Satanas. Sa pagbuhat niana, atong ikapakita kang Jehova ug sa tanang tumatan-aw nga bug-os natong ginapabilhan ang sagradong mga butang ug “dili ang matang nga nagapanibog . . . kundili ang matang nga adunay pagtuo ngadto sa pagtipig nga buhi sa kalag.”—Heb. 10:39; 12:16; Prov. 27:11.
10 Kita mahimong makadahom sa pagbukas ni Jehova nga Diyos sa mga tamboanan sa langit ug magbubo kanato sa dagayang ulan sa espirituwal nga mga panalangin. (Mal. 3:10) Himoa kini nga imong tumong nga atua didto sa “Mga Magtutuman sa Pulong sa Diyos” Distritong Kombensiyon gikan sa pagsugod mismo sa programa sa buntag sa Biyernes hangtod sa paniklop nga pag-ampo ug “Amen!” sa hapon sa Dominggo. Magmalipayon ka kay gihimo mo kini!