Padayon sa “Pagbuhat ug Maayo”
1 Gihimo nimo ang maayong butang sa dihang nahimo ka nga alagad ni Jehova nga Diyos. Karon, hinuon, ang hagit niining makuyaw nga mga panahon mao ang pagpadayon sa “pagbuhat ug maayo.” (Gal. 6:9) Bisan tuod kini nagkinahanglag tinuod nga paningkamot, makahimo ka niini. Sa unsang paagi?
2 Ugmara ang Panghunahuna ni Jesus: Sama kang Jesus, makalahutay ka sa mga pagsulay kon padayon mong puntingon ang paglaom sa Gingharian. (Heb. 12:2, 3) Magmasaligon nga si Jehova nahigugma kanimo ug nga buot niyang molampos ka. (2 Ped. 3:9) Bug-os nga mosalig kaniya, malaomon nga siya motabang kanimo. (1 Cor. 10:13) Molahutay sa pag-ampo, nga nagahangyo kang Jehova nga tabangan ka nga makaagwanta. (Roma 12:12) Magmaya diha sa lig-ong pagtuo nga ang imong paglahutay motultol sa inuyonang kahimtang sa mga mata sa Diyos. (Roma 5:3-5) Ang imong pagkamatinumanon sa pag-ugmad sa “samang tinamdan sa pangisip nga nabatonan ni Kristo Jesus” maghatag kanimo ug personal nga katagbawan ug magpalipay sa kasingkasing ni Jehova.—Roma 15:5; Prov. 27:11.
3 Padayong Buhata ang Maayong mga Butang: Pahimusli sa bug-os ang mga tagana nga gihimo ni Jehova alang sa iyang katawhan sa pagtabang kanila sa padayong pagbuhat ug maayo. Hupti kanunay ang maayong personal nga rutina sa pagbasa sa Pulong sa Diyos ug sa pagtuon sa pinasukad-sa-Bibliyang mga publikasyon sa matinumanon ug maalamong ulipon nga matang. Sa pagkamatinumanon pangandam, tambong, ug pakig-ambit diha sa tanang tigom sa kongregasyon. Sa dili pa ug human sa Kristohanong mga tigom, pakig-uban nga suod sa imong espirituwal nga mga igsoong lalaki ug babaye. Paghimog realistikanhong mga tumong sa imong ministeryo aron mahuptan ang makahuloganong pagpakig-ambit diha sa pag-alagad sa kanataran ug aron mapauswag ang imong mga katakos sa pagpresentar sa maayong balita ngadto sa uban.
4 Mao kini ang paagi aron makapadayon ka sa pagbuhat ug maayo ug sa samang panahon matagamtam ang dakong kalipay. Bahin niini, usa ka igsoong lalaki sa Italya miingon: “Inig-abot sa gabii, ug sa mahauli na ako sa balay human sa usa ka adlaw diha sa pag-alagad kang Jehova, bation ko gayod ang kakapoy. Apan ako malipayon, ug nagpasalamat ako kang Jehova tungod sa paghatag kanakog kalipay nga walay usa nga makaagaw.” Busa, padayon sa pagbuhat ug maayo, ug ikaw usab makatagamtam ug dakong kalipay.