Bag-ong Programa sa Sirkitong Asembliya
Usa ka kahubitan sa kahadlok maoy “halalom nga pagtahod ug kataha, ilabina ngadto sa Diyos.” Kini nagbatbat sa angay nga kahadlok nga gitumong sa Kasulatan ingong “ang sinugdanan sa kaalam.” (Sal. 111:10) Sa kasukwahi, ang laing matang sa kahadlok naggahom sa kalibotan ni Satanas libot kanato. Sa unsang paagi malikayan nato kanang di-angay nga kahadlok samtang ugmaron ang matinahorong kahadlok kang Jehova? Ang bag-ong programa sa sirkitong asembliya sa 2002 nga tuig sa pag-alagad magtubag niining pangutanaha. Ang tema maoy “Kahadloki ang Diyos ug Ihatag Kaniya ang Himaya.” (Pin. 14:7) Atong masabtan ang daghang paagi nga ang kahadlok kang Jehova mohatag kanatog kaayohan ingong mga indibiduwal ug ingong usa ka organisasyon.
Bisan tuod ang kahadlok mahimong magpasabot ug kabalaka o kawalay-kaisog ug pagpanuko sa pag-atubang sa malisod nga mga kahimtang, ang Bibliya nag-ingon: “Malipayon ang matag usa nga nahadlok kang Jehova.” (Sal. 128:1) Ipakita kanato sa maong programa sa asembliya kon sa unsang paagi malamposon natong masagubang ang mga suliran sa matuod nga pagsimba. Atong makita kon unsaon pagtabang sa mga bag-ohan sa pag-ugmad sa maong angay nga kahadlok sa Diyos, nga maoy motukmod gayod kanila nga buot moalagad kaniya sa tibuok nilang kasingkasing, kalag, hunahuna, ug kusog. (Mar. 12:30) Ang unang adlaw pagatiklopan pinaagi sa pakigpulong sa magtatan-aw sa distrito nga “Suora pa Gayod Kadtong Imong Gihigugma.” Ipatin-aw niya kon sa unsang paagi makapabilin kitang alisto batok sa paningkamot sa Yawa sa pagpahilayo kanato gikan kang Jehova, sa atong pamilya, ug sa atong Kristohanong mga igsoon.
“Kahadloki si Jehova, Dili ang mga Tawo” mao ang tema sa upat-ka-bahin nga simposyum sa ikaduhang adlaw. Ipatin-aw niini kon ngano ug sa unsang paagi kinahanglan natong buntogon ang bisan unsang kahadlok nga mobabag kanato sa bug-os nga pagtuman sa atong ministeryo o sa paghupot sa atong integridad ug hinlo nga tanlag diha sa eskuylahan ug sa trabahoan. Ang pakigpulong publiko nga “Kahadloki ang Diyos ug Tumana ang Iyang mga Sugo” gibase sa sunodsunod nga mga panghitabo nga gihubit sa Pinadayag kapitulo 14. Ang maong sirkitong asembliya pagatiklopan pinaagig makapadasig nga pagtultol nga “Magpadayon sa Paglakaw Diha sa Kahadlok Kang Jehova.”
Ang Teokratikanhong Tunghaan sa Ministeryo, modelong Tigom sa Pag-alagad, pakigpulong sa bawtismo, ug sumaryo sa Pagtuon sa Bantayanang Torre maoy dugang dagkong puntos sa programa nga dili nimo buot sayloan. Dapita ang imong mga estudyante sa Bibliya sa pagtambong uban nimo. Si bisan kinsa nga buot magpabawtismo angayng magpahibalo sa nagadumalang magtatan-aw sa labing sayong maarangan. Ang tanan kanato buot nga magpasundayag sa atong angay nga kahadlok kang Jehova ug maghatag kaniya ug himaya pinaagig dili pagsipyat sa bisan unsang bahin niining talagsaong programa!