Paghimog Balaang Pag-alagad Uban ang Diyosnong Kahadlok
1 Sulod sa 1988 nga tuig sa pag-alagad, ang Sosyedad nakadawat ug daghang sulat nga nagpatugbaw sa kinasingkasing nga apresasyon alang sa sirkito asembliyang programang “Ang Nagalabaw nga Bili sa Pag-alagad Kang Jehova.” Kining mga sulata nagbutyag sa mga pagbati sama nianang sa salmista kinsa miingon: “Ang usa ka adlaw sa imong mga sawang mas maayo kay sa usa ka libo sa laing dapit.” (Sal. 84:10) Hibalo kami nga ang tanan kaninyo aduna ing susamang mga pagbati maylabot sa atong dakong pribilehiyo sa pag-alagad kang Jehova ug nga kamo nabenepisyohan usab gikan niining programaha.
2 Sugod sa Pebrero, ang bag-ong sirkitong asembliyang programa motagik sa temang “Paghimog Balaang Pag-alagad Uban ang Diyosnong Kahadlok.” (Heb. 12:28) Samtang ang kalibotan sa binuang nagasalikway kang Jehova ug nagatamay sa mensahe sa iyang Gingharian, kita nagakalipay sa atong pribilehiyo sa paghimog sagradong pag-alagad uban ang diyosnong kahadlok. Sa pagkamatuod, ang malunsay nga kahadlok kang Jehova mao ang “sinugdanan sa kaalam”; kini maoy “putli,” nga nagapalihok kanato sa pagbuhat sa iyang kabubut-on. (Sal. 19:9; 111:10) Ang sirkitong asembliyang programa para sa 1989 nga tuig sa pag-alagad makatabang kanato sa mas pa gayong pagpabili kon unsa ang pagkahadlok kang Jehova ug kon sa unsang paagi atong ikapadayag kana diha sa atong pag-alagad kaniya.
3 Samtang ang programa mabuksan, atong makat-onan kon sa unsang paagi ang diyosnong kahadlok mag-apektar gayod kanato diha sa atong ministeryo, diha sa atong pagtambong sa tigom, ug diha sa atong adlaw-adlawng pagkinabuhi. Ang panginahanglan nga sirhan ang bisan unsang kal-ang tali sa kon unsa ang atong nahibaloan ug kon unsa ang atong buhaton pagahisgotan. Kinahanglang mahibalo kita dili lamang kon unsa ang buhaton kondili usab kon sa unsang paagi ipadapat ang mga butang nga atong nakat-onan aron mabenepisyohan ang atong kaugalingon ug makahatag ug pagdayeg sa atong Diyos.
4 Ang pakigpulong publiko nga ipahayag sa mga magtatan-aw sa distrito may ulohang “Nganong Mahadlok sa Matuod nga Diyos?” Paneguroang dapiton ang imong mga ginatun-an sa Bibliya maingon man sa ubang mga interesado. Sa pagkamatuod, ang tanan kanato gustong maghikay sa atong mga kalihokan aron makatambong ug bug-os nga makabenepisyo gikan niining maanindot kaayong duha-adlaw nga programa. Ang inyong magtatan-aw sa sirkito magpahibalo kaninyo sa dapit ug mga petsa nga naeskedyol para sa inyong kongregasyon.