Bag-ong Sirkitong Asembliyang Programa
1 Dili ba kita moingon ngadto kang Jehova, sama sa gihimo sa matinumanong mga anak ni Kore: “Ang usa ka adlaw sa imong mga sawang labi pang maayo kay sa usa ka libo sa laing dapit”? (Sal. 84:10) Nan, kita magakalipay sa sirkitong asembliyang programa alang sa 1988, sugod sa Pebrero, nga magapasiugda sa tema, “Ang Nagalabaw nga Kabililhon sa Pag-alagad Kang Jehova.”—Filip. 3:7, 8.
2 Ang katuyoan sa programa mao ang pagtabang kanatong mopabili pang bug-os sa talagsaong pribilehiyo sa pag-alagad kang Jehova ilabina niining panahona. Gipahimutang ni Jesu-Kristo ang hingpit nga panig-ingnan sa panghunahunang ang pag-alagad lamang sa Diyos mao ang gipunting. Gikinahanglan tang huptan ug mentinahon ang iyang tinamdan. (Filip. 2:5-8) Ang sirkitong asembliyang programa moabag kanatong analisahon ang atong tinagsatagsa nga pag-alagad sa Diyos ug sa pagtino kon diin kita makapauswag pa.
3 Sagad atong madungog ang panultihong “espiritu sa payunir.” Unsa man ang espiritu sa payunir? Unsaon sa tanang katawhan ni Jehova sa pagpakita nga sila nakabaton niana? Kining mga pangutanaha pagatubagon. Ang Kasulatanhong tambag igatagana kon sa unsang paagi ato gayong pagaisipon ang pagsupak sa atong ministeryo ug kon unsaon ta nga makabuntog niana. Ang mga batan-on makadawat ug pagpalig-on ug mabuligan sa pagsusi sa ilang pagmanggad (pagpabili) maylabot sa mga dulang pakusog, mga sine, ug mga programa sa telebisyon. Dugang pa, pagahisgotan man ang daghang kahigayonan sa pag-alagad nga bukas ngadto sa mga tigulang.—Isa. 48:17, 18.
4 Ang usa ka bahin sa programa magpunting sa mga kalihokan sa pamilya. Nag-ulohan kinig “Pagpalig-on sa Panimalay nga Nagaalagad Kang Jehova.” Ang panginahanglan sa maayong komunikasyon sulod sa banay pagahisgotan ug igapasundayag. Ang mga gumonhap o sukna bahin sa sekular nga edukasyon sa mga anak diha sa Kristohanong mga panimalay pagatagdon.
5 Kita gayong tanan maghimog mga plano sa pagtambong niining sirkitong asembliya ug magmatinagdanon sa mga butang nga atong mapatalinghogan.—Heb. 2:1.