United by Divine Teaching—Pagtan-aw sa Tinuod nga Inigsoong Panaghiusa
Usa ka magtatan-aw sa sirkito mitambong sa pagtuon sa Bibliya nga gidumala uban sa usa ka babaye nga wala pa makasugod pagtambong sa mga tigom sa kongregasyon. Gidapit niya siya sa pagtan-aw sa video nga United by Divine Teaching. Nianang semanaha siya mitambong sa tigom ug miingon nga siya malipayon kaayo nga atua didto. Nganong kini nga video nakabaton sa maong dihadihang mga resulta? Ang maong babaye nakadayeg sa paghulagway niini sa atong bililhong inigsoong panaghiusa nga nagalihok taliwala sa mapintas, madumtanong kalibotan.—Juan 13:35.
Tan-aw niini nga video aron makita ug mabati ang pakigdait ug gugma nga gitagamtam taliwala sa mga Saksi ni Jehova palibot sa yuta. Dayon palandonga kini nga mga pangutana:
(1) Nganong ang “Divine Teaching” haom nga tema alang sa 1993-94 nga mga kombensiyon?—Miq. 4:2.
(2) Unsay kahulogan sa kamatuoran sa Bibliya alang sa pipila ka pamilya? Unsay kahulogan niini alang kanimo?
(3) Nganong hinungdanon nga matudloan ni Jehova?—Sal. 143:10.
(4) Unsang matang sa mga suliran ang kinahanglang buntogon sa pag-andam sa dagkong internasyonal nga mga kombensiyon?
(5) Sa unsang paagi imong nakita nga napamatud-ang tinuod ang Salmo 133:1 ug Mateo 5:3 didto sa Kristohanong mga kombensiyon nga imong natambongan?
(6) Unsang publikong pamatuod ang anaa bahin sa kusganong mga epekto sa diyosnong pagtulon-an?—Pin. 7:9.
(7) Unsa ang kinadak-ang dinaghang bawtismo sa matuod nga mga Kristohanon sukad?
(8) Unsang mga pulong ni Miqueas, Pedro, ug Jesus ang natuman taliwala sa mga Saksi ni Jehova?
(9) Unsay nagpamatuod kanimo nga ang malipayon, hiniusang tawhanong pamilya dili damgo lamang?
(10) Ngadto kang kinsa ipasalida nimo kini nga video, ug ngano?
Human makatan-aw niini nga video, usa ka sister sa tiningob maayong miasoy niini: “Ang maong video makatabang ug dako kanako sa paghunahuna kanunay nga daghan kaayong Kristohanong mga igsoong lalaki ug babaye sa tibuok kalibotan nga sa pagkakaron mismo maunongong nag-alagad kang Jehova. . . . Pagkabililhon gayod sa atong inigsoong panaghiusa!”—Efe. 4:3.