Ugmara ang Imong mga Gahom sa Pagsabot

¹ Ang malisod nga kataposang mga adlaw, nga ang atong kaugalingon anaa niana karon, nagpatunghag dugang mga kapit-osan ug grabeng mga pagsulay sa daghang matang nganha sa katawhan sa Diyos bisan asa. (2 Tim. 3:1-5) Tanan kanato nagkinahanglag pagdasig aron makabarog nga lig-on diha sa pagtuo. (1 Cor. 16:13) Mahimo nato kana uban sa tabang ni Jehova samtang padayon kitang regular nga mokaon sa iyang Pulong, mosalig sa iyang espiritu, ug mounong sa iyang organisasyon.​—Sal. 37:28; Roma 8:​38, 39; Pin. 2:10.

² Uban sa maayong katarongan, gimugna ang tema nga “Magpakahingkod sa mga Gahom sa Pagsabot” sa miaging tuig nga programa sa adlawng espesyal nga asembliya. Gibase kadto sa 1 Corinto 14:​20, diin atong mabasa ang mga pulong ni apostol Pablo: “Mga igsoon, ayaw kamo pagpakabata sa mga gahom sa pagsabot, hinuon magpakabata sa pagkadaotan; apan magpakahingkod sa mga gahom sa pagsabot.” Unsay imong hunahuna sa maong programa?

³ “Pagkamakapadasig!” “Mao gayod kini ang atong gikinahanglan!” Kana ang duha lamang sa mga sanong. Bisan ang usa ka di-Saksi nga mitambong sa adlawng espesyal nga asembliya aron motan-aw sa iyang 12-anyos nga anak nga babaye nga mabawtismohan miingon nga nakadayeg kaayo siya sa programa ug iyang nasabtan kon sa unsang paagi makahatag kinig kaayohan sa iyang pamilya. Mao ba kanay imong gibati? Atong sublion ang pipila sa dagkong puntos sa maong programa.

⁴ Gikinahanglan ang Tukmang Kahibalo sa Pag-ugmad sa mga Gahom sa Pagsabot: Sa pangbukas nga pakigpulong, “Ugmara Karon ang Imong mga Gahom sa Pagsabot,” unsay gipasiugda sa mamumulong nga gikinahanglan aron masagubang ang mga suliran karon? Nagkinahanglan kitag labaw pa kay sa katakos lang sa panghunahuna. Kinahanglang atong ugmaron ug palalomon ang atong mga gahom sa pagsabot sa Bibliya, basin madaog kita sa tanang kadaotan nga niana kita naladlad. Kini nga pagsabot nagkinahanglan sa pagtultol sa Diyos. Sama sa salmista, kita gayod mainampoong mohangyo kang Jehova aron masabtan nato ang iyang mga balaod ug mga pahinumdom aron nga makaalagad kita kaniya sa bug-os-kasingkasing.​—Sal. 119:​1, 2, 34.

⁵ Sa sunod nga bahin, gibutyag sa magtatan-aw sa sirkito nga si Jehova, pinaagi sa iyang Pulong ug organisasyon, naghatag kanato ug “Mga Tabang sa Pagkahimong Hingkod sa Pagsabot sa Bibliya.” Ang pagsabot gihubit ingong “ang katakos sa pagtukib sa usa ka butang ug pag-ila sa kalangkoban niana pinaagi sa pagsabot sa mga kalangkitan tali sa mga bahin niana ug sa katibuk-an, sa ingon nasabtan ang kahulogan niana.” Kinsay makatabang kanato sa pag-ugmad niana nga katakos? Si Jehova naghatag ug mga gasa nga mga lalaki aron motabang kanato nga makahimog espirituwal nga pag-uswag. (Efe. 4:​11, 12) Ang iyang yutan-ong organisasyon nag-agda kanato sa pagbasa sa Pulong sa Diyos kada adlaw ug sa pagtambong nga regular sa tanang tigom sa kongregasyon. (Sal. 1:2) Gitudloan kita kon unsaon paggamit sa Bibliya ug sa atong Kristohanong mga publikasyon diha sa personal ug pamilyahanong pagtuon maingon man diha sa pagpangandam sa mga tigom ug sa pag-alagad sa kanataran. Napahimuslan na ba nimo kining tanang taganaha? Ginahuptan ba nimo ang regular, personal nga programa sa pagbasa sa Bibliya? Mahinungdanon kini kon buot natong mapanalipdan gikan sa pagkabiktima sa kalibotanong mga hilig, urog, pilosopiya, ug malimbongong mga impluwensiya.​—Col. 2:6-8.

⁶ Kinahanglang Mabansay ang Atong mga Gahom sa Pagsabot: Sa iyang unang pakigpulong, nga nag-ulohang “Panalipdi ang Espirituwalidad Pinaagig Pagbansay sa Imong mga Gahom sa Pagsabot,” ang bisitang mamumulong nagpatin-aw nga kadtong anaa sa kalibotan dili makaila sa husto gikan sa sayop. (Isa. 5:​20, 21) Kini gumikan sa ilang pagdumili sa pag-ila ug pagtuman sa matarong nga mga sukdanan sa Diyos. Sa kasukwahi, kitang nakadawat sa espirituwal nga pagbansay diha sa organisasyon ni Jehova nag-ila sa mga sukdanan sa Diyos, nga nagsilbi ingong giya sa atong mga kalihokan ug panggawi. Sa ingon, anaa kita sa kahimtang nga pamatud-an sa atong kaugalingon kon unsay maayo ug dalawaton sa mga mata ni Jehova ug kon unsay nahiuyon sa iyang hingpit nga kabubut-on.​—Roma 12:2.

⁷ Aron malikayan ang makalibog nga panghunahuna sa kalibotan ug ang naganunot daotang sangpotanan, kita gayod padayong magbansay sa atong mga gahom sa pagsabot. Sa unsang paagi mapalampos kini? Sumala sa narekord sa Hebreohanon 5:12-14, si apostol Pablo nagpasiugda sa panginahanglan sa pagkaon ug labaw pa kay sa “gatas” lamang sa pulong. Gikinahanglan nato ang gahi espirituwal nga pagkaon, sama sa atong ginadawat diha sa pagtuon sa tagna ni Isaias didto sa Pagtuon sa Libro sa Kongregasyon. Dayon kinahanglang andam kita sa pagpadapat sa atong nakat-onan diha sa atong mga kinabuhi. Kon buhaton nato kana, kita kombinsido sa pagkahusto sa mga prinsipyo ug mga sukdanan ni Jehova. Kini magbansay sa atong mga gahom sa pagsabot aron tin-awng mailhan ang husto ug sayop.

⁸ Ikasubo, ang pipila mikupoy sa espirituwal. Ngano man? Wala nila isentro ang ilang pagtagad sa kon unsay maayo ug matul-id sa mga mata ni Jehova. Ingong resulta, sila nabiktima sa mga programa sa radyo ug telebisyon nga adunay pagkasupak sa Kasulatan, sa makadaot nga musika, o sa daotang mga impluwensiya diha sa mga chat room sa kompiyuter. Pinaagi sa paglihok nga maalamon, makalikay kita nga maimpluwensiyahan sa imoral, hungog, o daotang mga tawo.​—Prov. 13:20; Gal. 5:7; 1 Tim. 6:​20, 21.

⁹ Mga Batan-on Kinahanglang “Magpakabata sa Pagkadaotan”: Ang programa dunay duha ka bahin nga espesipikong nagdasig sa mga batan-on nga ugmaron ang ilang mga gahom sa pagsabot. Gipakita sa mga mamumulong nga ang pagkahimong ‘bata sa pagkadaotan’ nagkahulogan nga magpabiling way-kasinatian, nga mao, inosente sama sa mga bata, maylabot sa mga butang nga mahugaw sa panan-aw ni Jehova. (1 Cor. 14:20) Gidasig kitang tanan nga magbantay pag-ayo kon sa unsang paagi gamiton ta ang atong panahon aron masuklan ang pagkaladlad ngadto sa tanang matang sa pagkadaotan ug malikayan ang pagkamahugawan niana. (Efe. 5:15-17) Gidasig kita sa pagkuwenta kon unsa ka daghang panahon ang atong gigugol sa pagbasag mga materyal nga dili gayod makaamot sa atong pag-uswag diha sa pagsabot sa espirituwal nga mga butang. Gibuhat mo ba kana? Unsay gibutyag sa mga resulta? Dugang pa sa pagbasa sa Bibliya adlaw-adlaw, magmadeterminado sa pagsunod sa pagbasa sa materyal nga gihatag sa organisasyon. Ang pagbuhat niini makatabang natong tanan, lakip sa mga batan-on, nga ‘mabatonan ang pagsabot.’​—Prov. 4:7-9.

¹⁰ “Pagkuhag Kaayohan Tungod sa Pagpadapat sa mga Prinsipyo sa Bibliya Uban ang Pagsabot”: Mao kana ang tema sa paniklop nga pakigpulong sa programa sa adlawng espesyal nga asembliya. Ang dinapit nga mamumulong nagpatin-aw nga si Jehova mao ang Tinubdan sa nagahatag-ug-kinabuhi nga pagsabot, nga maoy labaw gayod kaayo kay sa tanang tawo. Hunahunaa lang nga nakabaton sa kahigayonan nga makakuha sa pagsabot ni Jehova! Iyang madagayaong ihatag kana ngadto kanilang sinserong nangita niana ug nangayo niana diha sa pagtuo. (Prov. 2:3-5, 9; 28:5) Bug-os mo bang gipahimuslan ang iyang tanyag?

¹¹ Gidasig kita sa pagkat-on sa pag-ila sa mga prinsipyo samtang atong ginabasa ang Bibliya. (2 Tim. 3:​16, 17) Mainampingong tun-i kana aron mabatonan ang tukmang pagsabot kon unsay gisulti ni Jehova. Gahinig panahon ang pagpamalandong niining mga prinsipyoha ug isilsil kini diha sa imong hunahuna ug kasingkasing. Kini mobansay sa imong mga gahom sa pagsabot aron magmalamposon ka sa dihang mohimog mga desisyon sa kinabuhi. (Jos. 1:8) Tagdon nato ang pipila ka kahimtang nga giatubang sa daghan ug susihon kon sa unsang paagi ang pagpadapat sa mga prinsipyo sa Bibliya makatabang kanato nga molampos.

¹² ‘Angay ko bang sundon ang usa ka tinong estilo sa panapot ug pamostura?’ Ang maurogon nga mga hilig sa kalibotan sa sinina ug pamostura sagad nagbanaag sa espiritu sa rebelyon. Ang maong espiritu nag-impluwensiya sa mga tawo sa pagbesti nga naglago ug di-madanihon o sa pagpagarbo sa seksuwalidad. Unsang mapadapat nga mga prinsipyo sa Bibliya ang makatabang kanato sa pagsanta sa maong mga hilig? Kay nakabansay sa atong mga gahom sa pagsabot, atong tagdon ang prinsipyo nga makaplagan diha sa 1 Timoteo 2:​9, 10, nga magbesti “uban ang pagkamakasaranganon ug maayong panghunahuna . . . , sa paagi nga nahiangay sa [katawhan] nga nagpaila nga masimbahon sa Diyos.” Ang ubang mga prinsipyo nga mapadapat naglakip nianang gihisgotan sa 2 Corinto 6:3 ug Colosas 3:​18, 20.

¹³ ‘Unsay akong himoon aron magpabiling lig-on ang bugkos sa akong pamilya?’ Mahinungdanon ang maayong komunikasyon taliwala sa mga membro sa pamilya. Ang Santiago 1:19 nag-ingon kanato: “Ang matag usa kinahanglang magmaabtik sa pagpaminaw, magmahinay sa pagsulti, magmahinay sa pagkapungot.” Ang mga membro sa pamilya angayng maminaw ug makigsulti sa usag usa tungod kay ang komunikasyon sa pamilya nagkahulogang pagsulti ug pagpamati sa usag usa. Bisan pa kon ang atong isulti tinuod, kon isulti kini sa mapintas, mapahitas-on, o di-mabinationg paagi, lagmit mohatag kinig kadaot inay kaayohan. Busa kon kita usa ka bana o asawa, ginikanan o anak, angay nga ang atong sinultihan “kanunayng madanihon, tinimplahan ug asin.”​—Col. 4:6.

¹⁴ ‘Naapektohan ba ako sa materyalismo?’ Ang materyalismo maoy kalibotanong pagpit-os nga makahatag ug dugang kalisod sa kinabuhi sa usa. Dili kana makatabang sa usa ka tawo sa pagkab-ot sa tinuod nga kalipay. (Eccl. 5:10; Luc. 12:15; 1 Tim. 6:​9, 10) Aron matabangan kita nga makalikay sa lit-ag sa materyalismo, si Jesus mitudlo kanato niining hinungdanong prinsipyo: Hupti ang yanong mata. Ang pagkinabuhing balanse, dili komplikado nga kinabuhi naglakip sa pagsentro sa atong mga mata sa intereses sa Gingharian, nga naghimo sa tanang ubang butang nga ikaduha lamang.​—Mat. 6:​22, 23, 33.

¹⁵ Kon Unsa Gayod ang Atong Tumong: Anaa sa Pulong sa Diyos ang kasaligang tinubdan sa matarong nga mga prinsipyo nga mogiya kanato sa paghimog mga desisyon. Kinahanglan natong makat-onan kining mga prinsipyoha, palandongon kini, ug sabton kon sa unsang paagi mapadapat kini diha sa atong mga kinabuhi. Busa pinaagi sa ‘pagbansay sa atong mga gahom sa pagsabot aron sa pag-ila sa maayo ug sa daotan,’ kita makakuhag kaayohan sa atong kaugalingon ug makapasidungog kang Jehova.​—Heb. 5:14.