Bag-ong Programa sa Sirkitong Asembliya
Nahibalo kita nga si Jehova nga Diyos takos sa atong gugma ug sa atong eksklusibong debosyon. Apan, ang kalibotan nagtinguha sa paghaylo kanato nga dili mamentinar ang atong suod nga relasyon uban kaniya. (Juan 17:14) Aron mapalig-on ang atong gugma kang Jehova ug magmakusganon kita sa pagsukol sa mga butang sa kalibotan nga magpameligro sa atong espirituwalidad, ang bag-ong programa sa sirkitong asembliya sa 2001 maghupot sa tema niini nga “Higugmaa ang Diyos—Dili ang mga Butang sa Kalibotan.”—1 Juan 2:15-17.
Ang halalom nga gugma kang Jehova magtukmod kanato sa paghatag ug pamatuod bahin kaniya. Bisan pa niana, ang pag-alagad sa kanataran dili sayon alang sa daghan sa katawhan sa Diyos. Diha sa bahin nga “Gugma sa Diyos Magpalihok Kanato sa Atong Ministeryo,” kat-oni kon unsa ka daghan ang nakabuntog sa kamaulawon ug ubang kababagan aron makig-ambit sa bug-os niini nga buluhaton.
Sa unsang paagi ang nagaus-os nga mga sukdanan sa kalibotan nag-impluwensiya kanato? Ang mga lihok nga kaniadto giisip nga daotan sa pagkakaron gikaingon nang normal nga panggawi. Ang pakigpulong nga “Mga Mahigugmaon Kang Jehova Dumti ang Daotan” ug ang simposyum nga “Mga Butang sa Kalibotan—Giunsa Nato Paglantaw Kini?” mopalig-on sa atong determinasyon sa pagdumili sa sayop nga mga tinguha.
Ang modelong Tunghaan sa Teokratikanhong Ministeryo ug Tigom sa Pag-alagad ilakip diha sa programa, maingon man sa sumaryo sa tun-anang artikulo sa Bantayanang Torre sa maong semana. Ang pakigpulong publiko, “Kon sa Unsang Paagi ang Gugma ug Pagtuo Modaog sa Kalibotan,” modasig kanato sa pagsundog kang Jesus sa pagsukol sa kalibotanong mga pagpit-os. (Juan 16:33) Paneguroa ang pagdapit sa imong mga estudyante sa Bibliya sa pagtambong. Ang si bisan kinsang buot magpabawtismo kinahanglang mosulti sa nagadumalang magtatan-aw sa sayo nga maarangan aron ang gikinahanglang mga kahikayan mahimo.
Kini nga sirkitong asembliya magsentro sa atong pagtagad diha gayod sa luna nga ang atong gugma angayng isentro aron matagamtam ang dagayang mga panalangin ni Jehova. Ayawg sipyata ang bisan hain niana!