Bag-ong Programa sa Adlawng Espesyal nga Asembliya
Ang tagana sa mga adlawng espesyal nga asembliya nagsugod sa 1987. Kining usa-ka-adlaw nga mga panagkatigom napamatud-ang makapalig-on alang sa mga alagad ni Jehova ug sa mga interesado nga motambong. Sugod sa Pebrero, 1999, ang usa ka bag-ong programa sa adlawng espesyal nga asembliya ipresentar. Imong makaplagan ang siyam ka pakigpulong ug ubay-ubayng mga interbiyo ug mga kasinatian nga mapuslanon sa espirituwal nga paagi.
“Ipakita ang Kinasingkasing nga Pagpabili sa Lamesa ni Jehova” mao ang tema sa bag-ong programa. (Isa. 65:14; 1 Cor. 10:21) Magpalig-on kini sa atong gikauyonan nga ang atong pagsimba kang Jehova kinahanglang panguna diha sa atong mga kinabuhi. (Sal. 27:4) Ang bahin sa magtatan-aw sa sirkito maghisgot sa “Pagsusi sa mga Hilig sa Atong mga Kasingkasing” maylabot sa pagtambong sa tigom. Ang dinapit nga mamumulong (o usa ka lokal nga igsoon kon walay nagaduaw nga mamumulong nga presente) mopakita kanato kon unsaon “Pagmentinar sa Espirituwalidad Pinaagig Pagkaon Diha sa Lamesa ni Jehova.” Ang praktikal nga pagdasig ihatag usab ngadto sa mga batan-on diha sa organisasyon ni Jehova aron sa pagmentinar sa kalig-on sa pag-alagad sa Diyos. Ang pangunang pakigpulong sa nagaduaw nga mamumulong, nga nag-ulohag “Napalig-on sa Espirituwal Aron Ihatag ang Maisogong Pagpamatuod,” magpakita kon sa unsang paagi ang mga taganang gihimo pinaagi sa kongregasyon magsangkap kanato sa pagpamatuod nga maisogon bahin sa Gingharian. Kinsay dili gustong makabenepisyo gikan niining programaha?
Ang mga bag-ong nagpahinungod nga buot mabawtismohan kinahanglang mopahibalo sa nagadumalang magtatan-aw sa sayo nga maarangan. Kita masaligon nga samtang atong sugdan ang kahikayan sa ika-12 nga tuig sa adlawng espesyal nga asembliya, ang tanang motambong mapalig-on sa espirituwal alang sa buluhaton sa unahan.