Tinoa ang Labawng Hinungdanong mga Butang
1 Ang suplemento sa Marso, 1987 Atong Ministeryo sa Gingharian nagpahibalo sa mga kahikayan alang sa usa ka adlaw sa espesyal nga asembliya sa matag sirkito sugod sa 1988. Atong sugdan kini nga kahikayan sa Marso, 1988 sa Pilipinas. Sa pipila ka kaso tingali posibleng ang usa ka Bethel nga mamumulong makaapil sa programa uban sa magtatan-aw sa sirkito ug sa ubang ansiyano sa sirkito. Himoon usab ang kahikayan alang sa bawtismo.
2 Ang tema sa programa sa unang espesyal adlawng asembliya mao unya ang “Tinoa ang Labawng Hinungdanong mga Butang.” (Filip. 1:9, 10) Kadtong buot makapahimulos sa kaluwasan nga gisaad ni Jesus kinahanglang molihok nga maalamon ug sa walay langan. (Lucas 21:28) Kinahanglan nila ang tabang sa pagbatog mga tubag sa ilang mga pangutana ug mobarog nga lig-on dapig sa kamatuoran. Ang praktikal nga impormasyon itagana kon unsaon pagtultol sa mga bag-ohan ngadto sa organisasyon.
3 Dugang pa sa pagtabang sa uban nga motubo sa espirituwal, ang matag usa kanato kinahanglan usab mopadayon sa paghimog espirituwal nga pag-uswag. Ang programa nagatagad niining seryosong butang pinaagi sa paghatag ug makatabang nga mga sugyot sa pagpakita kon unsa gayod ang mahimo pinaagi sa pagtugkad sa laglom pang mga butang sa Pulong sa Diyos.—1 Cor. 2:10.
4 Ang usa ka bahin sa programa mohatag ug makapakombinsir nga ebidensiya sa atong pagka may igong katakos sa pag-alagad nga mga ministro sa Diyos. Sa kataposang bahin, makadungog kag mga kasinatian ug mga taho nga nagapakitang ang organisasyon ni Jehova nagauswag, ug madasig ka sa pagsagnunot niini.
5 Ipahibalo sa inyong magtatan-aw sa sirkito kon unsang mga kahikayan ang gihimo alang sa espesyal adlawng asembliya sa inyong sirkito. Tinoa nga ikaw atua didto sa programa sa tibuok adlaw.