Bag-ong Programa sa Adlawng Espesyal nga Asembliya
Ang tema sa programa sa adlawng espesyal nga asembliya alang sa bag-ong tuig sa pag-alagad adunay malig-ong Kasulatanhong pundasyon: “Magpasakop Kamo sa Diyos—Sukli ang Yawa.” (Sant. 4:7) Maayo kini nga giya alang niining malisod nga kapanahonan! Ang atong pagtuman sa mga sugo sa Diyos magbutang kanato sa pag-atubangay gayod kang Satanas. Ang maong programa magtudlo kanato kon sa unsang paagi makabarog nga malig-on batok sa makadaot-sa-pagtuo, daotan nga mga laraw sa Yawa. Unsa ang pipila sa espirituwal nga mga bahandi nga atong madawat niining asembliyaha?
Ang magtatan-aw sa sirkito magbutyag kon sa unsang paagi ang “Pagpasundayag sa Diyosnong Pagkamapinasakopon Ingong mga Membro sa Pamilya” mopalig-on sa mga pamilya sa pagbarog batok sa mga pagpit-os sa kalibotan. Ang unang pakigpulong sa bisitang mamumulong nianang adlawa, “Kon Unsay Kahulogan sa Pagsukol sa Yawa,” magpatin-aw kon ngano ug sa unsang paagi angay kitang mohimog positibong aksiyon sa pagsukol sa mga tumong ni Satanas sa pagdaot sa atong espirituwalidad. Duha ka bahin ang ilabinang gipahiangay alang sa mga batan-on, kinsa kinahanglan usab nga magmabinantayon sa mga laraw sa Yawa. Daghang Kristohanon nga karon mga edaran na midumili sa pagpahiuyon sa mga tinguha sa kalibotan sa panahon sa ilang pagkabatan-on. Malipay kitang makapatalinghog sa pipila sa ilang personal nga mga kasinatian.
Ang pagkamapinasakopon ngadto sa awtoridad maoy kinahanglanon sa tanan nga naglangkob sa tawhanong katilingban. Busa, ang paniklop nga pakigpulong sa bisitang mamumulong magpasiugda sa upat ka luna diin ang atong diyosnong pagkamapinasakopon kinahanglang madayag: (1) ngadto sa mga kagamhanan, (2) diha sa kongregasyon, (3) diha sa sekular nga mga trabaho, ug (4) diha sa pamilya. Usa gayod ka praktikal nga programa!
Kinahanglang pahibaloon kanilang buot magpabawtismo niining adlawng espesyal nga asembliya ang nagadumalang magtatan-aw sa labing sayong maarangan. Kinahanglang markahan natong tanan ang petsa diha sa atong kalendaryo ug magplano sa pagtambong sa enterong programa sa asembliya. Ang mga panalangin nga atong madawat maoy dumalayon samtang magpasakop kita kang Jehova sa walay kataposan.