Programa sa Espesyal nga Asembliya sa 2010
1. (a) Unsay mga tema sa espesyal nga asembliya sa nangaging mga tuig? (b) Aduna bay partikular nga mga punto sa nangaging mga espesyal nga asembliya nga nakatabang kanimo sa imong ministeryo?
1 ‘Tinoa ang mas Hinungdanong mga Butang,’ “Nagabarog nga Malig-on Ingong Usa ka Panon,” ‘Padayon sa Pagpamatuod sa Kamatuoran,’ ug ‘Kami ang Yutang-kulonon—Si Jehova ang Among Magkukulon.’ (Filip. 1:9, 10, 27; Juan 18:37; Isa. 64:8) Pipila lamang kini sa daghang tema nga gihisgotan sa miaging mga espesyal nga asembliya. Naghinamhinam ka na ba sa pagtambong sa espesyal nga asembliya sa 2010? Kini ang tema: “Ang Panahong Nabilin Mubo Na,” nga gipasukad sa 1 Corinto 7:29.
2. Unsay inyong himoon aron mahinam kamo sa pagpaabot niini nga asembliya?
2 Sa dihang mapahibalo na diha sa inyong kongregasyon ang petsa sa espesyal nga asembliya, ipakita nga mahinamon kang nagpaabot niini. Gipahinam sa ubang mga ginikanan ang ilang mga anak sa pagpaabot sa asembliya pinaagi sa pagmarka sa petsa diha sa kalendaryo, ug sa paglista sa mga dad-onon sa asembliya, ug sila mag-ihap kon pila na lang ka adlaw ang paaboton. Sa panahon sa inyong Pamilyahanong Pagsimba, mahimo ninyong repasohon ang inyong mga nota sa nangaging mga espesyal nga asembliya. Repasoha usab ang librong Pahimusli ang Edukasyon sa Teokratikanhong Tunghaan sa Ministeryo, panid 13-16, aron matabangan ka ug ang imong pamilya sa pagpaminaw pag-ayo.—Luc. 8:18.
3. Sa unsang paagi atong mapahimuslan gayod ang programa sa asembliya?
3 Ipadapat ang Imong Nakat-onan: Inigkahuman sa asembliya, daghan ang moingon nga nindot kaayo ang programa. Ug tinuod kana kay usa kini sa mga tagana ni Jehova. (Prov. 10:22) Aron imong mapadapat ang imong napatalinghogan, kinahanglang imo gayod kining pamalandongon ug hinumdoman. (Luc. 8:15) Hisgoti ang programa uban sa inyong pamilya o sa mga igsoon nga inyong kauban sa sakyanan inigpauli ninyo gikan sa asembliya. Hisgoti usab ang inyong giplanong himoon ug ang mga punto nga makatabang kaninyo diha sa ministeryo. Kon inyo kining himoon, inyo gayod nga mapahimuslan ang programa sa asembliya.—Sant. 1:25.
4. Nganong makaseguro kita nga mapuslanon gayod kini nga asembliya?
4 Malipay kita kon makadawat kitag regalo nga ato gayong gikinahanglan. Dili ba mahinam kita sa pagpaabot sa kon unsay ihatag ni Jehova kanato sa umaabot nga espesyal nga asembliya? Makaseguro kita nga kini mapuslanon gayod. Makalaom kita nga atong madawat gikan kang Jehova ang pagdasig ug pagbansay sa pagtuman sa buluhaton nga iyang gisugo kanato.—2 Tim. 4:2; Sant. 1:17.