Bag-ong Kahikayan sa Pagrepaso sa mga Programa sa Asembliya
Samtang padayong mosamot sa pagkadaotan ang kalibotan ni Satanas, si Jehova nagpalig-on kanato “sa pagsalikway sa pagkadili-diyosnon ug sa kalibotanong mga tinguha ug sa pagkinabuhi uban ang maayong panghunahuna ug pagkamatarong ug diyosnong pagkamahinalaron taliwala niini nga sistema sa mga butang.” (Tito 2:12) Lakip sa mga tagana nga iyang ginahimo pinaagi sa “matinumanon ug maalamong ulipon” mao ang mga programa sa tinuig nga sirkitong asembliya ug adlaw sa espesyal nga asembliya. (Mat. 24:45) Pagkamakapalig-on niining espirituwal nga mga panagkatigom alang kanato!
Aron kita matabangan sa paghupot ug pagpadapat sa instruksiyon nga atong nadawat, ang bag-ong kahikayan sa pagrepaso niining mga programaha pagagamiton sa 2005. Ang mga panid 5-6 niini nga pasukip adunay mga artikulo nga mohatag ug pasiuna kon unsay ipresentar ug usab repasong mga pangutana alang sa matag programa sa asembliya. Ang mga kongregasyon magkonsiderar niining maong impormasyon sa Tigom sa Pag-alagad sa dili pa gayod sila motambong ug human gayod sa ilang pagtambong sa mga asembliya. Unsaon paghikay niini?
Usa o duha ka semana sa dili pa motambong ang kongregasyon sa sirkitong asembliya, ang napulo ka minutong pakigpulong nga ipasukad sa artikulong “Bag-ong Programa sa Sirkitong Asembliya” ipresentar diha sa Tigom sa Pag-alagad aron kita mahinam sa maong programa. Ipasiugda usab sa mamumulong ang repasong mga pangutana ug dasigon ang tanan sa pagkuhag nota isip pagpangandam sa repaso nga pagahimoon pipila ka semana human sa asembliya.
Sulod sa pipila ka semana human sa asembliya, ang 15 minutos nga pagrepaso sa unang adlaw sa programa sa asembliya ilakip diha sa Tigom sa Pag-alagad. Pagkasunod semana, ang 15 minutos gamiton sa pagrepaso sa ikaduhang adlaw sa programa. Ang repasong mga pangutana nga gitagana niining maong pasukip magsilbing pasukaranan sa maong mga panaghisgot. Ang pagrepaso magpasiugda sa pagkamapuslanon sa impormasyon. Ang mga ansiyano mahimong maghikay sa pagpamubo, pagtangtang, o pag-eskedyul pag-usab sa ubang mga bahin sa Tigom sa Pag-alagad aron ikalakip kini nga mga sesyon sa pagrepaso.
Ang samang kahikayan pagasundon maylabot sa programa sa adlaw sa espesyal nga asembliya, pero aduna lamang ing usa ka 15 minutos nga bahin sa pagrepaso sa tibuok nga programa. Kitang tanan buot magtipig niining maong pasukip ug maggamit niini aron makabatog bug-os nga kaayohan gikan sa maayong instruksiyon nga itagana ni Jehova.—Isa. 48:17:18.