Ang Pulong sa Diyos Gamhanan
1. Unsay tema sa 2014 espesyal nga asembliya?
1 Lahi kaayo ang Bibliya kon itandi sa bisan unsang butang nga gikan sa dili hingpit nga tawo. Kini may gahom sa pagbag-o kanato, pagpahiuyon sa atong hunahuna ug buhat sa kabubut-on ni Jehova. Unsa ka gamhanan ang Pulong sa Diyos? Sa unsang paagi bug-os natong magamit ang gahom niini sa atong kinabuhi? Sa unsang paagi epektibong magamit kini aron tabangan ang uban? Seguradong mapalig-on kita dihang hisgotan kining mga puntoha sa programa sa espesyal nga asembliya sa 2014. Kini dunay temang “Ang Pulong sa Diyos Gamhanan,” nga gikutlo sa Hebreohanon 4:12.
2. Unsa nga mga pangutana ang bantayan nato nga matubag?
2 Pangitaa ang mga Tubag Niini: Samtang mamati ka sa programa, isulat ang tubag sa mga pangutana sa ubos.
• Nganong kinahanglang mosalig kita sa Pulong ni Jehova? (Sal. 29:4)
• Sa unsang paagi masinati nato ang gahom sa Pulong sa Diyos sa atong mga kinabuhi? (Sal. 34:8)
• Sa unsang paagi mapagawas nimo ang gahom sa Pulong sa Diyos diha sa imong ministeryo? (2 Tim. 3:16, 17)
• Sa unsang paagi makalikay kita nga mabiktima sa malimbongong gahom sa kalibotan ni Satanas? (1 Juan 5:19)
• Ingong batan-on, sa unsang paagi mahimo kang malamposong alagad sa Diyos? (Jer. 17:7)
• Sa unsang paagi kita mahimo hinuong gamhanan bisan sa dihang kita maluya? (2 Cor. 12:10)
• Unsay makatabang alang sa padayong pagbag-o, bisan pag duna kitay mga batasan ug tinamdan nga nakagamot na pag-ayo? (Efe. 4:23)
3. Gawas sa pagpamati sa programa, unsa pay laing paagi nga makabenepisyo kita sa espesyal nga asembliya?
3 Makabenepisyo kita sa pagpamati niining importanteng impormasyon! Dugang pa, ang espesyal nga asembliya, sama sa sirkitong asembliya ug distritong kombensiyon, maghatag kanatog kahigayonan nga makapasangkad ug malipay sa pagpakig-uban sa atong mga igsoon gikan sa ubang kongregasyon. (Sal. 133:1-3; 2 Cor. 6:11-13) Busa paggahig panahon nga makig-uban sa dugay nang mga higala, ug makighigala usab sa uban. Kon may nagaduawng mamumulong sama sa magtatan-aw sa distrito o Bethelite, nganong dili pahimuslan ang higayon aron abiabihon sila ug ang ilang asawa? Daghan gayod kitag rason nga mahinam sa nagkaduol nga espesyal nga asembliya!