Pagtigom sa mga Tawo Gikan sa Tanang Pinulongan
1 Ang Pulong sa Diyos nagakatuman! Ang katawhan nga “gikan sa tanang pinulongan sa mga nasod” nagadawat sa matuod nga pagsimba. (Zac. 8:23) Sa unsang paagi ginatabangan sa mga Saksi ni Jehova ang mga tawo sa tanang ‘tribo, katawhan, ug pinulongan’ nga makadangat sa hinlong baroganan atubangan ni Jehova, uban sa kahigayonan nga makalabang-buhi sa “dakong kasakitan”?—Pin. 7:9, 14.
2 Misanong ang Organisasyon sa Diyos: Gihikay sa Nagamandong Lawas nga ang literatura sa Bibliya mabatonan diha sa mga 380 ka pinulongan aron ang katawhan sa tibuok yuta tin-awng makasabot sa kahinungdanon sa maayong balita. Ang pag-andam ug pagpatik sa literatura diha sa daghang pinulongan maoy usa ka dakong buluhaton. Naglangkit kini sa pagtigom ug mga tem sa kuwalipikadong mga maghuhubad ug sa pagtagana kanila sa tabang nga ilang gikinahanglan sa paghubad sa atong literatura ngadto niining mga pinulongana, maingon man sa pagpatik ug pagpadala niini. Apan, ang pangunang papel gidula sa indibiduwal nga mga magmamantala sa Gingharian, kinsa nagdala sa nagaluwas-ug-kinabuhi nga mensahe sa Bibliya ngadto sa katawhan.
3 Pagdawat sa Hagit: Ang dagkong mga populasyon sa langyaw ug pinulongan makaplagan na karon sa daghang dapit. Aron maabot kining mga tawhana sa maayong balita, nagkadaghan ang mga alagad sa Diyos nga naningkamot sa pagkat-on ug Ininsek, Ruso, Kinatsila, o uban pang mga pinulongan nga komon sa ilang dapit. Ang uban nagtuon ug Sign Language. Sa Tinipong Bansa lamang, dunay mga 2,900 ka kongregasyon ug 240 ka grupo nga nagsangyaw diha sa 38 ka pinulongan gawas pa sa Ingles. Ang ubang mga tawo nga wala pa sukad makadungog bahin kang Jehova o walay hibangkaagan bahin sa Bibliya nagadawat sa kamatuoran sa Pulong sa Diyos.—Roma 15:21.
4 Makahimo ba kita sa pagpanikaysikay nga mas bug-os pa sa pagmantala sa maayong balita ngadto sa mga tawo diha sa atong teritoryo nga nagsultig laing pinulongan? (Col. 1:25) Daghang kongregasyon ang nag-organisar sa buluhatong pagsangyaw alang sa mga langyaw diha sa lokal nga komunidad. Ang mga magmamantala kinahanglang makakat-on una ug igo sa maong pinulongan aron makahatag ug yanong presentasyon, sama sa: “Komosta. Aniay maayong balita alang kanimo. [Dayon itanyag ang tract o brosyur nga mabatonan nianang pinulongana.] Babay.” Si Jehova magapanalangin gayod sa maong gamay nga sinugdanan!
5 Ang mensahe sa Gingharian makadani sa mga tawo sa tanang kagikan ug pinulongan. Atong pahimuslan ang kahigayonan sa pagpaambit niana ngadto kanila.