Imantala ang Mensahe sa Gingharian
1 “Kinahanglan nga . . . ipahayag ko ang maayong balita sa gingharian sa Diyos, tungod kay alang niini gipadala ako.” (Luc. 4:43) Pinaagi sa maong mga pulong, gipaila ni Jesus ang tema sa iyang ministeryo—ang Gingharian sa Diyos. Ang mensahe nga atong imantala karong adlawa nagsentro usab sa Gingharian, sumala sa gitagna sa Mateo 24:14: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” Unsang mga kamatuoran bahin sa Gingharian sa Diyos ang kinahanglang madunggan sa mga tawo?
2 Ang Gingharian sa Diyos nagamando na karon gikan sa langit ug sa dili madugay mopuli sa tanang tawhanong pagmando. Gipapahawa na ang Yawa gikan sa langit, ug ang presenteng daotang sistema sa mga butang misulod na sa kataposang mga adlaw niini. (Pin. 12:10, 12) Ang daotang karaang sistema ni Satanas pagalaglagon sa bug-os, apan ang Gingharian sa Diyos dili matarog. Kini magpabilin sa walay kataposan.—Dan. 2:44; Heb. 12:28.
3 Tagbawon sa Gingharian ang maayong mga tinguha sa tanang masinugtanong katawhan. Itagana niini ang kahupayan gikan sa pag-antos nga gipahinabo sa gubat, krimen, pagdaogdaog, ug kakabos. (Sal. 46:8, 9; 72:12-14) Mabatonan sa tanan ang dagayang pagkaon. (Sal. 72:16; Isa. 25:6) Ang mga sakit ug mga depekto sa lawas maoy mga butang na lang unya sa kagahapon. (Isa. 33:24; 35:5, 6) Samtang mag-anam ka hingpit ang mga tawo, ang yuta mahimong paraiso, ug ang mga tawo magpuyo nga may panaghiusa.—Isa. 11:6-9.
4 Atong ipakita nga gusto natong mahimong mga sakop sa Gingharian sa Diyos pinaagi sa atong paagi sa pagkinabuhi karon. Ang mensahe sa Gingharian angayng mag-impluwensiya sa atong tibuok kurso sa kinabuhi, nga naglakip sa atong mga tumong ug mga unahonon. Pananglitan, bisan tuod ug duna kitay obligasyon sa pagtagana alang sa atong panimalay, dili nato tugotan ang materyal nga mga kabalaka nga motuok sa intereses sa Gingharian. (Mat. 13:22; 1 Tim. 5:8) Hinunoa, kinahanglan natong tumanon ang awhag ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang mga butang [materyal nga mga kinahanglanon sa kinabuhi] igadugang ra kaninyo.”—Mat. 6:33.
5 Dinalian alang sa mga tawo nga mahibalo ug molihok uyon sa mensahe sa Gingharian samtang may panahon pa. Hinaot matabangan nato sila sa paghimo niana nga “nagagamit ug pangombinsir mahitungod sa gingharian sa Diyos.”—Buh. 19:8.