Bag-ong Programa sa Sirkitong Asembliya
1 Aron makabarog nga malig-on sa pagtuo diha sa usa ka way-kasegurohan nga kalibotan, kinahanglang mosalig kita kang Jehova. Sa unsang paagi ikapasundayag nato ang maong pagsalig diha sa atong matag adlaw nga pagkinabuhi? Sa unsang paagi ang pagsalig kang Jehova makaapektar sa atong personal ug pamilyahanon nga kinabuhi? Sa unsang paagi makatabang kini kanato sa pagsukol sa impluwensiya sa kalibotan ni Satanas? Ang programa sa sirkitong asembliya sa 2003 magtubag niining mga pangutanaha. Ang tema niini maoy “Salig Kang Jehova ug Buhata ang Maayo.”—Sal. 37:3.
2 Ang atong pagsalig kang Jehova dili lamang mapasundayag sa espesyal nga mga okasyon o sa mga panahong dako ang panginahanglan. Kini angayng mag-apektar sa atong adlaw-adlaw nga pagkinabuhi. Ipasiugda kini sa unang pakigpulong, “Salig Kang Jehova sa Tanang Panahon.” (Sal. 62:8) Ang upat ka bahin nga simposyum nga “Pagpasundayag ug Pagsalig Kang Jehova” magpakita kanato kon unsaon pagkaplag ug pagpadapat sa pinasukad-sa-Bibliya nga impormasyon nga makatabang kanato sa pagtukod ug malamposong kaminyoon, pagdumala sa mga problema nga motungha diha sa pamilya, ug sa pagtagana sa atong materyal nga mga panginahanglan.
3 Buot ipahamtang sa kalibotan ni Satanas nganhi kanato ang tinuis nga panghunahuna kon unsay husto ug sayop ug ipatungha ang kalibog kon unsay hinungdanon ug di-hinungdanon. (Isa. 5:20) Ang mga pakigpulong nga “Pagbantay Batok sa Way-Pulos nga mga Butang sa Kinabuhi” ug “Isalikway ang Daotan—Mahimong mga Magbubuhat sa Maayo” magpalig-on sa atong determinasyon sa pagtuboy sa hataas nga mga sukdanan ni Jehova.—Amos 5:14.
4 Sa dihang ipadangat na ni Jehova ang kataposan sa presenteng daotang sistema sa mga butang, ang mga alagad sa Diyos kinahanglang mosalig kaniya sa bug-os. Ipasiugda kini sa pakigpulong publiko, “Ang Kagawasan Gikan sa Kalisdanan sa Kalibotan Haduol Na.” Human niana, dapiton kita sa pagsusi sa atong kaugalingon sa bahin nga “Isipon Ka Kahang Takos sa Gingharian sa Diyos?” Ang programa pagataposon uban sa awhag nga “Salig sa mga Saad ni Jehova.”
5 Usa ka haylayt sa matag asembliya mao ang pakigpulong sa bawtismo. Si bisan kinsa nga buot magpabawtismo kinahanglang magpahibalo sa nagadumalang magtatan-aw sa labing sayong maarangan aron mahimo ang kinahanglanong mga kahikayan.
6 Niining way-kasegurohang mga panahon, si Jehova lamang ang tinuod nga tinubdan sa pagsalig ug kalig-on. (Sal. 118:8, 9) Hinaot mapalig-on natong tanan ang atong pagsalig kaniya pinaagi sa pagtambong sa tibuok programa sa sirkitong asembliya.