Ginahimo Mo ba ang Imong Bahin Aron Mahuptan ang Tukmang Taho?
1 Daghang asoy sa Bibliya naglakip ug tinong mga numero, nga makatabang sa paghatag ug tin-awng hulagway kon unsay nahitabo. Pananglitan, gipukan ni Gideon ang kampo sa Midian uban sa 300 lamang ka lalaki. (Maghu. 7:7) Gipatay sa manulonda ni Jehova ang 185,000 ka Asiryanhong kasundalohan. (2 Hari 19:35) Sa Pentekostes 33 K.P., mga 3,000 ang nabawtismohan, ug wala madugay human niana midaghan ang mga magtutuo ngadto sa mga 5,000. (Buh. 2:41; 4:4) Sumala niining mga asoya, ang karaang mga alagad sa Diyos naningkamot gayod sa paghupot ug kompleto ug tukmang rekord.
2 Ang organisasyon ni Jehova karon nagsugo kanato sa pagtaho sa atong kalihokan sa pag-alagad sa kanataran matag bulan. Ang atong matinumanong pagkooperar niining kahikayana makaamot sa epektibong pagdumala sa pagsangyaw nga buluhaton. Mahimong ipakita sa mga taho nga usa ka bahin sa ministeryo nagkinahanglan ug pagtagad o kinahanglan ang mas daghang magmamantala sa usa ka tinong bahin sa kanataran. Diha sa kongregasyon, ang mga taho sa pag-alagad sa kanataran motabang sa mga ansiyano nga mailhan kadtong may kahigayonan sa pagpalapad sa ilang ministeryo maingon man niadtong kinahanglang tabangan. Ug ang mga taho bahin sa pag-uswag sa buluhatong pagsangyaw sa Gingharian nagadasig sa tibuok Kristohanong panag-igsoonay. Ginahimo mo ba ang imong bahin aron mahuptan ang tukmang taho?
3 Imong Personal nga Responsabilidad: Sa kataposan sa bulan, nalisdan ka ba sa paghinumdom sa imong nahimo diha sa ministeryo? Kon mao, nganong dili isulat ang imong kalihokan matag higayon nga ikaw makig-ambit diha sa pag-alagad sa kanataran? Ang uban migamit ug kalendaryo o talaadlawan. Ang uban pa nagdalag blangkong report slip sa pag-alagad sa kanataran. Sa kataposan sa bulan, ihatag gilayon ang imong taho ngadto sa imong magtatan-aw sa pagtuon sa libro. O, kon buot nimo, mahimo mong ibutang ang imong taho sa kahon alang sa report didto sa Kingdom Hall. Kon malimot ka sa paghatag sa imong report, kontaka dayon ang imong magtatan-aw sa pagtuon sa libro inay hulaton siya nga maoy moduol nimo. Ang matanlagong pagreport sa imong kalihokan nagpakitag pagtahod sa kahikayan ni Jehova ug mahigugmaong konsiderasyon alang sa mga igsoon nga giasayn sa pagkolekta ug paghan-ay sa mga report.—Luc. 16:10.
4 Ang Papel sa Magtatan-aw sa Pagtuon sa Libro: Ingong alisto ug mahangawaon nga magbalantay, ang magtatan-aw sa pagtuon sa libro interesado sa kalihokan sa grupo sa tibuok bulan. (Prov. 27:23) Siya nahibalo kon ang matag magmamantala nagahimo ba ug regular, makahuloganon, ug malipayon nga pagpakig-ambit ug daling motabang kon may si bisan kinsang wala makasangyaw sulod sa tibuok bulan. Ang pagdasig, praktikal nga sugyot, o imbitasyon sa pag-uban kaniya diha sa pag-alagad sa kanataran kasagaran mao ray gikinahanglan.
5 Sa kataposan sa bulan, paneguroon sa magtatan-aw sa pagtuon sa libro nga natuman sa tanan diha sa grupo ang ilang responsabilidad sa pagtaho sa ilang kalihokan aron ang sekretaryo makapadala ug tukmang taho sa kongregasyon ngadto sa sangang buhatan sa pagkapetsa-sayis sa sunod bulan. Kon hapit nang matapos ang bulan, makatabang tingali kaniya ang pagpahinumdom sa grupo ug manghatag ug mga report slip diha sa dapit sa pagtuon sa libro. Kon may si bisan kinsang malimtanon sa pagtaho sa ilang kalihokan, ikahatag niya ang nahiangay nga pahinumdom ug pagdasig.
6 Ang paghatag dayon sa atong mga taho sa pag-alagad sa kanataran makaamot aron mahuptan ang taho nga tukmang nagbanaag kon unsay nalampos diha sa kanataran. Buhaton mo ba ang imong bahin pinaagi sa pagtaho dayon sa imong kalihokan matag bulan?