Pangutana

◼ Ngano gayong itaho natong walay langan ang atong pag-alagad sa kanataran sa matag bulan?

Kitang tanan mobatig kalipay sa pagkadungog ug maayong mga butang nga nalampos sa pagsangyaw sa mensahe sa Gingharian. (Tan-awa ang Proverbio 25:25.) Ang Buhat 2:41 nagataho nga human sa diskurso ni Pedro sa adlaw sa Pentekostes, “mga tulo ka libong kalag ang nadugang.” Wala madugay sa ulahi, kanang gidaghanona mitubo ngadto sa “mga lima ka libo.” (Buh. 4:4) Pagkamakapadasig niadtong mga tahoa alang sa unang siglong mga Kristohanon! Karong adlawa kita usab nahinam sa pagkadungog sa kalamposan nga gitagamtam sa atong mga igsoon sa pagsangyaw sa maayong balita sa tibuok kalibotan.

Sanglit dakong panahon ug kahago ang nalangkit sa pagtipon sa maong mga taho, ang kooperasyon sa matag magmamantala sa Gingharian maoy bililhon. Ikaw ba matanlagon nga nagatunol sa imong taho nga walay langan sa matag bulan?

Ang mga taho sa mga pag-uswag nagahatag kanatog dakong kalipay. Dugang pa, ang mga taho nagatabang sa Sosyedad nga masundan ang pag-uswag sa tibuok-kalibotang buluhaton. Ang mga desisyon kinahanglang himoon kon asa ang dugang tabang mahimong kinahanglanon o ang matang ug gidaghanon sa literatura nga pagapatikon. Ang mga ansiyano sa kada kongregasyon nagagamit sa mga taho sa pag-alagad sa kanataran sa pagtino kon asang pauswagonon ang pagahimoon. Ang maayong mga taho makapalig-on, makapapukaw kanatong tanan sa pagsusi sa atong kaugalingong ministeryo alang sa posibleng mga pag-uswag.

Kinahanglang ilhon sa tanang magmamantala ang panginahanglan sa ilang indibiduwal nga responsabilidad nga itunol ang taho sa pag-alagad sa kanataran nga walay langan sa matag bulan. Ang mga tagdumala sa Pagtuon sa Libro sa Kongregasyon anaa sa maayong kahimtang aron pahinumdoman ang mga magmamantala niining responsabilidara. Mahimo kining ikapahinumdom sa kataposang pagtuon sa libro sa matag bulan. Kon walay kahigayonan sa pagtunol sa mga taho sa pag-alagad sa kanataran didto sa Kingdom Hall, mahimong kolektahon kini sa tagdumala sa Pagtuon sa Libro sa Kongregasyon ug tinoon nga untop nga ikahatag kini ngadto sa sekretaryo aron malakip sa regular binulang taho sa kongregasyon ngadto sa Sosyedad.

Ang atong kamakugihon sa matinumanong pagtaho sa atong binuhatan sa pag-alagad sa kanataran nga walay langan magpagaan sa luwan alang kanilang responsable sa atong espirituwal nga kaayohan.