Angay nga Tabang

¹ Sa dihang nakita ni apostol Pedro ang panginahanglan sa pagpalig-on sa mga isigkamagtutuo, ang kahingawa maoy nagtukmod kaniya sa paghatag kanilag mahigugmaong mga pahinumdom ug pagdasig. (2 Ped. 1:​12, 13; 3:1) Giawhag niya ‘kadtong nakabaton ug pagtuo’ nga padayong pauswagon ang ilang espirituwal nga mga hiyas aron dili mahimong “dili aktibo o dili mabungahon labot sa tukmang kahibalo sa atong Ginoong Jesu-Kristo.” (2 Ped. 1:​1, 5-8) Ang tuyo ni Pedro mao ang pagtabang kanila nga maseguro ang pagtawag ug pagpili nga ilang nadawat gikan kang Jehova, aron sila mahimong ‘sa kataposan makaplagan niya nga walay buling ug walay lama ug anaa sa pakigdait.’ (2 Ped. 1:​10, 11; 3:14) Alang sa daghan, ang iyang pagdasig napamatud-ang angay nga tabang.

² Karong adlawa, ang Kristohanong mga magtatan-aw aduna ing susamang kahingawa alang sa katawhan sa Diyos. Niining “makuyaw nga mga panahong lisod sagubangon,” daghang alagad ni Jehova ang kinahanglang mosagubang ug malisod nga mga kahimtang. (2 Tim. 3:1) Tungod sa padayong pinansiyal, pamilyahanon, o personal nga mga problema, ang pipila mahimong mobati sama sa gibati ni David: “Gilibotan ako ug mga katalagman hangtod nga dili na sila maihap. Naapsan ako sa mas daghan kong mga kasaypanan kay sa arang nakong makita; sila nahimong daghan pa kay sa mga buhok sa akong ulo, ug gibiyaan ako sa akong kasingkasing.” (Sal. 40:12) Kining maong mga pagpit-os mahimong bug-at kaayo nga ang maong mga tawo dili na magtagad sa hinungdanong espirituwal nga mga butang ug mohunong sa aktibong pagpakig-ambit diha sa Kristohanong ministeryo. Apan, bisan pa sa ilang mga kalisdanan, ‘wala nila kalimti ang kasugoan ni Jehova.’ (Sal. 119:176) Karon na ang hustong panahon alang sa mga ansiyano sa pagtagana sa gikinahanglang tabang ngadto sa maong mga tawo.​—Isa. 32:​1, 2.

³ Aron matagbaw kining maong panginahanglan, ginadasig ang mga ansiyano nga mohimog linaing panikaysikay sa pag-abag niadtong di-aktibo sa buluhatong pagsangyaw sa pagkakaron. Ang usa ka hiniusang panikaysikay aron molampos kini ang nagpadayon na karon ug molungtad pa hangtod sa bulan sa Marso. Ginahangyo ang mga magtatan-aw sa pagtuon sa libro sa pagduaw sa mga di-aktibo aron motanyag ug espirituwal nga tabang sa tuyo nga abagan sila nga mapasig-uli ang ilang kalihokan uban sa kongregasyon. Diin adunay panginahanglan, mahimong hikayon ang usa ka personal nga pagtuon sa Bibliya. Ang uban mahimong hangyoon sa pagtabang. Kon gihangyo ka sa pagtabang, ang imong mga panikaysikay mapuslanon gayod, ilabina kon modasig ka sa maluloton, masinaboton nga paagi.

⁴ Ang tanan may katarongan nga magmaya sa dihang ang usa ka tawo magpasig-uli sa iyang kalihokan uban sa kongregasyon. (Luc. 15:6) Ang atong mga panikaysikay sa pagdasig sa mga di-aktibo mahimong moresulta gayod sa “usa ka pulong nga gisulti sa hustong panahon.”​—Prov. 25:11.