Ayawg Kalimti Kadtong mga Di-Aktibo
1. Nganong angay kitang maningkamot sa pagdasig niadtong mga di-aktibo?
1 May kaila ka bang dili na aktibo? Tingali mihunong na siya sa pagpakig-uban sa kongregasyon ug wala na mag-alagad. Lagmit imong nahibalag siya samtang namalaybalay. Angay kitang maghunahuna nga ato gihapon siyang igsoon sa pagtuo. Buot natong ipakita kaniya ang atong gugma ug tabangan siya nga makabalik sa kongregasyon ug “sa magbalantay ug magtatan-aw sa [atong] mga kalag.”—1 Ped. 2:25.
2. Sa unsang paagi atong madasig ang usa ka di-aktibo?
2 Pagpakitag Interes: Ang usa ka mubong tawag sa telepono o duaw lagmit makapahunahuna sa usa nga dili na aktibo nga kita wala malimot kaniya. Unsay atong isulti? Mahimo nato siyang madasig pinaagi sa pagsulti kaniya nga kita naghunahuna kaniya. Hupti kanunay ang panagkabildo nga positibo ug makapalig-on. (Filip. 4:8) Kita makahisgot ug punto nga atong nagustohan gikan sa usa ka tigom nga gihimo di pa dugay. Kita makadapit usab kaniya sa pagtambong sa umaabot nga tigom o asembliya ug ingna nga magreserba ka ug lingkoranan alang kaniya o magtaganag kasakyan.
3. Sa unsang paagi naaktibo pag-usab ang usa ka sister?
3 Ang usa ka sister nga dili na aktibo kapin sa 20 ka tuig nakaplagan diha sa teritoryo. Bisan tuod wala siya modawat ug pagtuon sa Bibliya, gibalikan siya sa sister nga nakakaplag kaniya, ug gihatagan siyag kinaulahiang mga magasin. Human sa distritong kombensiyon, gipaambit sa magmamantala ang pipila ka makaiikag nga mga punto sa kombensiyon uban sa di-aktibong sister, ug sa ngadtongadto siya naaktibo pag-usab.
4. Sa unsang paagi atong trataron ang usa ka di-aktibo nga motambong pag-usab sa mga tigom?
4 Kon Mobalik ang Di-Aktibo: Kon motambong na pag-usab ang di-aktibong igsoon, sa unsang paagi atong trataron siya? Aw, giunsa ba pagtratar ni Jesus ang iyang mga tinun-an human nga sila temporaryong mibiya kaniya? Siya mahigugmaong nagtawag kanila ingong iyang “mga igsoon” ug nagpakitag pagsalig kanila. Iya pa ganing gihatagan sila ug usa ka hinungdanong buluhaton. (Mat. 28:10, 18, 19) Wala madugay human niana, sila napuliki sa pagmantala sa maayong balita nga ‘walay hunong.’—Buh. 5:42.
5. Paghisgot ug mga kahimtang diin kita angayng makigsulti una sa mga ansiyano bahin sa usa nga di-aktibo.
5 Sa dili pa tanyagan ug pagtuon sa Bibliya ang usa nga dili na aktibo o sa dili pa siya dapiton sa pagsangyaw uban kanato, angay kitang magpakisayod una sa mga ansiyano. Kon makahibalag kitag di-aktibo sa teritoryo, angay natong pahibaloon ang mga ansiyano aron sila makahatag sa gikinahanglang tabang.
6. Unsang kalipay ang atong masinati sa pagtabang niadtong mga di-aktibo?
6 Sama sa tin-awng gipakita sa Bibliya, kadto lamang molahutay hangtod sa kataposan ang maluwas. (Mat. 24:13) Busa, palandonga kadtong napandol o wala na mag-alagad. Kon kita mapailobong magbanaag sa gugma ni Jehova pinaagi sa pagpakitag sinserong interes sa mga di-aktibo, kita makasinati ug kalipay sa pagkakita kanila nga mobalik sa pag-alagad sa Diyos uban kanato.—Luc. 15:4-10.