Pangutana

◼ Sa unsang paagi ang usa ka tawo kinsa nahimong di-aktibo sa dugayng panahon matabangan aron mahimong takos pag-usab ingong magmamantala sa maayong balita?

Sa dihang ang di-aktibong tawo magpakitag timailhan nga siya adunay kinasingkasing nga tinguha nga moalagad kang Jehova, kini maoy usa ka hinungdan alang sa kalipay. (Luc. 15:​4-6) Lagmit, ang indibiduwal nagtugot sa pagsupak o mga pagpit-os sa kinabuhi nga isalindot ang iyang personal nga pagtuon, pagtambong sa tigom, ug pagpakig-ambit sa ministeryo sa kanataran. Sa unsang paagi ang personal nga tabang ikahatag sa labing maayong paagi aron siya mouswag sa espirituwal?

Kitang tanan kinahanglang mohimog unang tikang sa pagpasalig pag-usab niining di-aktibo sa atong tiunay nga Kristohanong gugma kaniya. Ang mga ansiyano kinahanglang alisto sa pagtino sa iyang espesipikong espirituwal nga mga panginahanglan. (Sant. 5:​14, 15) Kon ang pagkadi-aktibo nahitabo nga dili dugay, ang tabang gikan sa batid nga magmamantala hayan mao ra ang gikinahanglan aron maaktibo pag-usab ang maong indibiduwal sa pag-alagad sa kanataran. Apan, kon ang di-aktibong tawo wala na makig-uban sa kongregasyon sa dugayng panahon, lagmit mas labaw pang tabang ang gikinahanglan. Aron palig-onon ang pagtuo ug pagpabili, ang personal nga pagtuon sa Bibliya diha sa haom nga publikasyon mahimong mapuslanon. Nianang kahimtanga, ang magtatan-aw sa pag-alagad mohikay ug takos nga magmamantala sa pagdumala sa pagtuon. (Heb. 5:​12-​14; tan-awa ang Nobyembre 1998 “Pangutana” sa Atong Ministeryo sa Gingharian.) Kon may nailhan ka nga nanginahanglan sa maong tabang, pahibaloa ang magtatan-aw sa pag-alagad sa inyong kongregasyon.

Sa dili pa dapiton ang dugay nang di-aktibong tawo nga makig-ambit pag-usab sa ministeryo, maalamon nga makigkita kaniya ang duha ka ansiyano aron susihon kon siya mahimong takos ba ingong magmamantala sa Gingharian. Ilang sundon ang paagi nga susama nianang gigamit sa dihang makigtagbo sa mga bag-ohan nga nagtinguhang mahimong takos ingong mga magmamantala sa maayong balita. (Tan-awa ang Nobyembre 15, 1998, Bantayanang Torre, panid 17.) Ang di-aktibong tawo kinahanglang adunay maikagong tinguha nga ipaambit ang maayong balita sa uban. Siya usab kinahanglang makakab-ot sa paninugdang mga kinahanglanon nga gilaraw sa mga panid 98-9 diha sa librong Atong Ministeryo ug magmakanunayon sa pagtambong sa mga tigom sa kongregasyon.

Ang paghupot ug maayong espirituwal nga rutina dakog ikatabang sa mibalik nga tawo sa pagpalig-on ug pagmentinar sa iyang bililhong relasyon kang Jehova ug sa padayong paglakaw diha sa dalan sa kinabuhing walay kataposan. (Mat. 7:​14; Heb. 10:​23-​25) Ang iyang paghimo sa “tanang matinuorong paningkamot” ug pag-ugmad sa Kristohanong mga hiyas nga magmalungtaron mopugong kaniya gikan sa pagkahimo pag-usab nga “dili-aktibo o dili-mabungahon” ingong Kristohanong tinun-an.​—2 Ped. 1:​5-8.