Pangutana

◼ Tukma ba gihapon nga dumalahag usa ka pagtuon sa Bibliya sa balay ang di-aktibong igsoong lalaki o babaye nga ginapalihok sa usa sa mga membro sa Komite sa Pag-alagad sa Kongregasyon?

Ang mga ansiyano adunay kaakohan sa pagbantay sa kongregasyon, lakip ang bisan kinsang mga membro nga nahimong di-aktibo. Ilang duawon kini sila ug tinoon kon unsang personal nga tabang ang gikinahanglan. Diin tukma, kini mahimong maglakip sa pagtanyag sa usa nga di-aktibo sa kaayohan sa usa ka personal nga pagtuon sa Bibliya. Ang Organisado sa Pagtuman sa Atong Ministeryo, panid 103, nagsaysay nga ang Komite sa Pag-alagad sa Kongregasyon makahukom kon kinsay hayan makabenepisyo gikan sa maong tagana.

Ang magtatan-aw sa pag-alagad magtino kon kinsay labing maayong makatagana sa tabang, kon unsang mga ulohana ang angayng tun-an, ug kon unsang publikasyona ang ilabinang makatabang. Tingali ang usa nga sa sinugdan maoy nagtuon sa maong tawo o ang usa nga iyang kaila o gitahod mahimong anaa sa maayong kahimtang sa pagtabang. Ang usa ka takos ug hamtong nga sister mahimong hangyoon sa pagbulig sa di-aktibong sister. Kasagaran dili na kinahanglanon ang laing magmamantala sa pagkuyog sa natudlong tagdumala. Sa dihang giasayn, ang magmamantala nga nagadumala sa pagtuon mahimong makaihap sa oras, sa mga balikduaw, ug sa pagtuon.​—Tan-awa ang Disyembre 1987 nga Atong Ministeryo sa Gingharian, mga panid 1 ug 3.

Sanglit ang estudyante maoy usa ka bawtismadong tawo, sa kinatibuk-an ang pagtuon dili kinahanglang magpadayon sa taas nga yugto sa panahon. Ang tumong mao ang pagtabang sa usa nga di-aktibo nga makapadayon sa pagtambong sa tanang tigom sa kongregasyon ug mahimong regular nga magmamantala sa maayong balita. Ang magtatan-aw sa pag-alagad maoy mosusi sa pag-uswag sa maong mga pagtuon. Ang resulta niining mahigugmaong tabang mao nga kining mga igsoong lalaki ug babaye makaarang sa pag-abaga sa ilang kaugalingong luwan sa responsabilidad atubangan kang Jehova ug mahimong lig-ong “makagamot ug matukod” diha sa kamatuoran.​—Efe. 3:17; Gal. 6:5.