Ang Pulong sa Diyos Maoy Kamatuoran
1. Unsang hinungdanong impormasyon ang anaa sa Bibliya?
1 “Ang diwa sa imong pulong maoy kamatuoran,” misulat ang salmista. (Sal. 119:160) Pinaagi sa iyang inspiradong Pulong, si Jehova naghatag ug makapatagbaw nga mga tubag sa labing hinungdanong mga pangutana sa kinabuhi. Siya nagtagana ug kahupayan ug paglaom alang niadtong nagsagubang ug mga kalisdanan. Ug gipakita niya kanato kon sa unsang paagi kita masuod kaniya. “Ang pagkakat-on sa kamatuoran gikan sa Bibliya maoy sama sa pagbiya sa usa ka ngitngit ug ngiob nga dapit ug mosulod sa usa ka hayag ug makapahimuot nga lawak,” matod pa sa usa ka mapasalamatong babaye. Nanikaysikay ka ba sa pagpaambit sa kamatuoran gikan sa Pulong sa Diyos sa matag kahigayonan?
2. Sa unsang paagi ang Bibliya nakapauswag sa mga kinabuhi sa mga tawo?
2 Ang Makapabag-o nga Gahom sa Bibliya ug ang Unibersohanong Kamadanihon Niini: Ang kamatuoran sa Bibliya adunay gahom sa pagtandog sa mga kasingkasing ug pagbag-o sa mga kinabuhi. (Heb. 4:12) Ang usa ka batan-ong babaye nga ginganlag Rosa nalangkit sa pagpamampam, ingon man sa alkoholikong ilimnon ug pag-abuso sa droga. “Usa ka adlaw niana, sa dihang ako nagmagul-anon kaayo,” matod pa niya, “usa ka magtiayong Saksi ang nakigsulti kanako kon sa unsang paagi makatabang ang Bibliya sa pagsulbad sa atong mga problema. Nagsugod ako sa pagtuon sa Pulong sa Diyos, nga akong nakaplagang makaiikag. Sulod sa usa ka bulan may kusog na ako sa paghimog mahinlo, bag-ong pagsugod sa kinabuhi. Karon nga may katuyoan na ang akong kinabuhi, wala na nako kinahanglana ang pagdepende sa alkoholikong ilimnon o sa mga droga. Ug tungod kay gusto ko kaayong mahimong higala ni Jehova, determinado ako sa pagkinabuhi sumala sa iyang mga sukdanan. Kon dili pa tungod sa praktikal nga kaalam sa Pulong sa Diyos, segurado nga ako sa pagkakaron naghikog na.”—Sal. 119:92.
3. Nganong dili nato angayng pugngan ang pagpaambit sa mensahe sa Bibliya ngadto sa uban?
3 Dili sama sa kadaghanang mga basahon karong adlawa, ang Bibliya makadani sa mga tawo sa ‘tanang kanasoran, tribo, katawhan, ug mga pinulongan.’ (Pin. 7:9) Ang kabubut-on sa Diyos mao “nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Busa, dili gayod nato hunahunaon nga ang usa ka tawo dili madinawaton sa maayong balita tungod sa iyang kagikan. Hinunoa, ipaambit ang mensahe sa Gingharian ngadto sa tanan, nga gamiton ang impormasyon gikan sa Bibliya mismo kon mahimo.
4. Sa unsang paagi magamit nato ang Bibliya sa dihang magsangyaw?
4 Ipasiugda ang Kasulatan: Adunay daghang kahigayonan sa paggamit sa Bibliya diha sa ministeryo. Sa dihang magtanyag ug mga magasin, sulayi sa paglakip ang teksto nga makita diha sa gisugyot nga presentasyon. Sa dihang gamiton ang tanyag nga literatura sa maong bulan, nakaplagan sa uban nga epektibo ang pagbasa sa gipili pag-ayong teksto diha sa ilang pasiunang mga igsusulti. Sa dihang mohimog mga balikduaw, ipaambit ang usa o kapin pang mga teksto sa Bibliya sa matag higayon aron sa pagtabang sa tagbalay nga progresibong mabatonan ang tukmang kahibalo. Sa dihang magdumalag pagtuon sa Bibliya, isentro ang panaghisgot sa pangunang mga teksto sa Kasulatan. Sa dihang wala makig-ambit diha sa pormal nga ministeryo, hupti ang Bibliya nga daling magamit sa dihang motungha ang mga kahigayonan nga makasangyaw sa di-pormal nga paagi.—2 Tim. 2:15.
5. Nganong angayng manikaysikay kita sa paggamit sa Bibliya diha sa atong ministeryo?
5 Hinaot nga tabangan nato ang uban nga makapahimulos sa makapalihok nga gahom sa kamatuoran sa Pulong sa Diyos pinaagi sa paggamit sa Bibliya sa matag tukmang kahigayonan diha sa atong ministeryo.—1 Tes. 2:13.