Palihog Duawa Gilayon

Kinsay duawon gilayon? Kadtong mohangyo ug literatura o regular nga magpahatod ug magasin o gustong may Saksi nga mobisita kanila sa ilang balay. Diin man gikan ang maong mga hangyo? Gikan sa mga tawo nga mikontak sa sangang buhatan pinaagig koreyo o telepono o pinaagi sa atong opisyal nga Web site sa Internet. Sa dihang ipakita ang maong interes, ang sangang buhatan magpahibalo sa lokal nga kongregasyon pinaagig pagpadala ug S-70 nga porma. Kini maoy usa ka gamayng papel nga may ulohang “Please Arrange for a Qualified Publisher to Call on This Person.” Sa dihang makadawat ang mga ansiyano ug S-70 nga porma, angayng ihatag dayon nila kini ngadto sa usa ka magmamantala nga makugihong motabang aron maugmad ang interes. Kon ang magmamantala malisdan sa pagpangita sa maong tawo sa balay, mahimong sulayan sa magmamantala ang pagkontak kaniya pinaagig telepono o maalamong magbilin ug gamayng nota. Kon hangyoon ka sa paghimo sa maong duaw, palihog paningkamoti gayod nga makontak gilayon ang maong tawo.