Sundoga ang Tinamdan sa Pangisip ni Jesus
1. Unsang tinamdan sa pangisip ang gipakita ni Jesus?
1 Bisan tuod wala gayod nato makita ang Anak sa Diyos, pinaagi sa nasulat nga rekord sa kinabuhi ug ministeryo ni Jesus, kita tinuod nga nahigugma kaniya. (1 Ped. 1:8) Agig pagsunod sa kabubut-on sa iyang Amahan, gibiyaan niya ang iyang binayaw nga langitnong posisyon ug mianhi sa yuta. Ingong usa ka tawo, sa pagkadi-mahakogon iyang gialagaran ang uban ug unya gihatag ang iyang kinabuhi alang sa katawhan. (Mat. 20:28) Ang Pulong sa Diyos nag-agda kanato: “Hupti kini nga tinamdan sa pangisip diha kaninyo nga diha usab kang Kristo Jesus.” Sa unsang paagi atong masundog ang iyang nagasakripisyo-sa-kaugalingon nga espiritu?—Filip. 2:5-8.
2. Unsang pagsulay ang ginaatubang sa daghang Kristohanon, ug unsay makatabang kanila sa pagbuntog niana?
2 Sa Dihang Gikapoy: Bisan tuod si Jesus hingpit, siya gikapoy gihapon. Sa usa ka higayon, sa dihang siya “gikapoy sa panaw,” siya bug-os nga nagpamatuod ngadto sa usa ka Samarianhong babaye. (Juan 4:6) Daghang Kristohanon karon nagaatubang sa samang pagsulay. Human ang usa ka semanang kapoy nga pagtrabaho, mahimong lisod ang pagbaton ug kusog aron makig-ambit sa pagsangyaw. Bisan pa niana, kon himoon nato kana nga regular, makaplagan nato nga ang Kristohanong ministeryo makapahupay kanato sa espirituwal.—Juan 4:32-34.
3. Sa unsang paagi atong masundog ang kaandam ni Jesus sa pagtudlo?
3 Sa laing higayon, si Jesus ug ang iyang mga tinun-an miadto sa usa ka mingaw nga lugar aron sa pagpahulay sa makadiyot. Apan, usa ka dakong panon ang nahibalo ug miuna pagpanagan sa pagsugat kanila. Imbes maglagot, si Jesus “giabot ug kaluoy kanila” ug nagsugod sa “pagtudlo kanila ug daghang butang.” (Mar. 6:30-34) Ang pagsugod ug pagdumalag mga pagtuon sa Bibliya nanginahanglan sa samang tinamdan. Gikinahanglan niini ang hugot nga paningkamot ug tiunay nga gugma alang sa mga tawo. Kon sa pagkakaron wala ka pay gidumalahan ug pagtuon sa Bibliya, ayawg hunong sa pagpangitag usa.
4. Sa unsang paagi ang pag-oksilyare payunir makatabang kanato sa pagsundog sa tinamdan sa pangisip ni Kristo?
4 Unaha ang Espirituwal nga Intereses: Ang pag-oksilyare payunir makatabang kanato sa pagtagad ug dugang sa espirituwal nga mga kalihokan. Usa ka batan-ong sister misulat: “Ang inahan sa usa sa akong mga higalang babaye nagdasig kanamong duha sa pag-oksilyare payunir uban kaniya sa usa ka bulan. Nalipay gayod ako nga kami miduyog kaniya. Nahimuot ako nga nailhan pa gayod nako ang mga igsoon, ug sa wala madugay sila nahisama rag sakop sa akong pamilya. Napahimuslan usab nako ang dugang kahigayonan sa pagsulti sa uban bahin kang Jehova ug pagtudlo kanila sa kahibulongang mga kamatuoran sa Gingharian. Kining tanan mas nakapasuod kanako kang Jehova ug sa iyang organisasyon.”—Sal. 34:8.
5. Nganong kita kinahanglang magpadayon sa pagpaningkamot sa pagsundog sa tinamdan sa pangisip ni Jesus?
5 Kitang tanan nakigbugno tali sa atong di-hingpit nga unod ug sa atong tinguha sa pagpahimuot kang Jehova. (Roma 7:21-23) Angay natong suklan ang tigpasayon-sa-kaugalingon nga espiritu sa kalibotan. (Mat. 16:22, 23) Si Jehova makatabang kanato nga makasagubang niini pinaagi sa iyang balaang espiritu. (Gal. 5:16, 17) Samtang kita maghulat sa atong kaluwasan ngadto sa matarong nga bag-ong kalibotan sa Diyos, hinaot nga atong sundogon ang tinamdan sa pangisip ni Jesus pinaagi sa pag-una sa intereses sa Gingharian ug intereses sa uban kay sa atong kaugalingon.—Mat. 6:33; Roma 15:1-3.